ខេត្តសៀមរាបមានផលិតផលទេសចរណ៍ជាច្រើន តែនៅខ្វះមួយទៀត

2019-04-09 03:39:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅក្នុងខេត្តសៀមរាប មានផលិតផលទេសចរណ៍ជាច្រើន ក្រៅពីប្រាសាទអង្គរវត្ត ដូចជានៅសហគមន៍ទេសចរណ៍កំពង់ភ្លុក សហគមន៍ទេសចរណ៍បឹងពារាំង សហគមន៍ទេសចរណ៍កំពង់ឃ្លាំង ភូមិដ្ឋានធម្មជាតិរ៉ុនតាឯកជាដើម។ ប៉ុន្តែនៅក្នុងខេត្តនេះ គឺខ្វះផលិតផលទេសចរណ៍ដើរផ្សងព្រេង ដើម្បីបំពេញតម្រូវការដល់អ្នកទេសចរដែលមានចំណូលចិត្តដើរផ្សងព្រេង។ នេះបើតាមការលើកឡើងរបស់លោក ជុក ជំនោរ ប្រធាននាយកដ្ឋានអភិវឌ្ឍន៍ផលិផលទេសចរណ៍ នៃក្រសួងទេសចរណ៍ ក្នុងកិច្ចប្រជុំការងារ ក្នុងវិស័យទេសចរណ៍ប្រចាំត្រីមាសទី១ ឆ្នាំ២០១៩ របស់មន្ទីរទេសចរណ៍ខេត្តសៀមរាប កាលពីព្រឹកថ្ងៃទី៨ ខែមេសា ឆ្នាំ២០១៩។

រូបថត៖ AKP

លោកបញ្ជាក់ថា កន្លងមកនេះ អ្នកទេសចរដែលមានចំណូលចិត្តដំណើរកម្សាន្តបែបផ្សងព្រេងនៅតាមព្រៃភ្នំតែងតែនាំគ្នា ទៅកម្សាន្តនៅភ្នំឱរ៉ាល។ ប៉ុន្តែឥឡូវនេះក្រសួងទេសចរណ៍មានគម្រោងបង្កើតឱ្យមានដំណើរកម្សាន្តបែបផ្សងព្រេងនេះនៅភ្នំគូលែន ព្រោះថា វាជាទីតាំងមួយដ៏ល្អសម្រាប់អ្នកទេសចរណ៍ចំណាយពេលវេលា និងថវិកា មកកម្សាន្តនៅខេត្តសៀមរាប បានទាំងទស្សនាប្រាសាទបុរាណ តំបន់ទេសចរណ៍ ធម្មជាតិ ទេសចរណ៍សហគមន៍ និងដំណើរកម្សាន្តបែបផ្សងព្រេងនៅក្នុងព្រៃភ្នំគូលែន អតីតរាជធានីខ្មែរ និងមានប្រាសាទ និងវត្ថុផ្សេងៗដែលនៅសល់ក្នុងព្រៃនេះ ដែលគេមិនទាន់បានជួប។

តំបន់ប្រវត្តិសាស្រ្តស្រះដំរី (រូបថត៖ FB Vegik Ivan)

លោកបន្ថែមថា ជាមួយគ្នានេះអាជ្ញាធរខេត្ត ក៏ដូចជាមន្ទីរទេសចរណ៍ខេត្តសៀមរាប ក៏កំពុងតែខិតខំជំរុញការរៀបចំ «សៀមរាបក្រៅពីប្រាសាទអង្គរ» ជាមួយវិស័យឯកជនបណ្ដើរៗហើយដែរ ដើម្បីបង្កើតឱ្យមានផលិតផលទេសចរណ៍ថ្មីៗទៀត។

បើតាមលោក ថោង ខុន រដ្ឋមន្រ្តីក្រសួងទេសចរណ៍បានមានប្រសាសន៍ថា វិស័យសាធារណៈ និងវិស័យឯកជនក្នុងវិស័យទេសចរណ៍ ត្រូវរួមគ្នាបង្កើតផលិតផលទេសចរណ៍ និងរមណីយដ្ឋានទេសចរណ៍ធម្មជាតិបន្ថែមទៀត ដើម្បីបំពេញចំណាប់អារម្មណ៍ និងតម្រូវការកម្សាន្តរបស់ភ្ញៀវទេសចរអន្តរជាតិ ធ្វើយ៉ាងណាឱ្យភ្ញៀវទេសចរដែលមកទស្សនាកម្ពុជា មានឱកាសស្នាក់នៅយូរថ្ងៃ និងចាយច្រើន។ ជាមួយគ្នានេះនេះ ប្រតិបត្តិករទេសចរណ៍ទាំងអស់ត្រូវបង្កើនការផ្តល់សេវាជូនភ្ញៀវទេសចរប្រកបដោយគុណភាពខ្ពស់។

លោករដ្ឋមន្រ្តី ក៏បានណែនាំឱ្យមន្ទីរទេសចរណ៍ខេត្ត ត្រូវទប់ស្កាត់ការឡើងថ្លៃហួសហេតុពេក ក្នុងឱកាសបុណ្យចូលឆ្នាំថ្មី ដោយត្រូវបញ្ជ្រាបឱ្យម្ចាស់មូលដ្ឋានអាជីវកម្មទេសចរណ៍ទាំងអស់ ដាក់បង្ហាញតារាងតម្លៃលើមុខទំនិញ-សេវាកម្មរបស់ខ្លួនឱ្យបានត្រឹមត្រូវ និងអាចទទួលយកបាន៕

ប្រភព៖ AKP ប្រែសម្រួល៖ សំភី