Lady Gaga, Beyoncé … និងអ្នកស្រី ប៉ែន រ៉ន សុទ្ធតែធ្លាប់ច្រៀងបទចម្រៀងដ៏ល្បីមួយបទនេះ
- 2018-03-23 02:15:00
- ចំនួនមតិ 0 | ចំនួនចែករំលែក 0
Lady Gaga, Beyoncé … និងអ្នកស្រី ប៉ែន រ៉ន សុទ្ធតែធ្លាប់ច្រៀងបទចម្រៀងដ៏ល្បីមួយបទនេះ
ចន្លោះមិនឃើញ
នៅការប្រគុំតន្ត្រីសម្រាប់កម្មវិធីទូរទស្សន៍មួយ កាលពីពាក់កណ្តាលឆ្នាំ២០១៤កន្លងទៅ តារាចម្រៀងលំដាប់ពិភពលោក Lady Gaga បានចូលរួមបង្ហើរសម្លេងនៅក្នុងកម្មវិធីនោះ តាមរយៈបទចម្រៀងមួយបទ។
សូមអញ្ជើញទស្សនាបទចម្រៀងដែលច្រៀងដោយLady Gaga ៖
បទចម្រៀងដែល Lady Gaga ច្រៀងនៅពេលនោះ មានចំណងជើងថា Bang Bang។ Bang Bang មិនមែនជាបទចម្រៀងថ្មីនោះទេ។ តាមពិតទៅបទចម្រៀងនេះ ធ្លាប់បាន អង្រួនពិភពលោក តាំងពីកន្លះសតវត្សរ៍មុនមកម្ល៉េះ។ រហូតមកទល់បច្ចុប្បន្ននេះ បទចម្រៀង Bang Bang នៅមិនទាន់ស្រកស្រុតប្រជាប្រិយភាពរបស់ខ្លួននៅឡើយទេ។
មុនគេបង្អស់ បទចម្រៀងនេះ ច្រៀងដោយអ្នកចម្រៀងអាមេរិកាំង ឈ្មោះនាង Cherilyn Sarkisian។ វាជាស្នាដៃនិពន្ធទំនុកច្រៀងរបស់លោក Sonny Bonno ដែលក្រោយមកបានក្លាយជាប្តីរបស់នាង។
ពេលចេញលក់ដំបូងនៅឆ្នាំ ១៩៦៦ Bang Bang បានលក់ដាច់រាប់លានថាស និងបានជាប់ចំណាត់ថ្នាក់ជាបទចម្រៀងកំពូល នៅស្ទើរគ្រប់ប្រទេសក្នុងពិភពលោក ។ ក្រោយមកបទចម្រៀងនេះ បានក្លាយជាបទចម្រៀងដែលលក់ដាច់ជាងគេក្នុងពិភពលោក ប្រចាំទសវត្សរ៍ឆ្នាំ១៩៦០។
Bang Bang ច្រៀងរៀបរាប់អំពីអារម្មណ៍របស់នារីម្នាក់ ដែលនឹកឃើញដល់កុមារភាព របស់នាង។ កាលណោះ នាងធ្លាប់បានប្រឡែងលេងនឹងកុមារាម្នាក់ ដោយលេងបាញ់ គ្នានៅលើសេះឈើ។ លុះធំដឹងក្តីឡើង ពួកគេក៏ស្រឡាញ់គ្នា ហើយរៀបការជាមួយគ្នា។ ប៉ុន្តែក្រោយមកបុរសនោះ បានចាកចេញពីនាងដោយមិនបានលាសូម្បី១ម៉ាត់។ ទង្វើនេះ ប្រៀបដូចជា គ្រាប់កាំភ្លើងដែលបុរសនោះ បានបាញ់ទម្លុះបេះដូងដ៏ស្មោះស្ម័គ្ររបស់នាង …។
បទចម្រៀង Bang Bang ក៏ល្បីខ្លាំងណាស់ដែរ នៅប្រទេសអ៊ីតាលីនិងបារាំង។ នៅប្រទេសបារាំង បទចម្រៀងនេះត្រូវបានច្រៀងឡើងវិញ ជាភាសាបារាំង ដោយអ្នកចម្រៀងឈ្មោះ Sheila ហើយទទួលបានការគាំទ្រយ៉ាង ខ្លាំងក្លានៅរដូវក្តៅឆ្នាំ១៩៦៦។ បទចម្រៀងជាភាសាបារំាងសរសេរទំនុកថ្មីដោយ Claud Carrére និង Georges Aber។
ចាប់តាំងពីឆ្នាំ១៩៦៦ មកទល់នឹងឆ្នាំ២០១៨នេះ បទចម្រៀង Bang Bang ត្រូវបានអ្នកចម្រៀងទាំងស្រីទាំងប្រុស ជាច្រើននាក់ យកទៅច្រៀងជាភាសាជាតិរបស់ខ្លួន ដែលក្នុងនោះមាន ភាសាបារាំង ភាសាអាល្លឺម៉ង់ ភាសាអ៊ីតាលី ភាសាស៊ុយអ៊ែត ភាសាប៉ូឡូញ ភាសាប៊ុលហ្គារី ភាសាទួគី ភាសាក្រិក ភាសាអ៊ីរ៉ង់ ភាសាប្រេស៊ីល ភាសារ៉ូម៉ានី ភាសាចិន ភាសាជប៉ុន ភាសាវៀតណាម និងភាសាខ្មែរ ជាដើម។
ភាពល្បីល្បាញរបស់បទចម្រៀង Bang Bang បានរសាត់មកដល់កម្ពុជា។ ផលិតករខ្មែរ បាននិពន្ធទំនុកច្រៀងថ្មី ដោយដាក់ចំណងជើងថា “ ស្នេហា” ។ អ្នកស្រី ប៉ែន រ៉ន គឺជាសិល្បករខ្មែរតែម្នាក់គត់ដែលត្រូវបានប្រគល់ភារៈឲ្យបង្ហើរសំឡេងតាមរយៈបទចម្រៀងថ្មីនេះ ។
ជាង៥០ឆ្នាំហើយ ដែលបទភ្លេងនៃបទចម្រៀង Bang Bang បានកំដរអារម្មណ៍មិត្តអ្នកស្តាប់ គ្រប់ទិសទី។ ក្រៅតែពីការផលិតដើម្បីដាក់លក់នៅទីផ្សារ បទចម្រៀងនេះ ត្រូវបានគេផលិតដើម្បីចាក់ផ្សាយតាមវិទ្យុ ទូរទស្សន៍ និង ដាក់បញ្ចូលក្នុងខ្សែភាពយន្តផងដែរ៕
**ចុចអានអត្ថបទប្រវត្តិបទចម្រៀងជាច្រើនទៀត
---> Sabay ត្រូវការរើស 5 Corporate Sales Executives ។ បើមានចំណាប់អារម្មណ៍ដាក់ CV មក hr@sabay.com ឬចូលទៅកាន់ https://goo.gl/iTqDWW