សម្តេច ស ខេង បញ្ជាឲ្យរុះរើស្លាកគណបក្សសង្គ្រោះជាតិ ជាបន្ទាន់
- 2017-11-17 12:14:42
- ចំនួនមតិ 0 | ចំនួនចែករំលែក 0
សម្តេច ស ខេង បញ្ជាឲ្យរុះរើស្លាកគណបក្សសង្គ្រោះជាតិ ជាបន្ទាន់
ចន្លោះមិនឃើញ
សម្តេច ស ខេង រដ្ឋមន្ត្រីក្រសួងមហាផ្ទៃ បានបញ្ជាឲ្យអាជ្ញាធររាជធានី-ខេត្តទូទាំងប្រទេស រុះរើស្លាកគណបក្សសង្គ្រោះជាតិ នៅតាមទីសាធារណៈ និងនៅតាមទីស្នាក់ការ ដោយសារតែគណបក្សនេះ ត្រូវបានតុលាការកំពូលរំលាយកាលពីថ្ងៃទី១៦ ខែវិច្ឆិកា ឆ្នាំ២០១៧។ នេះបើយោងតាមលិខិតចុះថ្ងៃទី១៧ ខែវិច្ឆិកា ឆ្នាំ២០១៧ របស់សម្តេច ស ខេង បានជម្រាបទៅអភិបាល និងជាប្រធានគណៈបញ្ជាការឯកភាពរដ្ឋបាលរាជធានី-ខេត្ត ស្តីពីការអនុវត្តសាលដីការបស់តុលាការកំពូលស្តីពីការរំលាយគណបក្សសង្គ្រោះជាតិ។
ត្រូវផ្សព្វផ្សាយអប់រំ ណែនាំដល់ប្រជាពលរដ្ឋ ដើម្បីអនុវត្តនូវសាលដីការបស់តុលាការកំពូល ដែលបានរំលាយគណបក្សសង្គ្រោះជាតិ។
ត្រូវបង្កើនការយកចិត្តទុកដាក់ក្នុងការគ្រប់គ្រង ការរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈក្នុងរាជធានី-ខេត្តនីមួយៗ។
ចំពោះស្នាក់ការរបស់គណបក្សសង្គ្រោះជាតិ ដែលមាននៅរាជធានី-ខេត្តនីមួយៗ ត្រូវណែនាំឲ្យទម្លាក់ស្លាកបដា ពាក្យស្លោកផ្សេងៗ ហើយមិនត្រូវធ្វើសកម្មភាពនានាពាក់ព័ន្ធនឹងគណបក្សសង្គ្រោះជាតិ ដែលត្រូវបានរំលាយដោយតុលាការកំពូលហើយ។
ត្រូវណែនាំដល់ម្ចាស់លំនៅឋាន អគារ សំណង់នានាឲ្យធ្វើការដកចេញនូវស្លាកសញ្ញានានារបស់អតីតគណបក្សសង្គ្រោះជាតិ ពីលំនៅឋាន អគារ សំណង់នានារបស់ខ្លួនជាបន្ទាន់។
ចំពោះស្លាកសញ្ញានៅតាមទីសាធារណៈ អាជ្ញាធរមានសមត្ថកិច្ចត្រូវចាត់វិធានការរុះរើចេញជាបន្ទាន់៕