សត្រូវស៊ូពូជ អ៊ីស្រាអែល និងអ៊ីរ៉ង់ សុទ្ធតែធ្វើតេស្តបាញ់មីស៊ីលជោគជ័យរៀងៗខ្លួន

2019-07-30 02:22:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ៊ីស្រាអែល និងសហរដ្ឋអាមេរិក បានបញ្ចប់ដោយជោគជ័យនូវការធ្វើតេស្តបាញ់មីស៊ីលបាលីស្ទីកចម្ងាយឆ្ងាយ Arrow 3 នៅរដ្ឋអាឡាស្កា កាលពីថ្ងៃទី២៨ ខែកក្កដា ឆ្នាំ២០១៩កន្លងទៅ ពោលគឺតែប៉ុន្មានថ្ងៃប៉ុណ្ណោះបន្ទាប់ពីអ៊ីរ៉ង់ បានធ្វើតេស្តបាញ់មីស៊ីលចម្ងាយមធ្យម។ ទោះជាយ៉ាងណា ចំពោះចម្ងាយ និងរយៈកម្ពស់នៃការបាញ់មីស៊ីល Arrow 3 នេះ មិនត្រូវបានទម្លាយឱ្យដឹងឡើយ។

មីស៊ីល Arrow 3 (រូបថត៖ វិបសាយ Times of Israel)

លោក Moshe Patel នាយកអង្គការមីស៊ីលអ៊ីស្រាអែល បានបញ្ជាក់ថា បន្ទាប់ពីការអភិវឌ្ឍប្រមាណ១០ឆ្នាំ ប្រព័ន្ធសព្វាវុធ Arrow 3 ដែលជាមីស៊ីលបាញ់ស្កាត់ បានបញ្ចប់យុទ្ធនាការធ្វើតេស្តសាកល្បង ដោយបាញ់ត្រូវគោលដៅ។

លោកបន្តថា ការបាញ់សាកល្បងនៅរដ្ឋអាឡាស្កា ដែលមានចម្ងាយរាប់ម៉ឺនគីឡូម៉ែត្រពីអ៊ីស្រាអែល គឺជាសមិទ្ធផលដ៏សំខាន់មួយផ្សេងទៀត ដែលបង្ហាញសមត្ថភាពប្រតិបត្តិការប្រព័ន្ធ Arrow 3 ក្នុងការប្រឈមនឹងការគំរាមកំហែង។

នាយករដ្ឋមន្រ្តីអ៊ីស្រាអែល លោក Benjamin Netanyahu បានថ្លែងចំៗថា អ៊ីស្រាអែលមានសមត្ថភាពប្រឆាំងនឹងមីស៊ីលបាលីស្ទីករសប់អ៊ីរង់បាន ដោយលោកថា នេះជាការជោគជ័យហួសពីការស្រមៃទៅទៀត។

កាលពីថ្ងៃពុធសប្តាហ៍មុន អ៊ីរ៉ង់ បានបាញ់សាកល្បងមីស៊ីលចម្ងាយមធ្យម Shahab-3 ដោយហោះបានចម្ងាយប្រហែល ១ពាន់គីឡូម៉ែត្រចេញពីភាគខាងត្បូង ទៅខាងជើងប្រទេស។ ប៉ុន្តែយោធាអ៊ីរ៉ង់ បានអះអាងថា ការធ្វើតេស្តនេះ មិនមានគោលដៅប្រឆាំងនឹងប្រទេសណាមួយឡើយ ពោលគឺមានគោលដៅទប់ទល់នឹងការឈ្លានពានណាមួយមកលើប្រទេសខ្លួនតែប៉ុណ្ណោះ៕