សម្តេច ហ៊ុន សែន នឹងទៅកាន់ប្រទេសទាំង៣នេះ ក្នុងរយៈពេល៥ថ្ងៃ

2019-10-11 07:56:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ហ៊ុន សែន នឹងអញ្ជើញទៅបំពេញទស្សនកិច្ចនៅប្រទេសចំនួន៣ នៅអឺរ៉ុប ពីថ្ងៃទី១៣ ដល់ ១៧ ខែតុលា ឆ្នាំ២០១៩ រួមមាន៖

១.សាធារណរដ្ឋឆែក ពីថ្ងៃទី ១៣-១៤ តុលា

-សម្តេច ហ៊ុន សែន នឹងចូលជួបសម្តែងការគួរសមជាមួយលោក Jaroslav Kubera ប្រធានព្រឹទ្ធសភាឆែក

-បន្ទាប់ពីកិច្ចប្រជុំចង្អៀត សម្តេច ហ៊ុន សែន និងលោក អេនដ្រេហ្គ បាប៊ីស នឹងជួបពិភាក្សាទ្វេភាគីលើទិដ្ឋភាពផ្សេងៗនៃកិច្ចសហប្រតិបត្តិការទ្វេភាគី។ នាយករដ្ឋមន្រ្តី ក៏នឹងផ្លាស់ប្តូរទស្សនៈគ្នាទៅវិញទៅមកលើបញ្ហាតំបន់ និងអន្តរជាតិដែលជាការយកចិត្តទុកដាក់រួម។ ក្រោយជំនួបនេះ នាយករដ្ឋមន្រ្តីទាំង២ នឹងអញ្ជើញជាអធិបតីក្នុងពិធីចុះហត្ថលេខាលើឯកសារមួយចំនួនស្តីពីកិច្ចសហប្រតិបត្តិការទ្វេភាគី និងធ្វើសេចក្តីប្រកាសព័ត៌មានរួមគ្នា។

២. ហុងគ្រី ថ្ងៃទី១៥តុលា

-សម្តេច ហ៊ុន សែន នឹងចូលរួមកិច្ចប្រជុំកំពូលស្តីពីទឹក លើកទី៣ នៅថ្ងៃទី១៥ ខែតុលា ឆ្នាំ២០១៩ នៅទីក្រុងប៊ុយដាប៉ែស។ កិច្ចប្រជុំនេះ ធ្វើឡើងក្រោមប្រធានបទ «ការទប់ស្កាត់វិបត្តិទឹក» ដែលនឹងផ្តល់ឱកាសដល់ថ្នាក់ដឹកនាំ និងអ្នកចូលរួមទាំងអស់ចែករំលែកបទពិសោធន៍ និងផ្លាស់ប្តូរទស្សនៈ ដើម្បីជំនះនូវបញ្ហាប្រឈមនានា ទាំងនៅក្នុងតំបន់ និងសកលលោកនាពេលបច្ចុប្បន្ន សំដៅធ្វើយ៉ាងណាសម្រេចឱ្យបាននូវការរីកលូតលាស់ប្រកបដោយចីរភាព និងបរិយាប័ន្ន ជាពិសេសទប់ស្កាត់វិបត្តិទឹកឱ្យបាន។

-សម្តេច ក៏នឹងអញ្ជើញជួបសម្តែងការគួរសមជាមួយលោក យ៉ាណូស អាឌ័រ ប្រធានាធិបតីហុងគ្រី ព្រមទាំងទទួលការចូលជួបសម្តែងការគួរសមដាច់ដោយឡែកជាមួយលោក Li Yong អគ្គនាយកអង្គការអភិវឌ្ឍឧស្សាហកម្មសហប្រជាជាតិ។

៣. ប៊ុលហ្គារី ១៥-១៦ តុលា

-សម្តេចនឹងជួបពិភាក្សាទ្វេភាគីជាមួយលោក បូយកូ បូរីសសុវ នាយករដ្ឋមន្រ្តីប៊ុលហ្គារី ដោយនឹងពិភាក្សាលើបញ្ហានានាពាក់ព័ន្ធនឹងកិច្ចសហប្រតិបត្តិការទ្វេភាគី តំបន់ និងអន្តរជាតិ ដែលមានផលប្រយោជន៍ទៅវិញទៅមក និងការបារម្ភរួមគ្នា។ នៅចុងបញ្ចប់នៃជំនួប នាយករដ្ឋមន្រ្តីទាំង២ នឹងអញ្ជើញជាអធិបតីក្នុងពិធីចុះហត្ថលេខាលើឯកសារកិច្ចសហប្រតិបត្តិការមួយចំនួន៕

ប្រភព៖ ក្រសួងការបរទេស

អត្ថបទ៖ សំភី