Roll Royce រដ្ឋមន្ត្រីម៉ាំល្ហុង ល្បីដល់ថ្នាក់តារាចម្រៀងល្បីៗជួលថត MV ច្រើនបទ

2018-03-13 09:03:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រថយន្តកែច្នៃ Roll Royce របស់លោក បូរ៉ា ហៅរដ្ឋមន្ត្រីម៉ាំល្ហុង បច្ចុប្បន្ននៅកំពុងតែមានទីផ្សារខ្លាំងឡើងៗហើយ ពោលគឺក្រៅពីជាមធ្យោបាយលក់ម៉ាំល្ហុង យ៉ាងមានភាពទាក់ទាញនោះ រថយន្តកែច្នៃមួយនេះក៏ត្រូវបានអ្នកដឹកសម្ដែងជួលទៅថតMV ឲ្យតារាចម្រៀងល្បីៗជាបន្តបន្ទាប់ផងដែរ។

តាមការឲ្យដឹងពីម្ចាស់រថយន្តខាងលើ យ៉ាងតិចមានបទចម្រៀង៤បទ របស់តារាចម្រៀងល្បី៤រូបផ្សេងគ្នា បានជួលរថយន្ត ទៅសម្ដែង MV។ រដ្ឋមន្ត្រីម៉ាំល្ហុងរូបនេះ បានរៀបរាប់ឲ្យដឹងថា បទចម្រៀងដែលរថយន្តRoll Royce របស់ខ្លួនធ្លាប់បានសម្ដែងមាន ទី១បទ"ខោរហែក"របស់តារាចម្រៀង Vid Cooler ទី២ បទ"បីឆ្កែចូលរាំ" របស់ ពេជ្រ សោភា ទី៣ បទ"បុក បឹបៗ " របស់ DJ ក្ដឹប និងបទ"កុំជោរប្រយ័ត្នប៉ះកង់" របស់លោក ព្រាប សុវត្ថិ។

លោក បូរ៉ា បានលើកឡើងថា អ្នកដឹកនាំសម្ដែងដែលជួលរថយន្តខ្លួនទៅថតនោះ មិនមែនយកតែរថយន្តនោះទេ គឺថែមទាំងជួលលោកទៅសម្ដែងផងដែរ។ តម្លៃជួលថតRoll Royce ១បទ ស៊ីថ្លៃ៥០ ដុល្លារ ចំណែកតម្លៃខ្លួនលោកវិញ បាន៥០ ដុល្លារដូចគ្នា។ «ឡានខ្ញុំគាត់ឲ្យ៥០ ហើយថ្លៃខ្លួនខ្ញុំបាន៥០ដែរ អីចឹងម្ដងៗបាន១០០ ដុល្លារដែរហ្នឹង»។

តាមការបញ្ជាក់ រថយន្តនេះ ត្រូវបានលោក បូរ៉ា កែច្នៃពីម៉ាស៊ីនម៉ូតូ ដោយប្រើដើមទុនប្រហែល១០លានរៀល។ លោកបានកែច្នៃរថយន្តនេះ ជិត១ឆ្នាំមកហើយ ដើម្បីលក់ម៉ាំល្ហុងរបស់លោក ឲ្យកាន់តែមានភាពទាក់ទាញពីមហាជន។ លោកថា តាំងពីមាន Roll Royce នេះមក ខ្លួនលក់ម៉ាំល្ហុង ដាច់ជាងមុនខ្លាំងគួរសម ហើយមហាជនក៏កាន់តែចាប់អារម្មណ៍មកលើលោកកាន់តែខ្លាំងផងដែរ៕