កូរ៉េខាងជើង បាញ់មីស៊ីល២គ្រាប់ទាំងព្រឹក និងជាលើកទី២ក្នុងសប្តាហ៍នេះ

2019-07-31 03:03:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសកូរ៉េខាងជើង បានបាញ់មីស៊ីលចម្ងាយខ្លី ២គ្រាប់នៅព្រឹកថ្ងៃទី៣១ ខែកក្កដា ឆ្នាំ២០១៩នេះ ចេញពីឆ្នេរសមុទ្រខាងកើតរបស់ខ្លួន។ នេះបើតាមការបញ្ជាក់របស់យោធាកូរ៉េខាងត្បូងក្នុងសេចក្តីថ្លែងការណ៍មួយ។

មីស៊ីលនេះ ត្រូវបានបាញ់ចេញពីតំបន់ Wonsan-Kalma ដោយហោះបានចម្ងាយប្រមាណ ២៥០គីឡូម៉ែត្រ កម្ពស់ ៣០គីឡូម៉ែត្រ មុនធ្លាក់ចូលសមុទ្រ។

រូបថត៖ AFP

យោធាកូរ៉េខាងត្បូង បានអះអាងថា ការបាញ់សាកល្បងមីស៊ីលបែបនេះ មិនបានធ្វើឱ្យភាពតានតឹងនៅឧបទ្វីបកូរ៉េ ធូរស្រាលវិញឡើយ។ «យើងអំពាវឱ្យបញ្ឈប់សកម្មភាពទាំងនេះ»។

ក្រសួងការពារជាតិជប៉ុន បានបញ្ជាក់ថា មិនមានមីស៊ីលណាមួយបានចូលដល់ដែនអធិបតេយ្យភាព ឬតំបន់សេដ្ឋកិច្ចផ្តាច់មុខរបស់ខ្លួនឡើយ ហើយការបាញ់មីស៊ីលរបស់កូរ៉េខាងជើង ក៏មិនបានគំរាមកំហែងដល់សន្តិសុខជប៉ុនផងដែរ។

កាលពីថ្ងៃទី២៥ ខែកក្កដាកន្លងទៅ កូរ៉េខាងជើង បានបាញ់មីស៊ីលប្រភេទថ្មី ២គ្រាប់ជាលើកដំបូង ចាប់តាំងពីជំនួបរវាងលោកប្រធានាធិបតីអាមេរិក ដូណាល់ ត្រាំ និងលោក គីម ជុងអ៊ុន មេដឹកនាំកូរ៉េខាងជើង ដែលធ្វើឡើងកាលពីចុងខែមិថុនា៕

ប្រភព៖ Channelnewsasia ប្រែសម្រួល៖ សំភី