សរុបចំនួនអ្នកមានឈ្មោះក្នុងបញ្ជីឈ្មោះបោះឆ្នោតឆ្នាំ២០១៧
- 2017-11-17 03:23:47
- ចំនួនមតិ 0 | ចំនួនចែករំលែក 0
សរុបចំនួនអ្នកមានឈ្មោះក្នុងបញ្ជីឈ្មោះបោះឆ្នោតឆ្នាំ២០១៧
ចន្លោះមិនឃើញ
យោងតាមលទ្ធផលបណ្តោះអាសន្ននៃការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតឆ្នាំ២០១៧ របស់គណៈកម្មាធិការជាតិរៀបចំការបោះឆ្នោត (គ.ជ.ប) ចេញផ្សាយនៅថ្ងៃទី១៧វិច្ឆិកានេះ ឲ្យដឹងថា អ្នកមានឈ្មោះក្នុងបញ្ជីឈ្មោះបោះឆ្នោតឆ្នាំ២០១៧ មានចំនួនសរុបជាង ៨,៣៨លាននាក់ ក្នុងនោះស្រីមានចំនួន ៤,៤៧លាននាក់។ ចំនួននេះ គឺស្មើនឹង ៨៤,៨% នៃអ្នកគ្រប់អាយុបោះឆ្នោតចំនួន ៩,៨៨លាននាក់។
បើតាមរបាយការណ៍ដដែលនេះ អ្នកត្រូវទៅចុះឈ្មោះបោះឆ្នោតថ្មីក្នុងឆ្នាំ២០១៧ ត្រូវបានប៉ាន់ស្មានថា មានចំនួន ១,៦២លាននាក់ ប៉ុន្តែមានតែ ៥៣,៨៨ម៉ឺននាក់ប៉ុណ្ណោះដែលបានអញ្ជើញទៅចុះឈ្មោះបោះឆ្នោត។ អ្នកដែលត្រូវលុបចេញពីបញ្ជីឈ្មោះបោះឆ្នោតវិញ មានចំនួនជាង ៨ម៉ឺននាក់។
អ្នកនាំពាក្យ គ.ជ.ប លោក ហង្ស ពុទ្ធា បានអះអាងនាពេលថ្មីៗនេះថា ជាង១លាននាក់ដែលមិនបានទៅចុះឈ្មោះបោះឆ្នោតនោះ គឺជាពលរដ្ឋខ្មែរ ដែលធ្វើចំណាកស្រុក ទៅរស់នៅ និងធ្វើការនៅក្រៅប្រទេស។ ចំនួនអ្នកមិនបានចុះឈ្មោះបោះឆ្នោតឆ្នាំ២០១៧នេះ គឺតួលេខដូចនៅនឹងឆ្នាំ២០១៦ដែរ ដែលមានប្រមាណជាង១លាននាក់ដូចគ្នា។ ទោះជាយ៉ាងណា លោកបញ្ជាក់ថា នេះជាតួលេខខ្ពស់សម្រាប់កម្ពុជា បើប្រៀបធៀបនឹងប្រទេសផ្សេងៗ ក្នុងការរៀបចំដំណើរការបញ្ជីបោះឆ្នោត៕