សម្តេច ស ខេង៖ អាមេរិកដាក់ទណ្ឌកម្មទិដ្ឋាការ ជាសិទ្ធិរបស់អាមេរិក

2017-12-07 03:34:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ស ខេង រដ្ឋមន្រ្តីក្រសួងមហាផ្ទៃ បានបញ្ជាក់នៅព្រឹកថ្ងៃទី០៧ ខែធ្នូ បន្ទាប់ពីបញ្ចប់កិច្ចប្រជុំរដ្ឋសភាថា ការដាក់ទណ្ឌកម្មផ្នែកទិដ្ឋាការលើមន្ត្រីជាន់ខ្ពស់កម្ពុជា គឺជាសិទ្ធិរបស់សហរដ្ឋអាមេរិក។ ការលើកឡើងនេះ បន្ទាប់ពីអាមេរិកបានសម្រេចដាក់ទណ្ឌកម្មផ្នែកទិដ្ឋាការលើមន្ត្រីជាន់ខ្ពស់កម្ពុជា និងសមាជិកក្រុមគ្រួសារ បន្ទាប់ពីគណបក្សសង្គ្រោះជាតិ ត្រូវបានតុលាការកំពូលរំលាយចោល និងមេដឹកនាំបក្សនេះ កំពុងតែជាប់ពន្ធនាគារនៅឡើយ។

សម្តេច ស ខេង ថ្លែងទៅកាន់អ្នកកាសែត នៅរដ្ឋសភា នាពេលកន្លងមក

អ្នកនាំពាក្យក្រសួងការបរទេសអាមេរិក កាលពីថ្ងៃទី៦ ខែធ្នូ បានប្រកាសថា ក្រសួងការបរទេសអាមេរិក នឹងរឹតបន្តឹងលើការជាន់ទឹកដីអាមេរិក សម្រាប់បុគ្គលទាំងឡាយ ដែលអាមេរិកគិតថា បានជាប់ពាក់ព័ន្ធនឹងការបំផ្លាញប្រជាធិបតេយ្យនៅកម្ពុជា។ សមាជិកក្រុមគ្រួសារបុគ្គលទាំងឡាយដែលត្រូវបានហាមឃាត់នោះ ក៏ស្ថិតនៅក្រោមការរឹតបន្តឹងផ្នែកទិដ្ឋាការផងដែរ។

រដ្ឋបាលប្រធានាធិបតីអាមេរិក លោក ដូណាល់ ត្រាំ បានសម្រេចចាត់វិធានការបែបនេះប្រឆាំងនឹងមន្ត្រីជាន់ខ្ពស់កម្ពុជា ដើម្បីឆ្លើយតបទៅនឹងវិធានការថ្មីៗរបស់រដ្ឋាភិបាលកម្ពុជា ដែលបានបំផ្លាញវឌ្ឍនភាពប្រជាធិបតេយ្យ និងការគោរពសិទ្ធិមនុស្ស។ ជាមួយគ្នានោះ ក្រសួងការបរទេសអាមេរិក បានអំពាវនាវទៅរដ្ឋាភិបាលកម្ពុជា ឲ្យផ្លាស់ប្ដូរជំហររបស់ខ្លួន តាមរយៈការអនុញ្ញាតឲ្យគណបក្សប្រឆាំងចូលប្រឡូកក្នុងឆាកនយោបាយឡើងវិញ ការដោះលែងលោក កឹម សុខា និងការអនុញ្ញាតឲ្យអង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យដំណើរការឡើងវិញ។

ក្រសួងការបរទេសអាមេរិក បានបញ្ជាក់ថា រដ្ឋបាលប្រធានាធិបតី លោក ដូណាល់ ត្រាំ នឹងបន្តតាមដានស្ថានការណ៍នៅកម្ពុជា និងចាត់វិធានការបន្ថែមទៀត ខណៈដែលអាមេរិកបន្តទំនាក់ទំនងជាមួយប្រជាជនកម្ពុជា៕

អត្ថបទ៖ សោភា