ក្មេងស្រីជនបទម្នាក់នៅកម្ពុជា ដើរតួនាទីជំនួសឯកអគ្គរាជទូតស៊ុយអែត

2019-10-11 06:45:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅថ្ងៃទី១១ ខែតុលា ឆ្នាំ២០១៩នេះ ក្មេងស្រីម្នាក់ឈ្មោះ ស្រីភា អាយុ ១៥ឆ្នាំ មកពីខេត្តស្ទឹងត្រែង បានដើរតួនាទីជាឯកអគ្គរាជទូតស៊ុយអែតប្រចាំនៅកម្ពុជា នាឱកាសអបអរទិវាក្មេងស្រីអន្តរជាតិ។ នេះជាកម្មវិធី «ក្មេងស្រីកាន់តួនាទីជំនួស ឬ Girls Takeover» ដែលរៀបចំឡើងដោយស្ថានទូតស៊ុយអែត និងអង្គការភ្លែនអន្តរជាតិកម្ពុជា មានគោលបំណងបង្ហាញពីសក្តានុពល និងភាពជាអ្នកដឹកនាំរបស់ក្មេងស្រី ហើយជាមួយគ្នានេះដែរ ឆ្លុះបញ្ចាំងអំពីបញ្ហាយេនឌ័រ។

កម្មវិធីនេះ គឺជាចលនាសកលមួយដែលអំពាវនាវឱ្យមានការផ្លាស់ប្តូរក្នុងសង្គម និងនយោបាយសំដៅលុបបំបាត់ឧបសគ្គនានា ការរើសអើង និងភាពលម្អៀងដែលនៅតែរាំងស្ទះដល់វឌ្ឍនភាពរបស់ក្មេងស្រី។ តាមរយៈចលនានេះ ក្មេងស្រីទទួលបានឱកាសនានាដែលពួកគេមិនសូវបានឃើញ ឬស្តាប់លឺ ហើយវាបង្ហាញយ៉ាងច្បាស់ថាពួកគេមានសិទ្ធិចាប់យកក្តីស្រមៃរបស់ខ្លួនដោយមិនមានភាពភ័យខ្លាចអ្វីឡើយ។

ស្រីភា និយាយថា៖ «ក្នុងសហគមន៍របស់ខ្ញុំ ក្មេងស្រីប្រឈមនឹងបញ្ហាជាច្រើនដូចជា ការរៀបការវ័យក្មេង ការបោះបង់ការសិក្សា ផ្នត់គំនិតយេនឌ័រអវិជ្ជមាន និងកង្វះបុគ្គលគំរូសម្រាប់ក្មេងស្រី។ ការរៀបការវ័យក្មេង គឺជាបញ្ហាធ្ងន់ធ្ងរជាងគេដែលចង់ដោះស្រាយ»។

កម្មវិធីនេះ បានផ្តល់ឱកាសឱ្យនាងពិភាក្សាពីបញ្ហាការរៀបការវ័យក្មេងជាមួយស្ថានទូតស៊ុយអែត។ នាងចង់ដឹងវិធានការនានាក្នុងការបញ្ឈប់ការរៀបការវ័យក្មេងដើម្បីឱ្យក្មេងស្រីអាចសម្រេចសក្តានុពលរបស់ខ្លួនបានពេញលេញ។ នេះជាលើកឡើងបន្ថែមរបស់ស្រីភា។

លោក Samuel Hurtig ភារៈធារីស្ថានទូតស៊ុយអែតប្រចាំនៅកម្ពុជា និយាយថា៖ «ការកាន់តួនាទីជំនួសរបស់ស្រីភានៅក្នុងស្ថានទូតស៊ុយអែត គឺជាឱកាសមួយឆ្លុះបញ្ចាំងពីសិទ្ធិរបស់ក្មេងស្រីដែលជាផ្នែកមួយនៃគោលនយោបាយការបរទេសស្តីពីស្រ្តីនិយមរបស់ប្រទេសស៊ុយអែត និងការលើកកម្ពស់លទ្ធិប្រជាធិបតេយ្យ។ តាមរយៈការកាន់តួនាទីជំនួសអ្នកដឹកនាំនេះ ស្រីភាអាចលើកឡើងពីបញ្ហារបស់ក្មេងស្រីនៅក្នុងសហគមន៍របស់ខ្លួនដើម្បីធានាថា តម្រូវការ និងសិទ្ធិរបស់ពួកគេមិនត្រូវបានមើលរំលង។ នៅពេលក្មេងស្រីដូចជា ស្រីភា ទទួលបានឱកាសស្មើភាពក្នុងជីវិតដូចអ្នកដទៃ នោះនាងនឹងអាចផ្លាស់ប្តូរជីវិត និងសហគមន៍របស់ខ្លួន តាមរយៈការចូលរួមបង្កើតពិភពមួយដែលកាន់តែមានភាពល្អប្រសើរសម្រាប់មនុស្សគ្រប់រូប»។

ក្មេងស្រី និងស្រ្តីវ័យក្មេង នៅប្រទេសកម្ពុជា កំពុងប្រឈមវិសមភាពយេឌ័រទាំងនៅផ្ទះ សហគមន៍ និងកន្លែងធ្វើការ។ ពួកគាត់មិនមានសិទ្ធិអំណាចគ្រប់គ្រាន់ក្នុងផ្នែកសេដ្ឋកិច្ច មិនសូវបានចូលរួមក្នុងការធ្វើសេចក្តីសម្រេចចិត្តសាធារណៈ និងចូលរួមក្នុងកិច្ចការនយោបាយ ក៏ដូចជាប្រឈមនឹងអំពើហិង្សាផ្លូវកាយ និងការព្រួយបារម្ភពីសុវត្ថិភាពផ្ទាល់ខ្លួនផងដែរ។

ចំណែកលោកស្រី Gwynneth Wong នាយកប្រចាំប្រទេសនៃអង្គការភ្លែនអន្តរជាតិកម្ពុជា លើកឡើងថា ក្មេងស្រីនៅទូទាំងពិភពលោកកំពុងប្រឈមនឹងឧបសគ្គធំៗជាច្រើនក្នុងការអភិវឌ្ឍខ្លួន និងសម្រេចក្តីស្រមៃរបស់ខ្លួន។ ជាញឹកញាប់ ក្មេងស្រីគ្មានអំណាចលើការសម្រេចចិត្ត ឬជម្រើសរបស់ខ្លួនឡើយ។ នៅពេលដែលក្មេងស្រីមានឱកាសនិយាយ និងដើរតនាទីជាអ្នកដឹកនាំ ពួកគេនឹងលើកឡើងយ៉ាងច្បាស់ពីគំនិត ក្តីស្រមៃ និងមតិយោបល់របស់ខ្លួន។

លោកស្រីបន្តថា រដ្ឋាភិបាលស៊ុយអែត និងអង្គការភ្លែនអន្តរជាតិអំពាវនាវឱ្យមានការបង្កើនការវិនិយោគលើអំណាច និងភាពជាអ្នកដឹកនាំរបស់ក្មេងស្រី និងស្រ្តីវ័យក្មេងដើម្បីបញ្ឈប់ការរៀបការវ័យក្មេង៕

អត្ថបទ និងរូបថត៖ ស្ថានទូតស៊ុយអែតប្រចាំនៅកម្ពុជា