Chanathip អាចផ្លាស់ទៅ Leicester បាន តែត្រូវបំពេញលក្ខខណ្ឌសំខាន់២

2017-11-21 12:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាលពីពេលថ្មីៗនេះ សារព័ត៌មាននានាបានចុះផ្សាយថា ប្រធានក្លឹបកញ្ជ្រោង Leicester City លោក Vichai Srivaddhanaprabha ដែលជាជនជាតិថៃ កំពុងចាប់អារម្មណ៍កីឡាករឆ្នើម Chanathip Songkrasin ដើម្បីនាំយកទៅលេងនៅលីគកំពូលអង់គ្លេស ខណៈខ្សែបម្រើរូបនេះបច្ចុប្បន្ន កំពុងប្រកបអាជីពនៅក្លឹប Consadole Sapporo នៃលីគកំពូលជប៉ុន។

Chanathip Songkrasin

នៅជប៉ុន Chanathip បានចូលលេងស្ទើរគ្រប់ការប្រកួត ទោះបីរូបគេជាកីឡាករដែលត្រូវបានខ្ចីជើងពីក្លឹបថៃ Maungthong United ត្រឹមតែ១៨ខែក៏ដោយ។ ការបង្ហាញសមត្ថភាពដ៏ល្អនេះ បានធ្វើឲ្យកីឡាករដែលមានរហស្សនាមថា "Messi Jay” ស្ថិតក្នុងក្រសែភ្នែកប្រធានក្លឹប Leicester ដើម្បីផ្ដល់ឱកាសសម្រាប់រូបគេចូលរួមជាមួយក្លឹបរបស់លោក។

យ៉ាងណាមិញ គេសង្កេតឃើញថា វាជារឿងដ៏លំបាកមួយសម្រាប់កីឡាករមកពីអាស៊ីអាគ្នេយ៍ម្នាក់នេះ លេងនៅក្របខ័ណ្ឌ English Premier League ដោយសារកត្តាចម្បង ២។

ទី១- តាមច្បាប់ដ៏តឹងរឹងរបស់ចក្រភពអង់គ្លេស កីឡាករដែលអាចលេងនៅលីគកំពូលរបស់ខ្លួនបាន លុះត្រាតែកីឡាកររូបនោះជាប់ជាកីឡាករជម្រើសជាតិ។ ម្យ៉ាងទៀត ថៃជាក្រុមដែលមានចំណាត់ថ្នាក់ជាង ១០០ឯណោះ ដូច្នេះតម្រូវឲ្យកីឡាករ Chanathip បង្ហាញខ្លួនលេងឲ្យជម្រើសជាតិយ៉ាងហោចណាស់ ៧៥ភាគរយ នៃចំនួនការប្រកួតសរុបរបស់ក្រុមជម្រើសជាតិថៃ ដោយគិតត្រឹមរយៈពេល ២ឆ្នាំចុងក្រោយ។

ទី២- ក្លឹប ត្រូវសុំការអនុញ្ញាតឲ្យកីឡាករដែលខ្លួនទិញ ដើម្បីទទួលបានសិទ្ធិប្រកបការងារនៅអង់គ្លេស។ ហើយកីឡាករនោះ ត្រូវគេមើលឃើញថា នឹងអាចរួមចំណែកជួយដល់ការអភិវឌ្ឍវិស័យបាល់ទាត់ ក្នុងកម្រិតខ្ពស់បំផុត។

សូមបញ្ជាក់ថា បច្ចុប្បន្ន ក្លឹប Leicester មានកីឡាករមកពីអាស៊ីអាគ្នេយ៍ម្នាក់ គឺកីឡាករ Faiq Bolkiah ដែលជាព្រះរាជបុត្រាមកពីប្រទេសព្រុយណេ។

កាលពីឆ្នាំ២០០៧ ក្រោមការគ្រប់គ្រងរបស់អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ក្លឹបបាល់ទាត់ Manchester City បាននាំយកកីឡាករសញ្ជាតិថៃ Teerasil Dangda, Kiatprawut Saiwaeo និង Suree Kukha ចូលរួមក្រុមរបស់ខ្លួន តែមិនមានកីឡាកររូបណាក្នុងចំណោមពូកគេបានលេងក្នុងការប្រកួតផ្លូវការរបស់ Man City ឡើយ៕

ប្រភព៖ Goal | reevaldo ប្រែសម្រួល៖ លាភ.