កម្ពុជា ចូលរួមបង្កើនកងកម្លាំងរក្សាសន្តិភាពនារីឲ្យបាន ១៥%
- 2017-11-17 03:17:07
- ចំនួនមតិ 0 | ចំនួនចែករំលែក 0
កម្ពុជា ចូលរួមបង្កើនកងកម្លាំងរក្សាសន្តិភាពនារីឲ្យបាន ១៥%
ចន្លោះមិនឃើញ
រដ្ឋមន្ត្រីក្រសួងការពារជាតិ លោក ទៀ បាញ់ បានសង្កត់ធ្ងន់ថា បច្ចុប្បន្នកម្លាំងរក្សាសន្តិភាពនារីរបស់កម្ពុជា មិនទាន់បានឆ្លើយតបទៅតាមតម្រូវការជាក់ស្តែងក្នុងតំបន់បេសកកម្មរបស់អង្គការសហប្រជាជាតិនៅឡើយទេ។ ក៏ប៉ុន្តែ កម្ពុជាប្តេជ្ញារួមចំណែកជាមួយបណ្ដាប្រទេសបរិច្ចាគផ្សេងៗទៀត ដើម្បីបង្កើនការចូលរួមរបស់នារីឱ្យបានដល់១៥ភាគរយ តាមផែនការរបស់អង្គការសហប្រជាជាតិ កំណត់សម្រាប់ឆ្នាំ២០១៧ និងឈានដល់លើសផែនការកំណត់ ដើម្បីបង្កើនប្រសិទ្ធភាពប្រតិបត្តិការក្នុងតំបន់បេសកកម្ម។
លោកបានថ្លែងបែបនេះ នៅក្នុងកិច្ចប្រជុំថ្នាក់រដ្ឋមន្ត្រីការពារជាតិ ស្តីពីការរក្សាសន្តិភាពក្នុងក្របខណ្ឌអង្គការសហប្រជាជាតិ ដែលប្រទេសកាណាដា ទទួលធ្វើជាម្ចាស់ផ្ទះ កាលពីថ្ងៃទី១៥ ខែវិច្ឆិកា ឆ្នាំ២០១៧។
លោក ទៀ បាញ់ បានថ្លែងបន្តថា រាជរដ្ឋាភិបាលកម្ពុជាក៏កំពុងរង់ចាំបញ្ជូនក្រុមបោសសម្អាតមីនចំនួន២កង អាវុធហត្ថ១កង និងវិស្វកម្ម១កង នៅក្នុងប្រព័ន្ធត្រៀមជាស្រេច ដែលមានសមត្ថភាពទាំងរចនាសម្ព័ន្ធ និងគ្រឿងបំពាក់សម្រាប់ឆ្លើយតបឱ្យបានទាន់ពេលវេលា ក្នុងអំឡុងពេលមានការស្នើសុំជាផ្លូវការពីទីបញ្ជាការរបស់អង្គការសហប្រជាជាតិ ប្រចាំទីក្រុងញូវយ៉ក៕