ប៉ាក់គីអៅខ្មែរ លាតត្រដាងពីប្រវត្តិដ៏កម្សត់រហូតទទួលជោគជ័យ
- 2017-12-14 04:07:23
- ចំនួនមតិ 0 | ចំនួនចែករំលែក 0
ប៉ាក់គីអៅខ្មែរ លាតត្រដាងពីប្រវត្តិដ៏កម្សត់រហូតទទួលជោគជ័យ
ចន្លោះមិនឃើញ
ប៉ោយ ឈុនលី គឺជាឈ្មោះផលិតករខ្មែរម្នាក់ ដែលមានជំនាញផលិតភាពយន្តគំនូរជីវចល ឬ Animation ដោយមុខមាត់របស់ផលិតកររូបនេះ ស្រដៀងគ្នានឹងកីឡាករប្រដាល់ល្បីឈ្មោះ ម៉ានី ប៉ាក់គីអៅ របស់ប្រទេសហ្វីលីពីន។ លោក ប៉ោយ ឈុនលី មានស្រុកកំណើតនៅខេត្តបាត់ដំបង។
ដើមឡើយ លោកជាកូនកសិករក្រីក្រម្នាក់។ ដោយសារគ្រួសារខ្វះខាតខ្លាំងពេក លោកត្រូវបង្ខំចិត្តឈប់រៀនបន្ទាប់ពីប្រឡងជាប់សញ្ញាប័ត្រឌីប្លូម។ ពេលនោះក៏មានអ្នកអូសទាញរូបលោកឱ្យទៅធ្វើការនៅប្រទេសថៃ តែផលិតករម្នាក់នេះសុខចិត្តទ្រាំលំបាកតស៊ូរស់នៅដោយខ្វះខាត និងជិះកង់ចម្ងាយជាង ២០គីឡូម៉ែត្ររាល់ថ្ងៃ ដើម្បីទៅរៀនសិល្បៈគំនូរនៅសាលាបណ្តុះបណ្តាលវិជ្ជាជីវៈផ្នែកគំនូរ និងសូនរូប ដែលបច្ចុប្បន្ន មានឈ្មោះថា សាលាហ្វារពន្លឺសិល្បៈ ស្ថិតក្នុងខេត្តបាត់ដំបង។
ក្នុងនាមជាកូនប្រុសច្បងក្នុងគ្រួសារ ដែលមានប្អូនប្រុសស្រីដល់ទៅ៧នាក់ទៀត វាពិតជាបន្ទុកដ៏ធំមែន ដែលបង្ខំឱ្យរូបលោកត្រូវចាកចេញពីគ្រួសារតាំងពីអាយុជាង ១០ឆ្នាំ ទៅរស់នៅជាមួយដូនចាស់ ដែលមានរបបលក់នំបន្តិចបន្តួច ដើម្បីដូរបាយអង្ករប៉ុណ្ណោះ។ វិចិត្រករគំនូរជីវចលរូបនេះប្រាប់ថា៖ «កាលពីខ្ញុំនៅក្មេង ខ្ញុំត្រូវក្រោកពីដេកតាំងពីម៉ោង ៥ព្រឹកដើម្បីជួយធ្វើនំ ហើយយកនំទៅលក់ ទើបជិះកង់ទៅរៀនតាមក្រោយ»។ ការលំបាករបស់ វិចិត្រកររូបនេះ ប្រែជាកម្លាំងចិត្តតស៊ូ សម្រាប់ការងារសិល្បៈគំនូរដែលរូបលោកចូលចិត្ត និងដើម្បីក្តីស្រមៃដែលតែងប្រាថ្នា។
និយាយទាំងអួលដើមក លោក ប៉ោយ ឈុនលី ដែលមានអាយុ ៣៥ឆ្នាំទៅហើយ នៅតែមានអារម្មណ៍ក្តុកក្តួលពេលរំឭកដល់ជីវភាពជាង ២០ឆ្នាំមុន «ខ្ញុំនៅចាំបានថា ពេលខ្លះខ្ញុំជិះកង់មករៀនដោយអត់មានអាហារ ខ្ញុំឃ្លានខ្លាំងពេកក៏ទៅរើសផ្លែត្របែកទុំជ្រុះមួយមកហូប ស្អែកឡើងមាត់ខ្ញុំក៏ហើមដោយសារមេរោគនៅក្នុងផ្លែត្របែកហ្នឹង»។ តែរូបលោកនៅតែមិនបោះបង់ការសិក្សាផ្នែកសិល្បៈគំនូរឡើយ ព្រោះផលិតករម្នាក់នេះមានជំនឿជាក់ថា សិល្បៈគំនូរនឹងធ្វើឱ្យជីវិតរបស់លោកប្រែប្រួល។
បន្ទាប់ពីទទួលបានការបណ្តុះបណ្តាល និងមានជំនាញក្នុងការគូររូបភាពបែបសិល្បៈ រូបលោកក៏ប្រឡូកក្នុងការងារជាងគំនូរនៅខេត្តសៀមរាបមួយរយៈ តែដោយមិនសូវបានជោគជ័យ និងពិបាកក្នុងការរស់នៅ រូបលោកក៏ត្រលប់មកសាលាហ្វារពន្លឺសិល្បៈវិញ ដើម្បីរៀនបន្ត និងជួយធ្វើការងារសាលាបណ្តើរ។ មិនយូរប៉ុន្មានរូបលោកក៏បានជួបជាមួយសិល្បករម្នាក់មកពីប្រទេសបារាំង ដើម្បីបង្ហាញពីការធ្វើគំនូរជីវចល រយៈពេល១ម៉ោង រូបលោកក៏បង្កើតទស្សនៈថ្មីលើសិល្បៈគំនូរ ដោយសិល្បកររូបនេះលើកឡើងថា៖ «ខ្ញុំអត់ដឹងថាគេយកគំនូរមកធ្វើជារឿងតុក្កតាអីចឹងសោះ ក្រោយពេលខ្ញុំបានដឹងពីរបៀបធ្វើ Animation ហ្នឹងភ្លាម ខ្ញុំក៏ចាប់ផ្តើមរៀនធ្វើវា»។
