នាយករដ្ឋមន្ត្រីថ្កោលទោស អ្នកចោទប្រកាន់រាជរដ្ឋាភិបាលថាជាអាយ៉ង និងលក់ដីឱ្យចិន

2019-06-25 01:30:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្ត្រី ហ៊ុន សែន បានថ្កោលទោសជាសាធារណៈទៅលើអ្នកដែលយកបញ្ហាវិនិយោគរបស់ចិន មកធ្វើការចោទប្រកាន់រាជរដ្ឋាភិបាលថា ជាអាយ៉ងរបស់ចិន និងលក់ដីឱ្យចិន។ ការថ្លែងនេះ ធ្វើឡើងក្នុងអំឡុងប្រតិបត្តិការសង្គ្រោះជនរងគ្រោះក្នុងឧបទ្ទវហេតុបាក់រលំអគារនៅខេត្តព្រះសីហនុ កាលពីយប់ថ្ងៃទី២៤ ខែមិថុនា ឆ្នាំ២០១៩។

សម្តេច ហ៊ុន សែន ថ្លែងនាពេលកន្លងមក

សម្តេច ហ៊ុន សែន បានបញ្ជាក់យ៉ាងដូច្នេះថា៖ «**បញ្ហានេះ វាបានក្លាយទៅជាបញ្ហានយោបាយរបស់ពួកប្រឆាំង អស់លោកគិតមើល ចិន ឬអាមេរិក ឬអង់គ្លេស ឬបារាំង មកវិនិយោគ បើសិនជាមានឧប្បត្តិហេតុវាដូចតែគ្នាហ្នឹង ដូច្នេះសុំកុំចោទជាតិណា ឬជាតិណា គឺបញ្ហាធំ យើងត្រូវប្រមូលអ្នកវិនិយោគទាំងអស់ចូលក្នុងប្រទេសកម្ពុជា ប៉ុន្តែត្រូវអនុវត្តតាមច្បាប់របស់កម្ពុជា តែប៉ុណ្ណឹងទេ។ អ៊ីចឹងទេ ខ្ញុំបានស្តាប់ឮច្រើនពេកហើយ ដែលថា ចិនមកដាក់អនានិគមន៍តាមរយៈការដាក់វិនិយោគ ក៏ប៉ុន្តែសូមបញ្ជាក់ថា អ្នកទាំងអស់គ្នា ឥឡូវពិភពលោកកំពុងត្រូវការអ្នកវិនិយោគចិនចូលទៅវិនិយោគនៅក្នុងប្រទេសរបស់គេ តែយើងមានភ័ព្ទសំណាងដែលយើងបានទាញអ្នកវិនិយោគចិនចូលក្នុងប្រទេសរបស់យើង**»។

សម្តេចបន្តថា៖ «អ្នកដែលមិនចង់ឲ្យយើងមានការរីកចំរើន ដោយគេថា នេះគឺជាអន្ទាក់បំណុលរបស់ចិន នេះជាអនានិគមន៍របស់ចិន នេះជាកន្លែងលក់ដីឲ្យចិន ប៉ុន្តែខ្ញុំសូមគូសបញ្ជាក់ថា អ្នកដែលនៅក្រុងព្រះសីហនុ បានទទួលផលប្រយោជន៍ប៉ុណ្ណាពីការវិនិយោគ។ ពិតមែនហើយ នៅពេលដែលចាប់ផ្តើមការសាងសង់ មានការខូចផ្លូវ ប៉ុន្តែនៅពេលដែលមានការសាងសង់រួចហើយ ទីក្រុងព្រះសីហនុ វានឹងក្លាយទៅជាក្រុងដ៏ធំដែលមិនដូចការគិត»៕

អត្ថបទ៖ សោភា