ចាប់បានសាច់មាន់ខូចគុណភាពជិត១តោន បម្រុងដឹកទៅលក់តាមភោជនីយដ្ឋាន

2017-11-21 02:45:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សាច់មាន់ខូចគុណភាពជិត១តោន ត្រូវបានកម្លាំងនគរបាលប្រឆាំងបទល្មើសសេដ្ឋកិច្ចខេត្តធ្វើការឃាត់ទុក នៅវេលាម៉ោង១២ និង៤០នាទីថ្ងៃទី២០ ខែវិច្ឆិកា ឆ្នាំ២០១៧ នៅតាមបណ្ដោយផ្លូវជាតិលេខ៥ ស្ថិតក្នុងភូមិ/សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។

លោកវរសេនីយ៍ត្រី ម៉ី ប៉ូរ៉ាន់ នាយផ្នែកនៃការិយាល័យប្រឆាំងបទល្មើសសេដ្ឋកិច្ចខេត្តបន្ទាយមានជ័យ បានប្រាប់ថា ម្ចាស់រថយន្តដែលដឹកសាច់មាន់ខូចគុណភាពមានឈ្មោះ ហួត សំបូរ ភេទប្រុស អាយុ២៤ឆ្នាំ រស់នៅភូមិណាកាឆាយ ឃុំកូប ស្រុកអូរជ្រៅ ខេត្តបន្ទាយមានជ័យ។ ក្នុងប្រតិបត្តិការបង្ក្រាបខាងលើ កម្លាំងនគរបាលធ្វើការឃាត់ទុកបានសាច់មាន់ខូចគុណភាពចំនួន ១០០ថង់ ស្មើនឹង ៨៥០គីឡូក្រាម ដោយក្នុងនោះមានទ្រូងមាន់ ភ្លៅមាន់ កោះមាន់ ថ្លើមមាន់ និងជើងមាន់។

លោកវរសេនីយ៍ត្រី រស់ អៀម នាយរងការិយាល័យប្រឆាំងបទល្មើសសេដ្ឋកិច្ចខេត្ត បានបញ្ជាក់ថា ក្រោយឃាត់បាន ម្ចាស់រថយន្តបានឆ្លើយសារភាពថា សាច់មាន់ខូចគុណភាពនេះត្រូវបាននាំចូលពីប្រទេសថៃ តាមច្រករបៀងអូរបីជាន់ ដោយមានការបង់ថ្លៃជូនកម្លាំងយោធាច្រករបៀង១ឡាន ៤ម៉ឺនរៀល។ ចំណែកឯទិសដៅនាំចូលគឺដឹកទៅខេត្តបាត់ដំបង ដើម្បីដាក់លក់តាមភោជនីយដ្ឋាន ១គីឡូក្រាម តម្លៃប្រមាណ ៤០០០រៀល៕