តួកគី នៅតែទទូចទិញប្រេងពីអ៊ីរ៉ង់ បើទោះអាមេរិកគំរាមដាក់ទណ្ឌកម្ម

2018-07-25 02:04:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថ្វីត្បិតទទួលរងការគំរាមកំហែងដាក់ទណ្ឌកម្មពីអាមេរិក រដ្ឋាភិបាលតួកគីមានគម្រោងនៅតែបន្តទិញប្រេងពីអ៊ីរ៉ង់ដដែល។ នេះបើតាមការលើកឡើងរបស់លោក Mevlut Cavsoglu រដ្ឋមន្ត្រីការបរទេសតួកគី កាលពីថ្ងៃទី២៤ ខែកក្កដា ឆ្នាំ២០១៨។

លោក Mevlut និយាយថា ការទិញប្រេងពីអ៊ីរ៉ង់នឹងធ្វើឡើងនៅក្នុងលក្ខខណ្ឌសមស្របមួយ ដោយហេតុថា តួកគីគ្មានជម្រើសផ្សេងទៀតនោះទេក្រៅពីការធ្វើបែបនេះ។ លោកបន្តថា តួកគីបានព្យាយាមពន្យល់ពីមូលហេតុដែលមិនរអានឹងទណ្ឌកម្មរបស់អាមេរិក ហើយតួកគីយល់ឃើញថា ទណ្ឌកម្មនេះធ្វើឡើងក្នុងន័យមួយដែលមិនត្រឹមត្រូវនោះទេ។

រដ្ឋបាលលោក ដូណាល់ ត្រាំ មានបំណងកាត់ផ្ដាច់ទំនាក់ទំនងអន្តរជាតិរបស់អ៊ីរ៉ង់ ដែលជាប្រភពរកចំណូលសម្រាប់ការផ្គត់ផ្គង់កម្មវិធីផលិតអាវុធនុយក្លេអ៊ែរ ឬក្រុមឆ្មាំបដិវត្តន៍ឥស្លាម។

សូមបញ្ជាក់ថា ការលើកឡើងរបស់រដ្ឋមន្ត្រីការបរទេសរូបនេះ ធ្វើឡើងខណៈដែលតួកគី និងអាមេរិកកំពុងមើលមុខគ្នាមិនសូវចំ ដែលបង្កឡើងពីរឿងទិញប្រព័ន្ធការពារមីស៊ីល S-400 ពីរុស្ស៊ី។ អាមេរិកបានបញ្ជាក់ថា ខ្លួននឹងដាក់ទណ្ឌកម្ម ហើយបញ្ឈប់ការលក់យន្តហោះចម្បាំង F-35 ទៅឲ្យតួកគី បើប្រទេសនេះទទូចចង់ទិញអាវុធពីរុស្ស៊ីបន្តទៀត។ យ៉ាងណាមិញ តួកគីមិនបានអើពើ ឬបញ្ចេញប្រតិកម្មប្រតិបត្តិតាមអាមេរិកនោះទេ។ បច្ចុប្បន្ន តួកគី និងរុស្ស៊ី កំពុងស្ថិតនៅក្នុងដំណាក់កាលចរចាចុងក្រោយនៃការទិញដូរអាវុធហើយ៕

ប្រភព៖ Washington Examiner ប្រែសម្រួល៖ ឈាង.