សេដ្ឋកិច្ចកម្ពុជា បន្តមានកំណើន ៧% នៅឆ្នាំ២០១៩ តែអាចមានបញ្ហាប្រឈមមួយចំនួន
- 2019-01-03 03:11:08
- ចំនួនមតិ 0 | ចំនួនចែករំលែក 0
សេដ្ឋកិច្ចកម្ពុជា បន្តមានកំណើន ៧% នៅឆ្នាំ២០១៩ តែអាចមានបញ្ហាប្រឈមមួយចំនួន
ចន្លោះមិនឃើញ
ឆ្នាំ២០១៩ សេដ្ឋកិច្ចកម្ពុជា ត្រូវបានរំពឹងថាបន្តមានកំណើនក្នុងរង្វង់ ៧% ហើយអត្រាអតិផរណាបន្តស្ថិតក្នុងកម្រិតទាប ២,៦% ជាមួយនឹងស្ថិរភាពនៃអត្រាប្តូរប្រាក់ ៤០៥០រៀលក្នុងមួយដុល្លារ។ នេះបើតាមសេចក្តីប្រកាសព័ត៌មានស្តីពី វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០១៨ និងទស្សនវិស័យឆ្នាំ២០១៩ របស់ធនាគារជាតិនៃកម្ពុជា កាលពីថ្ងៃទី២ ខែមករា ឆ្នាំ២០១៩។
ទោះជាយ៉ាងណា ធនាគារជាតិអះអាងថា សេដ្ឋកិច្ចកម្ពុជាអាចមានបញ្ហាប្រឈមមួយចំនួនផងដែរដែលបណ្តាលមកពីកត្តាខាងក្រៅ និងខាងក្នុង។
កត្តាខាងក្រៅរួមមាន៖
-លំហូរចេញនៃមូលធនពីតំបន់។
-លំហូរចេញនៃមូលធនពីតំបន់ទៅសហរដ្ឋអាមេរិក អាចនាំឱ្យប្រាក់ដុល្លារអាមេរិកឡើងថ្លៃ។
-ការកើនឡើងថ្លៃប្រេងអន្តរជាតិ ដែលរួមចំណែកបង្កើនថ្លៃដឹកជញ្ជូន និងថ្លៃដើមផលិតកម្ម ដោយអាចបង្កើនសម្ពាធលើអត្រាអតិផរណាកម្ពុជា។
-កម្ពុជាអាចប្រឈមនឹងការដកប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងអាវុធ (EBA) របស់សហភាពអឺរ៉ុប។
-ការអនុវត្តកិច្ចព្រមព្រៀងភាពជាដៃគូអន្តរប៉ាស៊ីហ្វិក (CPTPP) និងកិច្ចព្រមព្រៀងពាណិជ្ជកម្មរវាងសហភាពអឺរ៉ុប និងសហរដ្ឋអាមេរិក ជាមួយនឹងប្រទេសជាគូប្រជែងនាំចេញរបស់កម្ពុជា។
កត្តាខាងក្នុងរួមមាន៖
-វិស័យសំណង់ មានវដ្តនៃការអភិវឌ្ឍ ដែលធ្វើឱ្យវិស័យនេះអាចកើនឡើង និងថយមកវិញ នៅពេលដែលគម្រោងសំណង់ធំៗត្រូវបានបញ្ចប់។
-ការកើនឡើងនៃវិស័យសំណង់ និងអចលនទ្រព្យ អាចធ្វើឱ្យតម្លៃអចលនទ្រព្យកើនឡើងហួសពីតម្រូវការជាក់ស្តែង និងអាចជាហានិភ័យសម្រាប់វិស័យធនាគារ និងជំនឿទុកចិត្តវិនិយោគិនផងដែរ។
-ថ្លៃដើមផលិតកម្មនៅកម្ពុជា មានកម្រិតខ្ពស់នៅឡើយ ដោយសារសេដ្ឋកិច្ចមាត្រដ្ឋាន នៅមានទំហំតូច, ការតភ្ជាប់ហេដ្ឋារចនាសម្ព័ន្ធនៅមានកំណត់, បញ្ហាផ្គត់ផ្គង់អគ្គិសនី (កង្វះប្រព័ន្ធចែកចាយនិងថ្លៃខ្ពស់) និងការកើនឡើងនៃប្រាក់ឈ្នួលអប្បបរមាជាដើម។
ឆ្លើយតបទៅនឹងបញ្ហាខាងលើនេះ ធនាគារជាតិនៃកម្ពុជា បានបញ្ជាក់ថា ខ្លួននឹងបន្តរួមចំណែកគាំទ្រគោលនយោបាយរបស់រាជរដ្ឋាភិបាលក្នុងការកែទម្រង់រចនាសម្ព័ន្ធ ការធ្វើពិពិធកម្ម ការរក្សាបរិយាកាសអំណោយផលដល់ការវិនិយោគ និងផែនការអភិវឌ្ឍន៍វិស័យសេដ្ឋកិច្ចនានាប្រកបដោយប្រសិទ្ធភាព៕