នឹងមានទីក្រុងលិចទឹកច្រើនជាងមុននៅឆ្នាំ ២០៥០ ដោយការកើនឡើងកម្ពស់ទឹកសមុទ្រ

2019-11-04 07:13:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ការកើនឡើងនៃកម្ពស់នីវ៉ូទឹកសមុទ្រអាចនឹងផ្ដល់ផលប៉ះពាល់ដល់មនុស្សច្រើនជាងមុននៅត្រឹមឆ្នាំ ២០៥០ បើប្រៀបធៀបនឹងការព្យាករណ៍ពេលមុន។ នេះបើផ្អែកតាមការស្រាវជ្រាវថ្មីដែលធ្វើឡើងដោយអង្គភាពវិទ្យាសាស្ត្រ Climate Central មានមូលដ្ឋាននៅរដ្ឋ New Jersey សហរដ្ឋអាមេរិក ចុះផ្សាយនៅថ្ងៃអង្គារសប្ដាហ៍កន្លងទៅ។

ការសិក្សាថ្មីនេះមានភាពច្បាស់ការណ៍ជាងមុន ដោយគេធ្វើការគណនាការបាត់ផ្ទៃដីគោកដោយផ្អែកតាមការមើលតាមរយៈផ្កាយរណប ហើយគេរកឃើញថាតួលេខចាស់ និងតួលេខថ្មីមានការខុសគ្នាច្រើន។ តួលេខថ្មីបង្ហាញថាមានប្រជាជន ១៥០ លាននាក់កំពុងរស់លើដីគោកដែលនឹងស្ថិតនៅក្រោមកម្ពស់នីវ៉ូទឹកសមុទ្រនៅត្រឹមឆ្នាំ ២០៥០។

ជាក់ស្ដែងរូបភាពខាងលើគឺជាការប្រៀបធៀបរវាងការព្យាករណ៍ចាស់ (ខាងឆ្វេង) និងថ្មី (ខាងស្ដាំ)។ រូបភាពថ្មីបានថានៅផ្នែកខាងក្រោមនៃប្រទេសវៀតណាម នឹងស្ថិតនៅក្រោមទឹកជម្រៅជ្រៅ។ មានមនុស្សជាង ២០ លាននាក់ នៅវៀតណាម (ស្មើនឹងជិត ១/៤ នៃប្រជាជនសរុប) រស់នៅលើដីដែលនឹងលិចទឹក។

ភាគច្រើននៃទីក្រុងហូជីមិញ ដែលជាមណ្ឌលសេដ្ឋកិច្ចរបស់ប្រទេស អាចនឹងបាត់ខ្លួន។ គួរដឹងថាការសិក្សានេះមិនបានរាប់បញ្ចូលនូវការកើនឡើងចំនួនប្រជាជន ឬការបាត់បង់ទឹកដីនាពេលអនាគតនោះទេ។

ចំណែកនៅប្រទេសថៃ មានប្រជាជនជាង ១០% នៃចំនួនប្រជាជនសរុប កំពុងរស់នៅលើដីដែលទំនងជានឹងលិចនៅត្រឹមឆ្នាំ ២០៥០ ប្រៀបធៀបនឹងតួលេខមុនមានត្រឹម ១% ប៉ុណ្ណោះ។ ទីក្រុងបាងកកក៏នឹងរងការប៉ះពាល់ធ្ងន់ផងដែរ។

នៅទីក្រុងសៀងហៃ ដែលជាទីក្រុងសេដ្ឋកិច្ចសំខាន់បំផុតនៅអាស៊ី មានទឹកគំរាមកំហែងយកបេះដូងនៃទីក្រុងនេះ និងទីក្រុងជាច្រើនទៀតដែលនៅជុំវិញវា។ ការព្យាករណ៍ថ្មីក៏បានសន្និដ្ឋានដែរថាផ្នែកភាគច្រើននៃទីក្រុងម៉ុមប៉ៃ ប្រទេសឥណ្ឌា ក៏ប្រឈមនឹងការបាត់បង់ដីគោកផងដែរ។

ទីក្រុង Alexandria ប្រទេសអេហ្សីបក៏អាចនឹងបាត់បង់ដោយសារការកើនឡើងនៃកម្ពស់ទឹកសមុទ្រផងដែរ។ ឯទីក្រុង Basra ដែលជាទីក្រុងធំជាងគេនៅប្រទេសអ៊ីរ៉ាក់ ភាគច្រើនអាចនឹងលិចលង់ដោយសារទឹកនៅត្រឹមឆ្នាំ ២០៥០៕

ចុចអាន ៖ កន្លែងទាំង១០ នៅមីយ៉ាន់ម៉ា បើបានទៅ ធានាថាមិនខកបំណងទេ

ប្រភព៖ nytimes ប្រែសម្រួល៖ សុខហេង