សម្តេច ហ៊ុន សែន៖ កម្ពុជាគោរពតាមគោលការណ៍ និងកាតព្វកិច្ច ក្នុងនាមជាសមាជិកអាស៊ាន ២០ឆ្នាំមកនេះ

2019-06-23 05:10:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានថ្លែងថា ឆ្នាំនេះគឺជាខួប២០ឆ្នាំដែលកម្ពុជាចូលជាសមាជិកអាស៊ាន ហើយកន្លងមកនេះ កម្ពុជាក៏បានគោរពទៅតាមគោលការណ៍ និងកាតព្វកិច្ចរបស់ខ្លួនក្នុងការចូលរួមជាសមាជិកអាស៊ាននេះ ពិសេសការចូលរួមថែរក្សាសន្តិសុខ ស្ថិរភាព ការអភិវឌ្ឍ និងវិបុលភាព។ ការថ្លែងនេះ ធ្វើឡើងក្នុងពេលដែលសម្តេច ហ៊ុន សែន អញ្ជើញចូលរួមក្នុងកិច្ចប្រជុំកំពូលអាស៊ានលើកទី៣៤ នៅក្រុងបាងកក ប្រទេសថៃ កាលពីថ្ងៃទី២២ ខែមិថុនា ឆ្នាំ២០១៩។

រូបថត៖ ហ្វេសប៊ុកសម្តេច ហ៊ុន សែន

សម្តេចបន្តថា ក្នុងអាណត្តិនេះ មជ្ឈមណ្ឌលកម្ចាត់មីនតំបន់អាស៊ាននឹងមានទីតាំងនៅក្នុងប្រទេសកម្ពុជា ដែលមានការជួយពីបណ្ដាប្រទេសផ្សេងទៀត ដោយបានដើរតួនាទីយ៉ាងសំខាន់នៅក្នុងការឆ្លើយតបទៅនឹងចក្ខុវិស័យរបស់អាស៊ាន។

សូមជម្រាបថា ក្នុងកិច្ចប្រជុំកំពូលអាស៊ាននេះ ថ្នាក់ដឹកនាំអាស៊ានបានផ្តោតដោយយកចិត្តទុកដាក់ទៅលើបញ្ហាស្នូលរបស់អាស៊ាន ការពង្រឹងកសាងសមត្ថភាពរបស់អាស៊ាន ជាពិសេសការចូលរួមកាត់បន្ថយគម្លាតនៃការអភិវឌ្ឍអាស៊ានក្នុងការពង្រឹងនៃការធ្វើពាណិជ្ជកម្មផ្ទៃក្នុងអាស៊ាន ដើម្បីធ្វើយ៉ាងណាជំរុញឲ្យអាស៊ានឆ្លើយតបទៅនឹងការប្រឈមនៃគ្រោះមហន្តរាយ ដោយការប្រែប្រួលអាកាសធាតុ ជាពិសេសពាក់ព័ន្ធទៅនឹងការគ្រប់គ្រងនៃសំរាម ដែលបច្ចុប្បន្ននេះកំពុងតែរាតត្បាតនៅតាមឆ្នេរកោះនៃប្រទេសសមាជិកអាស៊ាន។

ប្រមុខរដ្ឋាភិបាលអាស៊ាន បានផ្លាស់ប្ដូរមតិយោបល់ពិភាក្សាលើបញ្ហាប្រឈមលើការគ្រប់គ្រងបញ្ហាប្រែប្រួលអាកាសធាតុ ហើយក៏បានជំរុញធ្វើយ៉ាងណាឱ្យអាស៊ាន ដើរតួនាទីសំខាន់ក្នុងយន្តការសាមគ្គីភាព ការតភ្ជាប់អាស៊ាន ជាពិសេសកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ ដើម្បីឱ្យអាស៊ានឆ្លើយតបនឹងអ្វីដែលអាស៊ានកំពុងតែកសាងសហគមន៍នេះ។ លើសពីនេះ ក្នុងកិច្ចប្រជុំ មេដឹកនាំអាស៊ានក៏បានជំរុញធ្វើយ៉ាងណាឲ្យអាស៊ានបន្តនូវភាពខ្លាំងរបស់ខ្លួន ហើយក៏បានឯកភាពទៅលើប្រធានបទដែលដាក់ចេញដោយប្រធានអាស៊ានផងដែរ៕

អត្ថបទ៖ សំភី