រដ្ឋមន្រ្តីទេសចរណ៍ ដាក់ចេញផែនការ ត្រៀមរៀបចំបុណ្យសមុទ្រខែក្រោយ
- 2017-11-19 03:14:57
- ចំនួនមតិ 0 | ចំនួនចែករំលែក 0
រដ្ឋមន្រ្តីទេសចរណ៍ ដាក់ចេញផែនការ ត្រៀមរៀបចំបុណ្យសមុទ្រខែក្រោយ
ចន្លោះមិនឃើញ
លោក ថោង ខុន រដ្ឋមន្រ្តីក្រសួងទេសចរណ៍ និងជាប្រធានគណៈកម្មការដើម្បីត្រៀមរៀបចំបុណ្យសមុទ្រ ឆ្នាំ២០១៧ បានដាក់អនុសាសន៍ជំរុញឲ្យគ្រប់ភាគីពាក់ព័ន្ធពន្លឿនកិច្ចការនានា ឲ្យបានចប់រួចរាល់មុនថ្ងៃទី០១ ខែធ្នូ ឆ្នាំ២០១៧។ ការជំរុញពន្លឿនកិច្ចការត្រៀមរៀបចំបុណ្យសមុទ្រ ត្រូវបានធ្វើឡើងក្នុងកិច្ចប្រជុំត្រៀមរៀបចំបុណ្យសមុទ្រ នៅសាលាខេត្តកែប កាលពីពេលថ្មីៗនេះ។
១. អាជ្ញាធរខេត្តត្រូវពន្លឿនការរៀបចំកែលម្អសោភ័ណភាពក្រុងកែបឱ្យបានស្អាត រៀបចំបង្គន់អនាម័យសាធារណៈ បង្គន់ចល័តឱ្យបានគ្រប់គ្រាន់ និងត្រូវសម្អាតអនាម័យជាប្រចាំ។ ត្រូវជំរុញរៀបចំហេដ្ឋារចនាសម្ព័ន្ធនានាក្នុងខេត្ត ឲ្យបានរួចរាល់ទាន់ពេលវេលា សម្រាប់រៀបចំពិធីបុណ្យសមុទ្រ ឆ្នាំ២០១៧។
២. ចុះអប់រំបណ្តុះបណ្តាល និងពង្រឹងគុណភាពសេវាកម្មទេសចរណ៍នានា និងបញ្ហាអនាម័យដល់អាជីវករ និងប្រជាពលរដ្ឋ ដើម្បីបម្រើទេសចរជាតិ និងអន្តរជាតិ ក្នុងឱកាសពិធីបុណ្យសមុទ្រ ឆ្នាំ២០១៧ ឲ្យបានពេញចិត្ត ពិសេសសេវាម្ហូបអាហារ និងកន្លែងស្នាក់នៅ។ គ្រប់ភោជនីយដ្ឋានទាំងអស់ មិនត្រូវឲ្យភ្ញៀវបោះសំរាមចោលក្រោមតុនោះឡើយ។
៣. ត្រូវខិតខំបំផុស និងណែនាំប្រជាពលរដ្ឋក្នុងខេត្តឲ្យរៀបចំ និងតុបតែងគេហដ្ឋានរបស់ខ្លួនឲ្យបានស្អាត សម្រាប់ជួលឲ្យភ្ញៀវជាតិ និងអន្តរជាតិដែលមកចូលរួមពិធីបុណ្យសមុទ្រ ឆ្នាំ២០១៧ ចូលស្នាក់នៅ សំដៅទាញផលចំណេញឲ្យបានដល់ដៃប្រជាពលរដ្ឋផ្ទាល់។
៤. ត្រូវរៀបចំអភិវឌ្ឍផលិតផលទេសចរណ៍ថ្មីៗឲ្យបានច្រើន ដើម្បីបម្រើ និងទាក់ទាញទេសចរជាតិ និងអន្តរជាតិ មកចូលរួមក្នុងពិធីបុណ្យសមុទ្រ ឆ្នាំ២០១៧ ឲ្យបានច្រើនកុះករ។
