លោក ហ៊ុយ វណ្ណៈ រដ្ឋលេខាធិការ​ក្រសួង​មហាផ្ទៃ ​ត្រូវបាន​តែងតាំង​ជាប្រធាន​ក្រុមការងារ​តាមដាន​ប្រព័ន្ធ​ទំនាក់​ទំនងបណ្តាញ​សង្គម​ហ្វេសប៊ុក​របស់​សម្តេច​នាយករដ្ឋមន្រ្តី ហ៊ុន សែន។ នេះបើតាមសេចក្តី​សម្រេច​ចុះហត្ថលេខាដោយ​សម្តេច ស ខេង ឧបនាយករដ្ឋមន្រ្តី រដ្ឋមន្រ្តី​ក្រសួង​មហាផ្ទៃ នៅថ្ងៃទី១៦ ខែសីហា ឆ្នាំ​២០១៩។

ចំណែក​លោក​ឧត្តម​សេនីយ៍ឯក ឆាយ គឹមខឿន អគ្គស្នងការ​រង នៃ​អគ្គស្នងការដ្ឋាន​នគរបាលជាតិ លោក​ឧត្តមសេនីយ៍ឯក លឹម ផាន់ភារៈ អគ្គលេខាធិការរង នៃអគ្គលេខាធិការដ្ឋាន និង​លោក​ស្រី តៅ សុខម៉ារ៉ា អគ្គនាយករង នៃ​អគ្គនាយកដ្ឋាន​រដ្ឋបាល ត្រូវបាន​តែងតាំង​ជាអនុប្រធាន​នៃក្រុមការងារ​នេះ។

ក្នុង​សេចក្តីសម្រេចនេះ បាន​បញ្ជាក់​ថា ក្រុមការងារ​នេះមាន​ភារកិច្ច​តាមដាន និង​ជួយ​ស្រាវជ្រាវ​ទំព័រ​បណ្តាញ​សង្គមហ្វេសប៊ុកសម្តេច​ ហ៊ុន សែន និងមាន​តួនាទី​ឆ្លើយតប​តាម​ជំនាញ​នីមួយៗ ស្រប​តាម​គោលការណ៍​របស់​ក្រសួង​មហាផ្ទៃ ចំពោះ​មតិ​មហាជន ដែល​បង្ហោះនៅក្នុង​ទំព័រ​បណ្តាញ​សង្គម​ហ្វេសប៊ុករបស់​សម្តេច ហ៊ុន សែន ពាក់ព័ន្ធ​នឹង​វិស័យ​សន្តិសុខ សុវត្ថិភាព និង​សណ្តាប់​ធ្នាប់​សាធារណៈ។ តាម​ដាន​ការផ្សព្វផ្សាយ និង​ឆ្លើយតប​ឱ្យបាន​ទាន់ពេលវេលា លើ​ប្រព័ន្ធ​ទំនាក់ទំនង​បណ្តាញ​សង្គម និង​ប្រព័ន្ធ​ផ្សព្វផ្សាយ​ឌីជីថល​ផ្សេងៗ ដែល​ពាក់ព័ន្ធ​នឹង​សមត្ថកិច្ច​ក្រសួងមហាផ្ទៃ៕