លោក ហ៊ុន ម៉ាណែត៖ កម្ពុជាគ្រប់គ្រងបាននូវស្ថិរភាពជាតិ-ទប់ទល់នឹងការឈ្លានពានបាន
- 2019-08-17 02:30:26
- ចំនួនមតិ 0 | ចំនួនចែករំលែក 0
លោក ហ៊ុន ម៉ាណែត៖ កម្ពុជាគ្រប់គ្រងបាននូវស្ថិរភាពជាតិ-ទប់ទល់នឹងការឈ្លានពានបាន
ចន្លោះមិនឃើញ
លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានបញ្ជាក់ថា «យើងគ្រប់គ្រងបាននូវស្ថិរភាពជាតិ គឺជាមោទនភាពជាតិរបស់យើង កងទ័ពរបស់យើង ប្រទេសយើងមានមុខមានមាត់ ជាប្រទេសមួយទប់ទល់នឹងការឈ្លានពានបាន រក្សាស្ថិរភាពបាន ប្រទេសយើងចេញទៅក្រៅ មោទនភាពនៅលើឆាកអន្តរជាតិ ដែលកិច្ចការទាំងអស់ នាយទាហានជំនាន់ក្រោយត្រូវចូលរួមចំណែកបន្តវេនការពារជាតិ និងអភិវឌ្ឍប្រទេសជាតិឲ្យមានការរីកចម្រើន»។ ការបញ្ជាក់នេះ នៅក្នុងពិធីសំណេះសំណាល និងពិសារបាយសាមគ្គីជាមួយសិក្ខាកាមយោធាកម្ពុជាដែលកំពុងសិក្សានៅសហព័ន្ធរុស្ស៊ី កាលពីថ្ងៃទី១៥ ខែសីហា ឆ្នាំ២០១៩។
លោកបានបញ្ជាក់ទៀតថា ការបណ្ដុះបណ្ដាលនាយទាហាន គឺសំខាន់ណាស់ ព្រោះនាយទាហាន គឺជាឆ្អឹងខ្នងនៃកងទ័ព ដែលមានកម្រិតយុទ្ធសាស្ត្រ យុទ្ធនាការ និងយុទ្ធវិធី។ លោកបានកោតសរសើរដល់ការសម្រេចបានលទ្ធផលដ៏ត្រចះត្រចង់រហូតទទួលបានសញ្ញាប័ត្រក្រហមដែលពិបាកនឹងកម្រទទួលបានណាស់ និងទទួលស្នាដៃជាច្រើនទៀតដែលបានទទួលនូវការកោតសរសើរពីសាលា និងថ្នាក់ដឹកនាំនៃសហព័ន្ធរុស្ស៊ី។
ក្រសួងការពារជាតិ នឹងផ្ដល់លិខិតសរសើរចំពោះនិស្សិតឆ្នើមដែលមានស្នាដៃ និងលទ្ធផលល្អដើម្បីជាការលើកទឹកចិត្តសិក្ខាកាមយោធាដែលកំពុងសិក្សានៅសហព័ន្ធរុស្ស៊ី ក៏ដូចជាប្រទេសដទៃទៀត។ «នេះគឺជាការលើកទឹកចិត្តសំខាន់ណាស់សម្រាប់នាយទាហានជំនាន់ក្រោយ ព្រោះអនាគតរបស់យើងត្រូវចូលរួមចំណែកទទួលខុសត្រូវនៅក្នុងការពង្រឹងកងទ័ព ដើម្បីការពារសន្តិភាព ស្ថិរភាព បូរណភាពទឹកដីរបស់យើងសម្រាប់កូនចៅជំនាន់ក្រោយ។ ព្រោះផលប្រយោជន៍នៃការការពារជាតិមិនមែនសម្រាប់តែអ្នកដែលពាក់ឯកសណ្ឋានកងទ័ពនោះទេ ប៉ុន្តែគឺផលប្រយោជន៍សម្រាប់ទាំងអស់គ្នា»៕ នេះជាលើកឡើងបន្ថែមរបស់លោក ហ៊ុន ម៉ាណែត៕