កម្ពុជា-សិង្ហបុរី គ្រោងរៀបចំមហោស្រពសិល្បៈតាមដងវិថីនាដើមឆ្នាំ២០២០

2019-11-21 06:27:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្ថានទូតសិង្ហបុរីប្រចាំកម្ពុជា បានស្នើសុំកិច្ចសហការជាមួយក្រសួងទេសចរណ៍ ក្នុងការរៀបចំឱ្យមានព្រឹត្តិការណ៍ដ៏ធំមួយនោះគឺ «មហោស្រពសិល្បៈតាមដងវិថី» នៅរាជធានីភ្នំពេញ នាកំឡុងខែកុម្ភៈ ឆ្នាំ២០២០ ខាងមុខ។ ការស្នើសុំកិច្ចសហការនេះត្រូវបានធ្វើឡើងក្នុងជំនួបពិភាក្សាការងាររវាង លោក ថោង ខុន រដ្ឋមន្ត្រីក្រសួងទេសចរណ៍ និងលោក តាន់ មីឆាអ៊ែល (Michael Tan) ឯកអគ្គរដ្ឋសិង្ហបុរីប្រចាំកម្ពុជា នៅទីស្ដីការក្រសួងទេសចរណ៍ កាលថ្ងៃទី២០ ខែវិច្ឆិកា ឆ្នាំ២០១៩។

រូបភាព៖ ក្រសួងទេសចរណ៍

ឯកអគ្គរដ្ឋទូតសិង្ហបុរី បានឱ្យដឹងថា ស្ថានទូតរបស់លោកមានបំណងចង់រៀបចំឱ្យមាន «មហោស្រពសិល្បៈតាមដងវិថី ឬហៅថា Street Art Festival» នៅរាជធានីភ្នំពេញ ដើម្បីអបអរសាទរខួបលើកទី៥៥ នៃទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋសិង្ហបុរី។ ហេតុដូច្នេះហើយ ទើបស្ថានទូតសិង្ហបុរីស្នើសុំឱ្យមានការសហការពីសំណាក់ក្រសួងទេសចរណ៍ និងក្រសួងវប្បធម៌ និងវិចិត្រសិល្បៈរបស់កម្ពុជា ដើម្បីផ្ដល់អនុសាសន៍បន្ថែម និងចូលរួមរៀបចំព្រឹត្តិការណ៍ទេសចរណ៍ និងវប្បធម៌នេះឱ្យប្រព្រឹត្តទៅប្រកបដោយភាពអធិកអធម និងបន្សល់ទុកនូវអត្ថន័យស្ថិតស្ថិរយូរអង្វែង។

លោក ថោង ខុន ពិតជាមានការគាំទ្រយ៉ាងពេញទំហឹងចំពោះបំណងចង់រៀបចំ «មហោស្រពសិល្បៈតាមដងវិថី» ខាងលើនេះ ដោយបានចាត់ឱ្យលោក ប៉ាក់ សុខុម រដ្ឋលេខាធិការក្រសួងទេសចរណ៍ ដឹកនាំមន្ត្រីជំនាញពាក់ព័ន្ធសហការជាមួយស្ថានទូតសិង្ហបុរី និងក្រសួងវប្បធម៌ ធ្វើយ៉ាងណារៀបចំព្រឹត្តិការណ៍នេះឱ្យបានល្អប្រសើរ។

លោក តាន់ មីឆាអ៊ែល បានលើកឡើងថា ព្រឹត្តិការណ៍មហោស្រពនោះ ប្រជាពលរដ្ឋ និងភ្ញៀវទេសចរទូទាំងក៏អាចចូលលេងកម្សាន្ត ទស្សនាសិល្បៈចម្រុះ ទទួលទានអាហារ និងភេសជ្ជៈ គូគំនូលើជញ្ជាំងដែលគេរៀបចំទុកសម្រាប់គូគំនូ ព្រមទាំងមានកម្មវិធីកម្សាន្តផ្សេងៗទៀតជាច្រើន។ ប្រសិនបើការរៀបចំមហោស្រពនេះទទួលបានជោគជ័យ ស្ថានទូតសិង្ហបុរីនឹងបន្តកិច្ចសហការរៀបចំនៅតាមបណ្ដាខេត្តសំខាន់ៗផ្សេងទៀត ដូចជា ខេត្តសៀមរាប ខេត្តព្រះសីហនុ ខេត្តបាត់ដំបងជាដើម៕

អត្ថបទ៖ ម៉េងងី