វិនិយោគិនអាមេរិកមួយក្រុម កំពុងស្វែងរកឱកាសវិនិយោគលើវិស័យទេសចរណ៍ នៅកម្ពុជា
- 2019-11-25 10:27:29
- ចំនួនមតិ 0 | ចំនួនចែករំលែក 0
វិនិយោគិនអាមេរិកមួយក្រុម កំពុងស្វែងរកឱកាសវិនិយោគលើវិស័យទេសចរណ៍ នៅកម្ពុជា
ចន្លោះមិនឃើញ
ប្រតិភូវិនិយោគ និងទេសចរណ៍មួយក្រុម បានស្កាត់ពីទីក្រុងឡូសអេនជេលេស រដ្ឋកាលីហ្វ័រញ៉ា សហរដ្ឋអាមេរិក ដើម្បីស្វែងរកឱកាសវិនិយោគ លើវិស័យទេសចរណ៍ ថាមពល និងវិស័យនានានៅកម្ពុជា ខណៈបរិយាកាសវិនិយោគក្នុងប្រទេសសន្តិភាពមួយនេះ កំពុងផ្ដល់ភាពអនុគ្រោះខ្ពស់ចំពោះធុរជន និងវិនិយោគិនគ្រប់គ្នា។
ប្រតិភូវិនិយោគ និងទេសចរណ៍នេះ ត្រូវបានដឹកនាំដោយ លោក ហួត គីមឆា កុងស៊ុលកិត្តិយសរបស់កម្ពុជាប្រចាំរដ្ឋកាលីហ្វ័រញ៉ា និងលោក Norman Arikawa តំណាងកំពង់ផែ LA Port ដើម្បីជំរុញវិស័យទេសចរណ៍ ពាណិជ្ជកម្ម និងវិនិយោគរវាងកម្ពុជា និងរដ្ឋកាលីហ្វ័រញ៉ា សហរដ្ឋអាមេរិក។
ក្រោយបញ្ចប់កិច្ចពិភាក្សា លោក សូ វិសុទ្ធី អនុរដ្ឋលេខាធិការក្រសួងទេសចរណ៍ បានថ្លែងប្រាប់អង្គភាពព័ត៌មាន Fresh News ឱ្យដឹងថា ក្នុងកិច្ចពិភាក្សាខាងលើ ថ្នាក់ដឹកនាំក្រសួងទេសចរណ៍ បានជម្រាបពីវឌ្ឍនភាពលើវិស័យទេសចរណ៍ ក៏ដូចជាគោលនយោបាយ និងចក្ខុវិស័យវែងឆ្ងាយរបស់រាជរដ្ឋាភិបាលកម្ពុជា និងក្រសួងទេសចរណ៍ ក្នុងការអភិវឌ្ឍវិស័យអាទិភាពមួយនេះ ឱ្យរីកចម្រើនឈានឡើង សំដៅធ្វើយ៉ាងណាប្រែក្លាយកម្ពុជា ទៅជាគោលដៅទេសចរណ៍លំដាប់អន្តរជាតិ ប្រកបដោយភាពទាក់ទាញខ្ពស់។
លោក បានបន្តថា ថ្នាក់ដឹកនាំក្រសួងទេសចរណ៍ បានលើកបង្ហាញពីបរិយាកាស និងគោលនយោបាយលើកទឹកចិត្ត ដល់ការវិនិយោគក្នុងវិស័យទេសចរណ៍ ដូចជាការដាក់ចេញគោលនយោបាយ និងលើកចិត្តឱ្យមានការបង្កើតតំបន់ទេសចរណ៍ពិសិដ្ឋ គេហដ្ឋានទីពីរ (Second Home) និងគោលនយោបាយអភិវឌ្ឍន៍ទេសចរណ៍ ប្រកបដោយចីរភាព ស្របតាមទស្សនទាន «ស្អាត និងបៃតង»៕