ភរិយាប្រធានាធិបតីស៊ីមបាវ៉េ ល្បីចាយខ្ជះខ្ជាយ ខណៈពលរដ្ឋរកលុយទិញបាយគ្មាន
- 2017-11-17 06:52:20
- ចំនួនមតិ 0 | ចំនួនចែករំលែក 0
ភរិយាប្រធានាធិបតីស៊ីមបាវ៉េ ល្បីចាយខ្ជះខ្ជាយ ខណៈពលរដ្ឋរកលុយទិញបាយគ្មាន
ចន្លោះមិនឃើញ
លោកស្រី Grace Mugabe ដែលជាភរិយាប្រធានាធិបតីស៊ីមបាវ៉េ ត្រូវគេស្គាល់ថាជាមនុស្សស្រី ចាយលុយច្រើនលើសលប់មិនចេះគិត។ គ្រាន់តែអាពាហ៍ពិពាហ៍កូនស្រីរបស់លោកស្រី កាលពីពេលកន្លងទៅចំណាយអស់ ៣,៩លានដុល្លារ។
ក្រៅពីនេះ ភរិយារបស់លោក Robert Mugabe ក៏មានសេតវិមានល្អប្រណីតបំផុតលើពិភពលោកផងដែរ ដែលមានតម្លៃថ្លៃប្រមាណ ១០០លានដុល្លារ រួមទាំងរថយន្ត Rolls-Royce ជិត៤០ម៉ឺនដុល្លារ។ មួយវិញទៀត លោកស្រី Grace មានរហស្សនាមថា "កំពូលអ្នកដើរទិញអីវ៉ាន់"។ កាលពីពេលទៅលេងទីក្រុងប៉ារីស ប្រទេសបារាំង លើកមុន លោកស្រីចាយអស់ជិត ១៦ម៉ឺនដុល្លារ សម្រាប់ការដើរផ្សារម្ដង។
តើប្រជាជននៅប្រទេសស៊ីមបាវ៉េ ពេញចិត្តទង្វើនេះដែរឬទេ? ចម្លើយប្រាកដណាស់គឺ "ទេ"។ លោកស្រី Grace ត្រូវគេស្អប់ស្ទើរពេញផ្ទៃប្រទេសទៅហើយ ព្រោះប្រជាជនសុទ្ធតែក្រលំបាកវេទនា។ ៧នាក់ក្នុងចំណោមមនុស្ស១០នាក់នៅស៊ីមបាវ៉េ កំពុងស្ថិតក្នុងស្ថានភាពទីទ័លក្រ។
ចំណែកឯ កូនៗរបស់លោកស្រី Grace និងលោកប្រធានាធិបតី ក៏មិនខុសគ្នាប៉ុន្មានដែរទៅនឹងម្ដាយរបស់ពួកគេដែរ។ កូនពៅបង្អស់ឈ្មោះ Chatunga ធ្លាប់បានបង្ហោះវីដេអូនៅលើ Snapchat បង្ហាញពីការចាក់ស្រាល្បីម៉ាក Armand de Brignac Champagne តម្លៃជាង២០០ដុល្លារចោលលើនាឡិកាមួយខ្សែតម្លៃមិនតិចជាង ៦ម៉ឺនដុល្លារឡើយ។ Chatunga ថែមទាំងអួតថា ខ្លួនមានសមត្ថភាពទិញនាឡិកានេះ ក៏ព្រោះតែមានឪពុកជាអ្នកដឹកនាំប្រទេសទាំងមូល។
គួររំលឹកថា កាលពីថ្មីៗនេះ មានរដ្ឋប្រហារយោធាមួយបានកើតឡើងនៅក្នុងប្រទេសស៊ីមបាវ៉េ ដែលបច្ចុប្បន្ននេះលោកស្រី Grace និងស្វាមី Robert Mugabe កំពុងត្រូវយោធាឃាត់ខ្លួនទុកនៅផ្ទះ៕