គណបក្សហ៊្វុនស៊ិនប៉ិច ប្រកាសគាំទ្រសេចក្ដីសម្រេចរបស់តុលាការកំពូល និងអរគុណរដ្ឋាភិបាល

2017-11-17 02:59:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណបក្សហ្វ៊ុនស៊ិនប៉ិច របស់សម្តេចក្រុមព្រះ នរោត្តម រណឫទ្ធិ បានចេញសេចក្ដីថ្លែងការណ៍ គាំទ្រពេញទំហឹងចំពោះសេចក្ដីសម្រេចរបស់តុលាការកំពូល កាលពីថ្ងៃទី១៦ ខែវិច្ឆិកា ដែលបានរំលាយគណបក្សសង្រ្គោះជាតិ និងហាមថ្នាក់ដឹកនាំគណបក្សសង្រ្គោះជាតិ ១១៨នាក់ មិនឲ្យធ្វើនយោបាយ ៥ឆ្នាំ។

នៅក្នុងសេចក្ដីថ្លែងការណ៍របស់ខ្លួន គណបក្សហ៊្វុនស៊ិនប៉ិច បានអះអាងថា ចំណាត់ការរបស់តុលាការកំពូល គឺត្រឹមត្រូវ ស្របតាមពាក្យបណ្ដឹងរបស់ក្រសួងមហាផ្ទៃ ដើម្បីរក្សាសន្តិភាព ស្ថិរភាពនយោបាយ និងការអភិវឌ្ឍន៍សង្គម ទប់ស្កាត់បក្សនយោបាយដែលបានឃុតឃិតជាមួយបរទេស។

ក្រៅពីគាំទ្រការសម្រេចរបស់តុលាការកំពូល គណបក្សហ៊្វុនស៊ិនប៉ិច ក៏បានថ្លែងអំណរគុណរដ្ឋាភិបាលផងដែរ។ ក្នុងសេចក្ដីថ្លែងការណ៍ដដែល គណបក្សហ្វ៊ិនស៊ិនប៉ិច បញ្ជាក់ថា៖ "គណបក្សហ៊្វុនស៊ិនប៉ិច សូមថ្លែងអំណរគុណដ៏ជ្រាលជ្រៅ និងការកោតសរសើរដោយស្មោះចំពោះរាជរដ្ឋាភិបាល ដែលបានចាត់វិធានការទាន់ពេលវេលា ប្រកបដោយស្មារតីជាតិនិយម ក្នុងការប្រមូលភស្ដុតាងជាច្រើន ដើម្បីផ្ដល់ជូនស្ថាប័នតុលាការ ចំពោះអំពើទាំងឡាយរបស់គណបក្សសង្រ្គោះជាតិ..."។

សម្ដេចក្រុមព្រះ នរោត្តម រណឫទ្ធិ ថ្លែងទៅកាន់សមាជិកគណបក្សហ្វ៊ិនស៊ិនប៉ិច នាពេលកន្លងមក

គួរបញ្ជាក់ថា ក្រោយតុលាការកំពូលសម្រេចរំលាយគណបក្សសង្រ្គោះជាតិភ្លាម កាលពីល្ងាចថ្ងៃទី១៦ វិច្ឆិកាម្សិលមិញនេះ សម្ដេចហ៊ុន សែន នាយករដ្ឋមន្រ្ដី បានថ្លែងសារគាំទ្រសេចក្ដីសម្រេចរបស់តុលាការកំពូល ព្រមទាំងបានអំពាវនាវឲ្យសមាជិកគណបក្សនេះមកចូលរួមជាមួយគណបក្សប្រជាជនកម្ពុជា។ រីឯគណបក្សសង្រ្គោះជាតិ ក៏បានចេញសេចក្ដីថ្លែងការណ៍ភ្លាមៗ ដើម្បីថ្កោលទោសចំពោះការសម្រេចនោះ។

គណបក្សយុវជនកម្ពុជា របស់លោក ពេជ្រ ស្រស់ ក៏បានប្រកាសគាំទ្រសេចក្ដីសម្រេចរបស់តុលាការកំពូលផងដែរ។ ផ្ទុយពីគ្នានេះ គណបក្សប្រជាធិបតេយ្យមូលដ្ឋាន បានចេញសេចក្ដីថ្លែងការណ៍ សម្តែងការសោកស្តាយសេចក្ដីសម្រេចនេះ ដោយថាសេចក្ដីសម្រេចនេះ បានប៉ះពាល់ដល់គោលការណ៍ប្រជាធិបតេយ្យសេរីពហុបក្ស៕

អត្ថបទ៖ សុខ សុវត្ថិ