កម្ពុជា-ចិន ចុះកិច្ចសន្យាសាងសង់ឃ្លាំងស្តុក និងឡសម្ងួត ដើម្បីជំរុញផលិតកម្មស្រូវ និងនាំចេញអង្ករ

2019-06-20 08:54:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដើម្បីជួយដល់ប្រជាកសិករ ធុរជន និងក្រុមហ៊ុននាំចេញអង្ករ ព្រមទាំងគាំទ្រយុទ្ធសាស្ត្ររបស់រាជរដ្ឋាភិបាលលើការជំរុញនាំចេញអង្ករឱ្យបានយ៉ាងតិច ១លានតោនក្នុងមួយឆ្នាំ ក្រសួងពាណិជ្ជកម្ម តាមរយៈក្រុមហ៊ុនហ្គ្រីនត្រេដ ជាសេនាធិការ បានចុះកិច្ចសន្យាពាណិជ្ជកម្ម ស្តីពីគម្រោងជំរុញផលិតកម្មស្រូវ និងនាំចេញអង្ករ នៅក្រោមក្របខណ្ឌឥណទានសម្បទាន ផ្តល់ដោយសាធារណរដ្ឋប្រជាមានិតចិន។

ពិធីចុះកិច្ចសន្យា បានធ្វើឡើងនៅក្រសួងសេដ្ឋកិច្ច និងហិរញ្ញវត្ថុ កាលពីព្រឹកថ្ងៃ២០ ខែមិថុនា ឆ្នាំ២០១៩ រវាងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក Chen Xiaojia ប្រធានក្រុមហ៊ុន CITIC Construction Co., Ltd ប្រទេសចិន ក្រោមអធិបតីភាព លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។

នៅក្រោមកិច្ចសន្យាពាណិជ្ជកម្មនេះ ក្រុមហ៊ុន CITIC Construction Co., Ltd និងក្រុមហ៊ុនហ្គ្រីនត្រេដ នឹងសហការសាងសង់ឃ្លាំងចំនួន ១២កន្លែង ដែលមានសមត្ថភាពស្តុកស្រូវ-អង្ករសរុប ៨២៧ពាន់តោន និងឡសម្ងួតចំនួន ១០កន្លែង ដែលមានសមត្ថភាពសម្ងួតស្រូវបាន ១៣ពាន់តោន ក្នុងមួយថ្ងៃ នៅក្នុងខេត្តពោធិ៍សាត់ បាត់ដំបង តាកែវ បន្ទាយមានជ័យ សៀមរាប កំពង់ធំ កំពង់ចាម ព្រៃវែង កណ្តាល កំពង់ស្ពឺ និងខេត្តព្រះសីហនុ។

តាមរយៈការសាងសង់ឃ្លាំងស្ដុក និងឡសម្ងួតស្រូវ នៅតាមទីតាំងយុទ្ធសាស្ត្រទាំងអស់នេះ និងការដាក់ឲ្យអនុវត្តយន្ដការស្រូវអង្ករស្ដុកក្នុងឃ្លាំង ធ្វើជាវត្ថុបញ្ចាំសម្រាប់ខ្ចីប្រាក់ពីធនាគារឯកជន ឬហៅថាប្រតិបត្តិការដែលមានកិច្ចធានា នឹងជួយទប់ស្កាត់សកម្មភាពទិញ/លក់បង្ខូចថ្លៃស្រូវរបស់ឈ្មួញទុច្ចរិត និងផ្តល់ឱ្យប្រជាកសិករ អាចរក្សាទុកស្រូវបានយូរ ដើម្បីលក់តាមតម្លៃសមរម្យ ក៏ដូចជាលទ្ធភាពទទួលបានឥណទាន នៅពេលត្រូវការចាំបាច់។

សូមជម្រាបដែរថា គម្រោងជំរុញផលិតកម្មស្រូវ និងនាំចេញអង្ករនេះ មិនមានបម្រើសេវាកិនស្រូវទេ ដើម្បីការពារកុំឱ្យមានការប្រកួតប្រជែង ជាមួយរោងម៉ាស៊ីនកិនស្រូវក្នុងស្រុក៕

អត្ថបទនិងរូបថត៖ ក្រសួងពាណិជ្ជកម្ម