គ.ជ.ប លើកឡើងបញ្ហា ៥ ដែលនាំឲ្យអ្នកចុះឈ្មោះបោះឆ្នោតថ្មី តិចជាងការប៉ាន់ស្មាន

2017-11-17 07:46:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសថា អ្នកបោះឆ្នោតថ្មី ចាប់ពីថ្ងៃទី១ ខែកញ្ញា ដល់ថ្ងៃទី៩ ខែវិច្ឆិកា ឆ្នាំ២០១៧ មានចំនួនជាង ៥៣ម៉ឺននាក់ ត្រូវជា ៣៣% នៃចំនួនអ្នកគ្រប់អាយុចុះឈ្មោះបោះឆ្នោត ដែល គ.ជ.ប ប៉ាន់ស្មានថាមានចំនួន ជាង ១,៦២លាននាក់។

ប្រជាពលរដ្ឋទៅចុះឈ្មោះបោះឆ្នោតនាពេលកន្លងមក

លោក ឯម សូផាត សមាជិក គ.ជ.ប បានលើកឡើងក្នុងសន្និសីទកាសែតនាព្រឹកថ្ងៃទី១៧ ខែវិច្ឆិកានេះថា មូលហេតុដែលធ្វើឲ្យមានអ្នកចុះឈ្មោះបោះឆ្នោតតិច គឺមាន ៥ចំណុច ដូចខាងក្រោម៖

១. ប្រជាពលរដ្ឋជាច្រើន មានទីលំនៅ ឬទីសំណាក់ច្រើនជាង ១កន្លែង ដែលអាជ្ញាធរឃុំសង្កាត់ បានស្រង់ស្ថិតិស្ទួនគ្នា

២. ប្រជាពលរដ្ឋចំណាកស្រុកច្រើនបង្គួរ ទាំងចំណាកស្រុកក្នុងប្រទេស ទាំងចំណាកស្រុកក្រៅប្រទេស ដែលពុំបានចុះឈ្មោះបោះឆ្នោត

៣. ប្រជាពលរដ្ឋមួយចំនួនទៀត ក៏មិនអាចអញ្ជើញទៅចុះឈ្មោះបោះឆ្នោតបានដែរ ដូចជា អ្នកកំពុងស្ថិតក្នុងស្ថានភាពជាប់ពន្ធនាគារ អ្នកកំពុងសម្រាកព្យាបាលជំងឺនៅតាមមន្ទីរពេទ្យ ជនចាស់ជរា និងជនមានពិការភាព ជាដើម។

៤. ការចុះឈ្មោះបោះឆ្នោត និងការបោះឆ្នោត នៅព្រះរាជាណាចក្រកម្ពុជា ផ្អែកលើគោលការណ៍ស្ម័គ្រចិត្ត ដែលហេតុនេះ ប្រជាពលរដ្ឋមានសិទ្ធិបោះឆ្នោតមួយចំនួន ពុំសូវយកចិត្តទុកដាក់ក្នុងការចុះឈ្មោះបោះឆ្នោត បើទោះបីជាមានការជម្រុញ និងបង្កលក្ខណៈងាយស្រួលគ្រប់បែបយ៉ាង យ៉ាងណាក៏ដោយ។

៥. ការចុះឈ្មោះបោះឆ្នោត ធ្វើឡើងនៅរដូវវស្សា មានភ្លៀងធ្លាក់ខ្លាំងញឹកញាប់ បង្កជាជំនន់ទឹកភ្លៀង នៅតំបន់មួយចំនួន។

លោក ឯម សូផាត (រូបភាព គជប)

សរុបទាំងអ្នកចុះឈ្មោះថ្មី ចំនួនអ្នកមានឈ្មោះក្នុងបញ្ជីបោះឆ្នោត គឺមានចំនួន ជាង ៨,៣៨លាននាក់។

សូមបញ្ជាក់បញ្ជីបោះឆ្នោត ឆ្នាំ២០១៧ ដែល គ.ជ.ប កំពុងធ្វើបច្ចុប្បន្នភាពនៅពេលនេះ នឹងត្រូវប្រើប្រាស់ក្នុងការបោះឆ្នោតជ្រើសតាំងតំណាងរាស្ត្រ អាណត្តិទី៦ ដែលគ្រោងនឹងធ្វើឡើង នៅថ្ងៃទី២៩ ខែកក្កដា ឆ្នាំ២០១៨៕

អត្ថបទ៖ លីហៀង