រដ្ឋសភា អនុម័តសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៨
- 2017-11-17 09:23:24
- ចំនួនមតិ 0 | ចំនួនចែករំលែក 0
រដ្ឋសភា អនុម័តសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៨
ចន្លោះមិនឃើញ
រដ្ឋសភាបានបន្តសម័យប្រជុំលើកទី៩ នីតិកាលទី៥ កាលពីព្រឹកថ្ងៃទី១៧ ខែវិច្ឆិកា ឆ្នាំ២០១៧ ដោយបានលើកយករបៀបវារៈចំនួន៥ មកពិភាក្សាអនុម័ត ក្នុងនោះរបៀបវារៈដែលសំខាន់ គឺសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៨ និងទូទាត់ថវិកាជាតិឆ្នាំ២០១៦។
បន្ទាប់ពីសម័យប្រជុំរដ្ឋសភាបានពិភាក្សា និងមានការសួដេញដោលតំណាងក្រសួងសេដ្ឋកិច្ច និងហិរញ្ញវត្ថុ រួចមក រដ្ឋសភាបានអនុម័តលើសេចក្តីព្រាងច្បាប់ស្តីពីហរិញ្ញវត្ថុសម្រាប់ការគ្រប់គ្រងឆ្នាំ២០១៨ ដោយសំឡេង ៦៥លើ ៦៥សំឡេង។ សមាជិកទាំង៦៥រូប គឺមកពីគណបក្សប្រជាជនកម្ពុជា។
លោក ជាម យៀប ប្រធាគណៈកម្មការទី២ រដ្ឋសភា បានបញ្ជាក់ថា ឆ្នាំ២០១៨ គឺជាឆ្នាំសំខាន់ដែលមានព្រឹត្តិការណ៍ជាតិសំខាន់រួមមាន៖ ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤។ ការបោះឆ្នោតសមាជិករដ្ឋសភានីតិកាលទី៦ និងការដំឡើងប្រាក់ខែជូនមន្ត្រីរាជការ កងកម្លាំងប្រដាប់អាវុធគ្រប់ប្រទេសព្រមទាំងការបន្តការអភិវឌ្ឍប្រទេសជាតិ។
កញ្ចាប់ថវិកាជាតិឆ្នាំ២០១៨ រាជរដ្ឋាភិបាលកម្ពុជា បានបង្កើនថវិកាដល់ស្ថាប័នសំខាន់មួយចំនួន ដែលរួមមានក្រសួងការពារជាតិ កសិកម្ម ការអភិវឌ្ឍជនបទ សុខាភិបាល អប់រំ សាធារណការ និងដឹកជញ្ជូន វិស័យយុត្តិធម៌ និងវិស័យសង្គមកិច្ច ការបណ្តុះបណ្តាលវិជ្ជាជីវៈជាដើម។
លោកបន្តថា វិស័យសំខាន់មួយចំនួនដែលបានជំរុញឲ្យសេដ្ឋកិច្ចជាតិមានកំណើនជាង ៧% រួមមាន៖ វិស័យឧស្សាហកម្មកាត់ដេរ និងផលិតផលស្បែកជើងកសិកម្ម ទេសចរណ៍ វិស័យសំណង់ និងការប្រមូលពន្ធអាករ៕