FA ជីកកកាយរឿងវាយតប់គ្នារវាង Man Utd និង Man City នៅបន្ទប់ផ្លាស់ខោអាវ

2017-12-12 03:48:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហព័ន្ធកីឡាបាល់ទាត់អង់គ្លេស (FA) បានផ្ញើលិខិតពីរផ្សេងគ្នា ទៅកាន់ក្លឹប Manchester United និង Manchester City ដើម្បីស្នើសុំការបំភ្លឺ ពីបញ្ហាប៉ះទង្គិចគ្នានៅបន្ទប់ផ្លាស់សម្លៀកបំពាក់រវាងភាគីទាំងសង្ខាង ក្រោយបញ្ចប់ការប្រកួត ដែល Man Utd ចាញ់ Man City ដោយលទ្ធផល ១-២ កាលពីថ្ងៃអាទិត្យកន្លងទៅ។

Man City អបអរក្រោយយកឈ្នះ Man Utd ១-២

ចំពោះករណីនេះ អាជ្ញាកណ្ដាលកាត់សេចក្ដីក្នុងទីលាន លោក Michael Oliver មិនបានផ្ញើលិខិតទៅកាន់ FA ចំពោះករណីវាយតប់គ្នានោះទេ ព្រោះលោកមិនបានស្ថិតនៅទីនោះ។ FA បានកំណត់ឲ្យក្លឹបទាំងពីរ បកស្រាយបំភ្លឺ មុនម៉ោង ៦ ល្ងាច ថ្ងៃពុធ ទី១៣ ខែធ្នូ ឆ្នាំ២០១៧ ហើយក៏ទំនងជាបើកការស៊ើបអង្កេតលើករណីនេះផងដែរ។

កីឡាករ និងគ្រូបង្វឹក ប្រហែល ១៥នាក់ ត្រូវបានរាយការណ៍ថា បានវាយតប់គ្នានៅជិតបន្ទប់ផ្លាស់សម្លៀកបំពាក់ ដោយសារ Man City ស្រែកអបអរនិងចាក់ភ្លេងឭៗ ក្នុងបន្ទប់របស់ពួកគេ បណ្ដាលឲ្យប៉ះពាល់ដល់កីឡាករ Man United នៅស្ថិតនៅក្នុងបន្ទប់ក្បែរៗគ្នានោះ។

លោក Jose Mourinho អ្នកចាត់ការក្រុមបិសាចក្រហម Man Utd បានដើរចូលទៅកាន់បន្ទប់របស់ Man City ដើម្បីប្រាប់ឲ្យកីឡាករទាំងអស់បន្ថយសំឡេងតម្ត្រី តែត្រូវអ្នកចាំទី Ederson របស់ក្រុមមេឃខៀវ ចេញមករារាំង។ អំពើហិង្សាបានកើតឡើង ក្រោយប៉ះទង្គិចពាក្យសម្ដី ដែលបណ្ដាលឲ្យកីឡាករ នាំគ្នាគប់ដបទឹកដាក់ Mourinho ហើយឈានដល់កម្រិតធ្ងន់ធ្ងរ រហូតធ្វើឲ្យគ្រូជំនួយ Man City លោក Mikel Arteta ត្រូវរបួសបែកក្បាល៕