កងកម្លាំងកម្ពុជា កំពុងស្វែងរកពលរដ្ឋខ្មែរ២នាក់ ដែលបាត់ខ្លួនក្នុងហេតុការណ៍បាក់ដីភ្នំ
- 2019-09-18 06:28:28
- ចំនួនមតិ 0 | ចំនួនចែករំលែក 0
កងកម្លាំងកម្ពុជា កំពុងស្វែងរកពលរដ្ឋខ្មែរ២នាក់ ដែលបាត់ខ្លួនក្នុងហេតុការណ៍បាក់ដីភ្នំ
ចន្លោះមិនឃើញ
នៅថ្ងៃទី១៨ ខែកញ្ញា ឆ្នាំ២០១៩នេះ កម្លាំងចម្រុះ២៥នាក់ ដែលមានអាជ្ញាធរ កងកម្លាំងប្រដាប់អាវុធ និងប្រជាពលរដ្ឋ បានបន្តប្រតិបត្តិការរុករកប្រជាពលរដ្ឋខ្មែរចំនួន២នាក់ ដែលបានបាត់ខ្លួន នៅចំណុចព្រំដែនកម្ពុជា-ថៃ ច្រកពាមតា ឃុំតាតោក ស្រុកសំឡូត ខេត្តបាត់ដំបង កាលពីថ្ងៃទី១៦ ខែកញ្ញា ឆ្នាំ២០១៩។ ដោយសារតែពលរដ្ឋខ្មែរទាំង២រូបនេះ បាត់ខ្លួននៅក្នុងទឹកដីថៃ ភាគីកម្ពុជាក៏បាននឹងកំពុងសហការជាមួយភាគីថៃ ដើម្បីរុករកជនរងគ្រោះផងដែរ។
ប្រតិបត្តិការនេះ កំពុងទទួលបានការយកចិត្តទុកដាក់ និងបញ្ជាផ្ទាល់ពីលោក គន់ គីម ទេសរដ្ឋមន្រ្តីទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ខណៈដែលក្រុមការងារ កំពុងតែមមាញឹកក្នុងប្រតិបត្តិការរុករក។
សូមបញ្ជាក់ថា កាលពីថ្ងៃចន្ទ មានពលរដ្ឋ៧នាក់ បានចូលទៅក្នុងព្រៃ នៅចំណុចព្រំដែនកម្ពុជា-ថៃ ច្រកពាមតា ឃុំតាតោក ហើយត្រូវបានជំនន់ទឹកភ្លៀងវាយប្រហារបណ្តាលឱ្យដីភ្នំបាក់សង្កត់ ក្នុងនោះមានពលរដ្ឋ៤នាក់ បានរត់រួចខ្លួន ម្នាក់រងរបួសធ្ងន់ និង២នាក់បាត់ខ្លួន៕
អត្ថបទ និងរូបថត៖ ហ្វេសប៊ុកលោកនាយឧត្តមសេនីយ៍ ឈុំ សុជាត