គ.ជ.ប ជូនដំណឹងទៅគណបក្ស៦ អំពីការចាត់ចែងបែងចែកអាសនៈ ដែលនៅទំនេរ

2017-11-19 04:48:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណៈកម្មាធិការជាតិរៀបចំការបោះឆ្នោត (គ.ជ.ប) បានចេញលិខិតជូនដំណឹងទៅគណបក្សនយោបាយចំនួន៦ កាលពីថ្ងៃទី១៨ ខែវិច្ឆិកា ឆ្នាំ២០១៧ម្សិលមិញ អំពីការផ្តល់ព័ត៌មានចំបាច់មួយចំនួន ដើម្បី គ.ជ.ប ចាត់ចែងអនុវត្តបែងចែកអាសនៈ ដែលនៅទំនេរទៅតាមច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ។

យោងតាមសេចក្តីប្រកាសព័ត៌មានរបស់ គ.ជ.ប បានឲ្យដឹងថា គណបក្សនយោបាយចំនួន៦ ដែលត្រូវបែងចែកអាសនៈ រួមមាន៖ ១.គណបក្សហ៊្វុនស៊ិនប៉ិច ២.គណបក្សសម្ព័ន្ធដើម្បីប្រជាធិបតេយ្យ ៣.គណបក្សខ្មែរអភិវឌ្ឍន៍សេដ្ឋកិច្ច ៤.គណបក្សខ្មែរឈប់ក្រ ៥.គណបក្សសញ្ជាតិកម្ពុជា និងទី៦. គណបក្សសាធារណរដ្ឋប្រជាធិបតេយ្យ។

លិខិតជូនដំណឹងនេះ គ.ជ.ប បានជម្រាបជូនទៅដល់គណបក្សនយោបាយចំនួន៥ រួចហើយ កាលពីថ្ងៃទី១៨ ខែវិច្ឆិកា ឆ្នាំ២០១៧។ ដោយឡែកគណបក្សសាធារណរដ្ឋប្រជាធិបតេយ្យ ពុំទាន់បានទទួលលិខិតជូនដំណឹងនេះនៅឡើយទេ ដោយសារគណៈកម្មាធិការជាតិរៀបចំការបោះឆ្នោត ទំនាក់ទំនងមិនបាន ហើយទីស្នាក់ការគណបក្សបិទទ្វារ មិនមានអ្នកប្រចាំការ។

គ.ប.ប បានបញ្ជាក់ថា បើសិនជាគណបក្សសាធារណរដ្ឋប្រជាធិបតេយ្យ ទទួលបានព័ត៌មាននេះ សូមទាក់ទងមក គ.ជ.ប ដើម្បីបំពេញនូវព័ត៌មានអំពីបេក្ខជន ក្នុងនីតិកាលទី៥ នៃការបោះឆ្នោតជ្រើសតាំងតំណាងរាស្ត្រ ឆ្នាំ២០១៣ របស់គណបក្សសាធារណរដ្ឋប្រជាធិបតេយ្យ ផ្ញើជូនមក គ.ជ.ប ឲ្យបានទាន់ពេលវេលាជាកំហិត៕

អត្ថបទ៖ សោភា