អគ្គមេបញ្ជាការកងទ័ពកូរ៉េថា ទំនាក់ទំនងកងទ័ពកម្ពុជា-កូរ៉េកាន់តែជិតស្និទ្ធ
- 2019-10-18 03:55:05
- ចំនួនមតិ 0 | ចំនួនចែករំលែក 0
អគ្គមេបញ្ជាការកងទ័ពកូរ៉េថា ទំនាក់ទំនងកងទ័ពកម្ពុជា-កូរ៉េកាន់តែជិតស្និទ្ធ
ចន្លោះមិនឃើញ
នាយឧត្តមសេនីយ៍ ប៉ាក ហានគី (Park Han Ki) អគ្គមេបញ្ជាការ កងទ័ពកូរ៉េ បានទទួលជួបពិភាក្សាការងារជាមួយ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក កាលពីថ្ងៃទី ១៧ ខែតុលា ឆ្នាំ២០១៩ នៅទីបញ្ជាការអគ្គបញ្ជាការ កងទ័ពកូរ៉េ ។
ក្នុងជំនួបនេះ នាយឧត្តមសេនីយ៍ ប៉ាក ហានគី បានសម្ដែងក្តីសប្បាយរីករាយដែលឃើញការអភិវឌ្ឍរីកចម្រើនឥតឈប់ឈររបស់ប្រទេសកម្ពុជា និងការពង្រឹងទំនាក់ទំនងរវាងប្រទេសជាតិទាំងពីរ ជាពិសេសការផ្លាស់ប្តូរទស្សនកិច្ច របស់ប្រមុខរដ្ឋ និងរដ្ឋាភិបាល។
នាយឧត្តមសេនីយ៍ បានបន្តថា ក្រោមការផ្តួចផ្តើមគំនិតថ្មី របស់មេបញ្ជាការកងទ័ពជើងគោកកម្ពុជានោះទំនាក់ទំនងកងទ័ពនៃប្រទេសទាំងពីរកាន់តែជិតស្និតគ្នា ហើយកងទ័ពកូរ៉េ នឹងបន្តពង្រឹងកិច្ចសហការជាមួយកងទ័ពកម្ពុជាទៅថ្ងៃអនាគត។
មេបញ្ជាការកងទ័ពជើងគោកកម្ពុជា បានរំលឹកពីទំនាក់ទំនងការទូតកម្ពុជា និងកូរ៉េ ជាពិសេសចាប់ពីឆ្នាំ ១៩៩៧ មក ប្រទេស និងប្រជាជនទាំងពីរជាតិសាសន៍ បានយោគយល់ និងជួយគ្នា ស្ទើរគ្រប់វិស័យ នៅប្រទេសកម្ពុជា មានប្រជាជនកូរ៉េរស់នៅ ឯនៅប្រទេសកូរ៉េ ក៏មានប្រជាពលរដ្ឋខ្មែររស់នៅផងដែរ។
ក្នុងវិស័យការពារជាតិ ប្រទេសកូរ៉េ ក៏បានរួមចំណែកក្នុងការអភិវឌ្ឍ តាមរយៈការបណ្តុះបណ្តាល ហ្វឹកហ្វឺន និងជំនួយមធ្យោបាយ សំភារ:បចេ្ចកទេសមួយចំនួនកន្លងទៅ។ ឧត្តមសេនីយ៍ ហ៊ុន ម៉ាណែត ជឿជាក់ថា ប្រទេសទាំងពីរ នឹងបន្តសហការបន្ថែមទៀតនៅពេលអនាគត៕