ការធ្វើគំនូរជីវចល ត្រូវការគូររូបជាច្រើនសន្លឹក ហើយយកមកបន្តគ្នាក្នុងកម្មវិធីកុំព្យូទ័រ ទម្រាំបានមួយវិនាទីត្រូវការ២៥សន្លឹក បើ១នាទីត្រូវការរូបភាព ១ ៥០០សន្លឹក ហើយក្នុងមួយថ្ងៃរូបលោកអាចគូររូបបានចាប់ ២៥សន្លឹកទៅ៣០សន្លឹកប៉ុណ្ណោះ ព្រោះត្រូវគូរដោយដៃ តែក្រោយពេលលោកធ្វើបានរូបភាព១នាទីភ្លាម វាធ្វើឱ្យរូបលោកមានជំនឿថាលោកអាចធ្វើបាន។
ក្នុងឆ្នាំ២០០៣ វិចិត្រករគំនូរជីវចល ឈុនលី ក៏ហ៊ានទទួលគម្រោងផលិតរឿងគំនូរជីវចលដោយប្រថុយប្រថាន ក្នុងរយៈពេលជាង៣ខែ លោកក៏អាចធ្វើគម្រោងវីដេអូនោះបាន ក្នុងតម្លៃ ១ ០០០ ដុល្លារ ដែលមានរយៈពេលជាង១នាទី។ ភាពជោគជ័យនេះហើយបាននាំរូបលោកបង្កើតបានជាក្រុមផលិតគំនូរជីវចលនេះបាន រហូតមកដល់សព្វថ្ងៃ ដែលក្នុងមួយគម្រោងវីដេអូ ចាប់១នាទីមានតម្លៃចាប់ពី ២៥០០ ដុល្លារ រហូតដល់ជិត ១ម៉ឺនដុល្លារ។
តាំងពីទទួលបានភាពជោគជ័យលើការផលិតគំនូរជីវចលរួចមកជីវភាពរបស់ លោក ឈុនលី ក៏បានប្រសើរជាងមុន ហើយក៏ទទួលបានឱកាសទៅរៀនបន្តលើផ្នែកគំនូរ និងការផលិតវីដេអូនៅប្រទេសបារាំងរយៈពេល៣ឆ្នាំ។ ពេលត្រលប់មកពីរៀននៅប្រទេសបារាំងវិញក្នុងឆ្នាំ២០១៥ លោកទទួលបានឱកាសបង្ហាញវត្តមានជាតួអង្គមួយក្នុងរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» ផលិតដោយអ្នកស្រី Angelina Julia ដែលកំពុងល្បីល្បាញលើឆាកអន្តរជាតិ។
នៅក្នុងស្នាដៃសិល្បៈរបស់លោក ឈុនលី បង្កប់អត្ថន័យអប់រំពិសេស បរិស្ថាន និងជីវភាពរស់នៅរបស់ប្រជាជនសាមញ្ញ ហើយក៏មានភាពយន្តគំនូរជីវចលដែលបរិយាយពីរឿងព្រេង សម័យអង្គរ ជាមួយការស្រមើស្រមៃ ប្រែក្លាយរឿងខ្លីរយៈពេលមួយនាទីនោះឱ្យក្លាយជាភាពយន្តខ្នាតធំសម្រាប់ចាក់បង្ហាញទូទាំងសកលលោក។ វិចិត្រករ សិល្បករ គំនូរជីវចល ប៉ោយ ឈុន មានក្តីប្រាថ្នាថា៖ «ខ្ញុំចង់ធ្វើឱ្យឧស្សាហកម្មផលិតភាពយន្តខ្មែរឈានមុខ និងអាចស្រូបទាញយុវជន យុវនារីខ្មែរដែលចំណាកស្រុកឱ្យត្រឡប់មកវិញ ហើយមានអាជីពក្នុងវិស័យនេះ ព្រោះជាមុខរបបល្អនៅក្នុងស្រុកអាចទទួលបានកិត្តិយស រាល់ការសម្រេចការផលិតម្តងៗ»។ លោកឈុនលី បន្ថែម។
បច្ចុប្បន្ន ផលិតករគំនូរជីវចល ប៉ោយ ឈុនលី កំពុងស្នាក់នៅក្នុងខេត្តបាត់ដំបង និងគ្រប់គ្រងការផលិតភាពយន្តក្នុងក្រុមផលិតជីវចល Phare Creative។ លើសពីនោះទៀត លោក ឈុនលី ក៏កំពុងដឹកនាំយុវសិស្សមួយក្រុមដែលមានឈ្មោះថា «បាយម៉ាន» ដើម្បីរៀនផលិតភាពយន្តខ្លីថែមទៀត ដោយសិស្សរបស់លោកមួយចំនួនតែងតែឈ្នះក្នុងកម្មវិធីប្រកួតភាពយន្តខ្នាតខ្លីកន្លងមកជារៀងរាល់ឆ្នាំ ជាប់ៗគ្នា៕
ចុចអាន ប៉ាក់គីអៅខ្មែរ ល្បីដល់សារព័ត៌មានហ្វីលីពីនយកទៅចុះផ្សាយ