លោក ផៃ ស៊ីផាន ឆ្លើយតបរឿងមេសហជីព អំពាវនាវឱ្យសម្តេច ហ៊ុន សែន ធ្វើតាមសំណើរបស់ EU
- 2020-01-03 07:09:47
- ចំនួនមតិ 0 | ចំនួនចែករំលែក 0
លោក ផៃ ស៊ីផាន ឆ្លើយតបរឿងមេសហជីព អំពាវនាវឱ្យសម្តេច ហ៊ុន សែន ធ្វើតាមសំណើរបស់ EU
ចន្លោះមិនឃើញ
អ្នកនាំពាក្យរដ្ឋាភិបាលកម្ពុជា លោកផៃ ស៊ីផាន បានថ្លែងប្រាប់ខ្លីៗ នៅថ្ងៃទី៣ ខែមករា ថា កម្ពុជាបានឲ្យដឹងថា រាជរដ្ឋាភិបាលកម្ពុជាធ្វើអ្វីដើម្បីផលប្រយោជន៍កម្មករទាំងអស់ដែលស្ថិតនៅក្នុងក្របខណ្ឌនៃច្បាប់ ក្របខណ្ឌនៃរដ្ឋធម្មនុញ្ញនិងក្របខណ្ឌអធិបតេយ្យភាពរបស់កម្ពុជា។ រាជរដ្ឋាភិបាលស្វែងរកគ្រប់វិធានស្វែងរកការជជែកគ្នាដោយស្ថិតក្នុងកិច្ចការរក្សាជាប្រជាជាតិអធិបតេយ្យ។
លោក ផៃ ស៊ីផាន បានបញ្ជាក់យ៉ាងដូច្នេះថា " កម្មករមិនគួរយកអារម្មណ៍ហួសពីការពិតដែលកើតឡើងនោះទេ។ ចាំប្រមើមើលថា អ្វីទៅដែលកើតឡើង ប៉ុន្តែអ្វីដែលសម្ដេច ហ៊ុន សែន លើកឡើងថាកុំឱ្យមានការបារម្ភ ការងារនៅតែមានធ្វើប្រាក់ខែនៅតែមានបើកនេះហើយដែលជាកាតព្វកិច្ចរបស់រដ្ឋាភិបាលមិនមែនជាកាតព្វកិច្ចរបស់អ្នកដែលតែងតែដើរបំផ្លាញឆ្នាំងបាយកម្មករហើយសម្រក់ទឹកភ្នែកក្រពើយកប្រជាពិថុតពីកម្មករនោះទេ"។
ការថ្លែងបញ្ជាក់របស់អ្នកនាំពាក្យរដ្ឋាភិបាលកម្ពុជា គឺបន្ទាប់ពីសហព័ន្ធសហជីពកម្ពុជា នៅថ្ងៃទី៣ ខែមករា បានដាក់ញ្ញត្តិជូនចំពោះសម្តេច ហ៊ុន សែន អំពាវនាវ ឲ្យអនុវត្តតាមសំណើរបស់សហភាពអឺរ៉ុប ដែលស្នើឲ្យរាជរដ្ឋាភិបាលកម្ពុជា បើកចំហប្រព័ន្ធនយោបាយនៅប្រទេសកម្ពុជា ឲ្យមានលក្ខណៈទូលំទូលាយដូចមុនថ្ងៃបោះឆ្នោត ក្រុមប្រឹក្សាឃុំ សង្កាត់ ឆ្នាំ២០១៧ ដើម្បីពង្រឹងលទ្ធិប្រជាធិបតេយ្យ និងធានាការគោរពសិទ្ធិសេរីភាពសម្រាប់ប្រជាពលរដ្ឋ ក្នុងគ្រប់វិស័យ ជាពិសេស វិស័យការងារ និងសិទ្ធិសេរីភាពសហជីព។
នៅក្នុងបញ្ញត្តិបន្តថា «យើងខ្ញុំទាំងអស់គ្នាចង់ទទួលបានសិទ្ធិសេរីភាពទូលំទូលាយដូចមានចែង ក្នុងរដ្ឋធម្មនុញ្ញ ហើយទន្ទឹមគ្នានេះ ក៏ចង់រក្សាការងារធ្វើ ដើម្បីជីវភាពរស់នៅ របស់យើងខ្ញុំ មិនចង់ឲ្យមានការបាត់បង់ណាមួយ ដោយសារតែរាជរដ្ឋាភិបាលកម្ពុជា បដិសេធសំណើដ៏ត្រឹមត្រូវរបស់សហភាពអឺរ៉ុប ដែលស្របទៅ នឹងឆន្ទៈរបស់ប្រជារាស្ត្រខ្មែរ ដែលចង់ឃើញលទ្ធិប្រជាធិបតេយ្យរស់ឡើងវិញនៅកម្ពុជា។ បើយើងខ្ញុំបាត់បង់ការងារធ្វើ ដោយសារតែការព្យួរប្រព័ន្ធអនុគ្រោះពន្ធ EBA របស់សហភាពអឺរ៉ុប នឹងចាត់ទុក ថ្នាក់ដឹកនាំរាជរដ្ឋាភិបាលកម្ពុជា ជាអ្នកទទួលខុសត្រូវ ហើយជាអ្នកនាំមកនូវទុក្ខលំបាក ដល់យើងខ្ញុំ និងក្រុមគ្រួសារ។ យើងខ្ញុំទាំងអស់គ្នា សង្ឃឹមថាសម្តេចតេជោ នឹងអនុវត្តតាមសំណើរបស់សហភាពអឺរ៉ុបដើម្បីរក្សាប្រព័ន្ធអនុគ្រោះពន្ធ EBA»៕