៥. ត្រូវរៀបចំទស្សនីយភាពសិល្បៈ ពិព័រណ៍ភ្លើង សួនភ្លើងក្រោមទឹក ការបង្ហាញ សិល្បៈភ្លើងរាំ ការតាំងពិព័រណ៍ផលិតផលទេសចរណ៍ ពាណិជ្ជកម្ម សកម្មភាពកីឡា ការបោះតង់ និងកម្មវិធីសម្អាតឆ្នេរឲ្យបានល្អ និងអញ្ជើញបណ្តាខេត្តជាប់សមុទ្រទាំង៤ និងខេត្តជាសម្ព័ន្ធមិត្តចូលរួមសម្តែងផងដែរ។ ចំពោះកម្មវិធីកីឡានេះទៀតសោត ត្រូវរៀបចំប្រភេទកីឡាលើទឹក និងលើឆ្នេរឱ្យបានច្រើន ដូចជា ទូកក្តោង ម៉ូតូទឹក និងត្រូវរៀបចំព្យុហយាត្រាឱ្យបានល្អ។
៦. ត្រូវខិតខំយកចិត្តទុកដាក់ការពារ និងរក្សាសន្តិសុខ សុវត្ថិភាព និងសណ្តាប់ធ្នាប់ឲ្យបានល្អប្រសើរ ក្នុងឱកាសពិធីបុណ្យសមុទ្រ ឆ្នាំ២០១៧។
៧. ត្រៀមរថយន្តសង្គ្រោះ ត្រៀមស្ដង់ពេទ្យប្រចាំការ និងត្រៀមអ្នកសង្គ្រោះបឋមឲ្យបានគ្រប់គ្រាន់ ដើម្បីត្រៀមជួយសង្គ្រោះជនរងគ្រោះដោយប្រការណាមួយ ក្នុងឱកាសពិធីបុណ្យសមុទ្រ។.
៨. ត្រូវរៀបចំឲ្យមានបញ្ជរព័ត៌មានបង្ហាញប្រាប់ប្រជាពលរដ្ឋ និងភ្ញៀវទេសចរអំពីពេលវេលា និងទីកន្លែងរៀបចំកម្មវិធីកម្សាន្តនីមួយៗ រៀបចំឲ្យមានស្ដង់កម្លាំងប្រចាំការ។
៩. ត្រូវរៀបចំបង្កើតក្រុមយុវជនស្ម័គ្រចិត្ត ដើម្បីជួយដើរសម្អាតបរិស្ថាន ក៏ដូចជាជួយរើសសំរាមក្នុងឱកាសបុណ្យសមុទ្រ ដើម្បីបង្ហាញ និងដាស់ស្មារតីដល់ប្រជាពលរដ្ឋ និងភ្ញៀវទេសចរឲ្យភ្ញាក់រលឹកពីបញ្ហាសំរាមនេះ។
លោករដ្ឋមន្រ្តីបានឲ្យដឹងថា មន្ទីរ-អង្គភាព និងភាគីពាក់ព័ន្ធក៏ត្រូវពន្លឿនការរៀបចំរមណីយដ្ឋានទេសចរណ៍នានា កែលម្អសោភ័ណភាពនៅតាមដងផ្លូវ និងក្នុងទីធ្លាសាធារណៈនានា ចំណែកសហគមន៍ទេសចរណ៍ ក៏ត្រូវត្រៀមលក្ខណៈឲ្យបានទាន់ពេលវេលា ដើម្បីទទួលទេសចរឲ្យបានល្អផងដែរ។
ពិធីបុណ្យសមុទ្រត្រូវបានប្រារព្ធឡើងចំនួន ៥លើក រួចមកហើយ ហើយការប្រារព្ធឡើងជាថ្មីនៅខេត្តកែបនេះ នឹងធ្វើឡើងរយៈពេល ៣ថ្ងៃ ចាប់ពីថ្ងៃទី២២-២៣-២៤ ខែធ្នូ ឆ្នាំ២០១៧ ក្រោមប្រធានបទ «ឆ្នេរសមុទ្របៃតង៖ បច្ចុប្បន្ន គឺអនាគត» និរន្តរភាពទេសចរណ៍ ដើម្បីការអភិវឌ្ឍ៕