កូនស្រីឈិន ឡុង ធ្លាក់ខ្លួនដេកក្រោមស្ពាន ព្រោះឪពុកម្ដាយជាមនុស្សរើសអើង

2018-04-30 09:12:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តារាក្បាច់គុន ដែលជាកូនស្រីរបស់កំពូលតារាសម្ដែងចិនលោក ឈិន ឡុង បានប្រកាសប្រាប់សាធារណជនថា នាងក្លាយជាក្មេងកំព្រាគ្មានផ្ទះសម្បែងជ្រកអាស្រ័យដូចបច្ចុប្បន្ននេះ គឺដោយសារតែនាងមានឪពុកម្ដាយជាមនុស្សរើសអើងនឹងការស្រឡាញ់ភេទដូចគ្នា។

កូនស្រីដែលត្រូវ ឈិន ឡុង កាត់កាល់ចោលឈ្មោះ Etta Ng បានបង្ហោះវីដេអូនៅលើ YouTube កាលពីសប្ដាហ៍មុនជាមួយនឹងមិត្តស្រីរបស់ខ្លួនឈ្មោះ Andi Autumn ដែលជាតារាបណ្ដាញសង្គមម្នាក់។ ពួកគេទាំង២នាក់បានប្រកាសស្វែងរកជំនួយពីសហគមន៍អនឡាញ។ "យើងអត់មានផ្ទះសម្បែងរស់នៅអស់រយៈពេល១ខែមកហើយ ដោយសារតែឪពុកម្ដាយជាអ្នករើសអើងនឹងការស្រឡាញ់ភេទដូចគ្នា។ ភាគច្រើនគឺពួកយើងដេកនៅក្រោមស្ពាន" នេះជាការលើកឡើងរបស់ Etta Ng និង Andi។

ពួកគេបានបន្តថា៖ "ពួកយើងបានទៅរកប៉ូលិស។ ពួកយើងបានទៅមន្ទីរពេទ្យ ធនាគារផ្គត់ផ្គង់អាហារ សហគមន៍ជម្រក LGBTQ ហើយពួកគេទាំងអស់សុទ្ធតែមិនជួយយើងទេ។ ដូច្នេះហើយទើបយើងកំពុងធ្វើវីដេអូនេះ ព្រោះពួកយើងមិនដឹងថាត្រូវធ្វើអ្វីទៀតនៅដំណាក់កាលនេះឡើយ"។

គួររំលឹកថា Etta Ng គឺជាកូនស្រីរបស់តារាសម្ដែង ឈិន ឡុង និងតារាស្រីហុងកុងឈ្មោះ Elaine Ng ដោយមិនបានរៀបការស្របច្បាប់។ កាលពីឆ្នាំ២០១៥ Etta Ng បានប្រាប់សារព័ត៌មាន Express ថា ឪពុករបស់នាងមិនស្ថិតនៅក្នុងជីវិតនាងឡើយ បើទោះជាជាប់សាច់ឈាមនឹងគ្នាក៏ដោយ៕

ប្រភព៖ Asiancorrespondent ប្រែសម្រួល៖ ឈាង.