ប្រធានាធិបតីតួកគី អញ្ជើញត្រាំ ធ្វើទស្សនកិច្ច ក្រោយអាមេរិកប្រកាសដកទ័ពពីស៊ីរី និងព្រមលក់មីស៊ីល
- 2018-12-25 04:28:53
- ចំនួនមតិ 0 | ចំនួនចែករំលែក 0
ប្រធានាធិបតីតួកគី អញ្ជើញត្រាំ ធ្វើទស្សនកិច្ច ក្រោយអាមេរិកប្រកាសដកទ័ពពីស៊ីរី និងព្រមលក់មីស៊ីល
ចន្លោះមិនឃើញ
ប្រធានាធិបតីតួកគី លោក Tayyip Erdogan បានអញ្ជើញប្រធានាធិបតីអាមេរិក លោក ដូណាល់ ត្រាំ ឱ្យធ្វើទស្សនកិច្ចនៅតួកគី ក្នុងឆ្នាំ២០១៩ខាងមុខ។ នេះបើតាមអ្នកនាំពាក្យសេតវិមានអាមេរិក លោក Hogan Gidley បានឱ្យដឹងកាលពីថ្ងៃទី២៤ ខែធ្នូ ឆ្នាំ២០១៨។
ជាការឆ្លើយតប លោក ដូណាល់ ត្រាំ បានទទួលយកការអញ្ជើញនេះហើយ ប៉ុន្តែមិនទាន់បានកំណត់កាលបរិច្ឆេទជាក់លាក់នៃការធ្វើទស្សនកិច្ចនេះនៅឡើយ។
ជាមួយនឹងការដកទ័ពចេញពីប្រទេសស៊ីរី ប្រតិភូយោធាអាមេរិកមួយ នឹងធ្វើដំណើរទស្សនកិច្ចទៅប្រទេសតួកគី នាចុងសប្តាហ៍នេះ ដើម្បីបើកកិច្ចពិភាក្សាជុំវិញបញ្ហានេះ។
កាលពីខែឧសភា ឆ្នាំ២០១៧ លោក ដូណាល់ ត្រាំ បានទទួលដំណើរទស្សនកិច្ចរបស់លោក Tayyip Erdogan នៅសេតវិមានរួចមកហើយ។
គួរកត់សម្គាល់ដែរថា ការអញ្ជើញលោក ដូណាល់ ត្រាំ ឱ្យធ្វើទស្សនកិច្ចនៅតួកគី ក៏ធ្វើឡើងបន្ទាប់ពី ក្រសួងការបរទេសអាមេរិក កាលពីពេលថ្មីៗនេះ បានឯកភាពឲ្យលក់មីស៊ីលប្រភេទ Patriot ចំនួន ៨០គ្រាប់ និងមីស៊ីលផ្សេងទៀតចំនួន ៦០គ្រាប់ ទៅឲ្យរដ្ឋាភិបាលអង់ការ៉ា រួមជាមួយឧបករណ៍ពាក់ព័ន្ធ រួមមានប្រព័ន្ធរ៉ាដា ស្ថានីយគ្រប់គ្រងទំនាក់ទំនង និងស្ថានីយបាញ់មីស៊ីល៕
អត្ថបទទាក់ទង៖ អាមេរិក នឹងលក់មីស៊ីល ៣,៥ពាន់លានដុល្លារឲ្យតួកគី