តារាស្រីកូរ៉េ ប្រឈមនឹងជាប់គុកនៅថៃ ៥ ឆ្នាំ ព្រោះចាប់ងាវជិតផុតពូជ

2019-07-08 03:15:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តារាសម្ដែងស្រីកូរ៉េខាងត្បូង Lee Yeol-eum ប្រឈមនឹងការជាប់គុករហូតដល់ ៥ ឆ្នាំនៅថៃ ដោយសារតែបានចាប់លៀសយក្សជិតផុតពូជមួយប្រភេទ ក្នុងពេលថតកម្មវិធីទូរទស្សន៍ "Law of the Jungle”។

Lee Yeol-eum បានជ្រមុជទឹកដើម្បីរាវចាប់លៀសយក្ស នៅឧទ្យានសមុទ្រថៃ សម្រាប់កម្មវិធី "Law of the Jungle” ដែលចាក់ផ្សាយនាថ្ងៃទី ៣០ ខែមិថុនា។ ក្រោយពីចាប់យកបានលៀសយក្សចំនួនពីរ ពីផ្កាថ្មនៅបាតសមុទ្រ Lee Yeol-eum បានស្រែកថា ៖ "ខ្ញុំចាប់បានហើយ”។ សត្វប្រភេទនេះបានចុះក្នុងបញ្ជីប្រភេទសត្វជិតផុតពូជ និងត្រូវបានការពារក្រោមច្បាប់ថៃ។

រូបភាពនៃតារាសម្ដែងវ័យ ២៣ ឆ្នាំ រើសលៀសនេះ បានចាប់ផ្ដើមលេចចេញលើអនឡាញ ធ្វើឲ្យរឿងរ៉ាវនេះដឹងដល់សមត្ថកិច្ច។

Narong Kongaid ប្រធាននៃឧទ្យានជាតិ Hat Chao Mai ជាទីតាំងដែលកម្មវិធីខាងលើថតកាលពីខែមេសា បានដាក់ពាក្យបណ្ដឹងលើបទល្មើសចំនួន ២ កាលពីថ្ងៃពុធសប្ដាហ៍មុន ចំពោះតារាសម្ដែងស្រីដែលបានល្មើសច្បាប់ឧទ្យានជាតិ និងច្បាប់ការពារជីវិតសត្វ។

Narong និយាយថា ៖ "នាងអាចប្រឈមនឹងការជាប់ពន្ធនាគាររហូតដល់ ៥ ឆ្នាំ”។ លោកបន្តថាផលិតកម្មនៃកម្មវិធីនេះបានសម្ដែងការសុំទោសរួចហើយ ប៉ុន្តែ "នេះគឺជាករណីបទល្មើស ហើយយើងមិនអាចដកពាក្យបណ្ដឹងបានទេ”។

ស្របពេលដែលពាក្យបណ្ដឹងបានដាក់រួចទៅហើយនេះ ពេលនេះគេត្រូវចាំមើលថាតុលាការសម្រេចថាត្រូវតាមចាប់តារាសម្ដែងស្រីខាងលើ ឬត្រូវទម្លាក់ករណីនេះចោល។

ការប្រកាសមួយរបស់កម្មវិធីទូរទស្សន៍ "Law of the Jungle” កាលពីថ្ងៃសុក្រ បានសម្ដែងការសុំទោសអស់ពីចិត្ត ដែលមិនបានដឹងអំពីច្បាប់ការពារសត្វព្រៃរបស់ប្រទេសថៃ។ "យើងនឹងប្រយ័ត្នប្រយែងឲ្យបានខ្លាំងជាងមុខ នៅពេលថតកម្មវិធីនាពេលអនាគត”។

គួរដឹងថា Lee Yeol-eum បានប្រឡូកក្នុងវិស័យសិល្បៈកាលពី ៦ ឆ្នាំមុន ដោយបានលេចមុខក្នុងខ្សែភាពយន្តភាគ "Monster” ចេញឆ្នាំ ២០១៦ និងភាពយន្តល្បីកាលពីឆ្នាំ ២០១៧ ចំណងជើង "The King” ផងដែរ៕ ចុចអាន៖

ប្រភព៖ Zing ប្រែសម្រួល៖ សុខហេង