ក្រុង​មូស្គូ​បាន​ប្រកាស​កាល​ពី​ថ្ងៃ​ទី​១៥​ ខែ​តុលា ​ឆ្នាំ​២០១៩​ ថា​កងទ័ព​របស់​ពួក​គេ​បាន​ទៅ​ល្បាត​នៅ​តំបន់​ខាង​ជើង​ស៊ីរី​។ នៅ​ពេល​ជា​មួយ​គ្នា​នេះ ​អ្នក​សារព័ត៌មាន​ភ្ជាប់​ជា​មួយ​កង​កម្លាំង​រុស្សី​បាន​បង្ហោះ​វីដេអូ​បង្ហាញ​ទាហាន​រុស្សី​ចូល​កាន់​បន្ទាយ​ដែល​អាមេរិក​បោះបង់​នៅ​ជិត​ក្រុង​ Manbij។

ក្នុង​វីដេអូ​បង្ហោះ​ចូល​បណ្ដាញ​សង្គម​ Facebook អ្នក​សារព័ត៌មាន​ខាង​លើ​ លោក Oleg Blokin បាន​និយាយ​ថា​៖ «អរុណ​សួស្ដី! យើង​ឥលូវ​នេះ​ស្ថិត​នៅ​ក្នុង​បន្ទាយ​ទាហាន​សហរដ្ឋ​អាមេរិក​នៅ​ Manbij​។ ត្រឹម​ព្រឹក​ម្សិល​មិញ​ទេ​ពួក​គេ​នៅ​ទីនេះ​ហើយ​ថ្ងៃ​នេះ​យើង​នៅ​ទីនេះ​វិញ​។ តោះ​មក​មើល​របៀប​ពួក​គេ​រស់​នៅ​ទីនេះ»​។

វីដេអូ​របស់​ លោក Blokin ដែល​ត្រូវ​បាន​ផ្ទៀងផ្ទាត់​ដោយ​ស្ថាប័ន​សារព័ត៌មាន​ Storyful បង្ហាញ​តង់​ជា​ច្រើន​ដែល​មាន​គ្រប​ដោយ​សំណាញ់​បិទបាំង​ និង​អង់តែន​វិទ្យុ​ទំនាក់​ទំនង​។ ក្នុង​វីដេអូ​មួយ​ទៀត​ លោក​ Blokin បង្ហាញ​របាំង​មេកានិច​ សម្រាប់​បិទ​បើក​ផ្លូវ​ចូល​បន្ទាយ​។ រូបភាព​ទាំង​នេះ​ដូច​នឹង​រូបភាព​ពី​មុន​ៗ​នៃ​បន្ទាយ​នេះ ដែល​បាន​បញ្ចេញ​ដោយ​សហរដ្ឋ​អាមេរិក​ផ្ទាល់​។

មន្ត្រី​អាមេរិក​ម្នាក់​បាន​ប្រាប់​អ្នក​សារព័ត៌មាន​កាល​ពី​ថ្ងៃ​ទី​១៤ ខែ​តុលា​ ឆ្នាំ​២០១៩ ថា​ទាហាន​អាមេរិក​បាន​ដក​ខ្លួន​ចេញ​ពី​តំបន់​ Manbij ហើយ។ អ្នក​នាំ​ពាក្យ​យោធា​អាមេរិក លោក​ វរសេនីយ៍ឯក Myles B. Caggins III បាន​បដិសេធ​មិន​និយាយ​ថា​តើ​រុស្សី​ពិត​ជា​បាន​យក​បន្ទាយ​នេះ​មែន​ ឬ​ក៏​អត់។

លោក​ Blokin គឺ​ជា​អ្នក​សារព័ត៌មាន​ធ្វើ​ការ​ឲ្យ​ស្ថាប័ន​សារព័ត៌មាន​ Abkazian Network News Agency (ANNA) ដែល​គាំទ្រ​រដ្ឋាភិបាល​រុស្សី ហើយ​តែង​តែ​ភ្ជាប់​ទៅប្រមាញ់​យក​ព័ត៌មាន​​ជា​មួយ​កង​កម្លាំង​រដ្ឋាភិបាល​ស៊ីរី​៕