កម្ពុជា បិទការធ្វើអាជីវកម្មរកស៊ីរបស់ជនជាតិកូរ៉េខាងជើងតាមទណ្ឌកម្មអន្តរជាតិ
- 2020-01-08 04:15:25
- ចំនួនមតិ 0 | ចំនួនចែករំលែក 0
កម្ពុជា បិទការធ្វើអាជីវកម្មរកស៊ីរបស់ជនជាតិកូរ៉េខាងជើងតាមទណ្ឌកម្មអន្តរជាតិ
ចន្លោះមិនឃើញ
ភោជនីយដ្ឋានចំនួន ០៦ របស់កូរ៉េខាងជើង ដែលកំពុងតែប្រតិបត្តិការនៅក្នុងប្រទេសកម្ពុជាត្រូវបានបិទ។ ការបិទនេះ គឺអនុវត្តតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលត្រូវឲ្យរដ្ឋជាសមាជិកបញ្ឈប់ប្រតិបត្តិការរកលុយរបស់ជនជាតិកូរ៉េខាងជើងនៅក្រៅប្រទេស។
ភោជនីយដ្ឋានកូរ៉េខាងជើងចំនួន ០៦ គឺមាននៅក្នុងរាជធានីភ្នំពេញចំនួន ០៤កន្លែង និងនៅខេត្តសៀមរាបចំនួន ២កន្លែង។ ចំណែកសារមន្ទីរប៉ាណូរ៉ាម៉ា របស់កូរ៉េខាងជើង មានទីតាំងនៅខេត្តសៀមរាប ក្បែរប្រាសាទអង្គរវត្ត។ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក កុយ គួង បានថ្លែងប្រាប់អ្នកកាសែតថា កម្ពុជាដែលជាសមាជិកអង្គការសហប្រជាជាតិ គឺអនុវត្តតាមសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ទាក់ទងរឿងកូរ៉េខាងជើង។
លោក កុយ គួង បានបញ្ជាក់ថា “ក្នុងនាមជាប្រទេសសមាជិកអង្គការសហប្រជាជាតិ គឺយើងបានឯកភាពយល់ព្រមគោរពតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ព្រោះយើងយល់ព្រមក្នុងការអនុវត្តសេចក្តីសម្រេចនេះហើយ បានជាយើងចូលជាសមាជិកអង្គការសហប្រជាជាតិ។ ដូច្នេះហើយយើងគ្រាន់តែធ្វើតាមសេចក្តីសម្រេចរបស់ក្រុមប្រឹក្សាដែលតំណាងឲ្យប្រទេសជាសមាជិកចំនួន ១៩៣ប្រទេស ដូច្នេះខ្ញុំយល់ថា មិនមានអីគួរឲ្យកង្វល់ខ្វល់ខ្វាយពេកទេ យើងគ្រាន់តែអនុវត្តតាមអង្គការធំមួយនេះ ដែលយើងជាសមាជិក គឺមានករណីកិច្ចគោរពតាមសេចក្តីសម្រេចនឹង”។
ចំណែកលោក តុប សុភ័ក្ត្រ អ្នកនាំពាក្យក្រសួងទេចរណ៍ បានថ្លែងប្រាប់អ្នកកាសែតថា ការបិទនេះ វាគឺជាច្បាប់របស់សកលលោក មិនមែនតែនៅស្រុកខ្មែរទេ គឺមានសេចក្តីសម្រេចមួយរបស់ក្រុមប្រឹក្សាសន្តិសុខអង្គការសហប្រជាជាតិ ដែលបានសម្រេចដាក់ទណ្ឌកម្មរឿងកូរ៉េខាងជើង។ ហើយគ្រប់អាជីវកម្មដែលគ្រប់គ្រងដោយកូរ៉េខាងជើង ត្រូវបិទអាជីវកម្ម។ ដោយលោកបញ្ជាក់ថា ការបិទអាជីវកម្មភោជនីយដ្ឋានរបស់កូរ៉េខាងនៅកម្ពុជា គឺវាមានចំនួន ៦កន្លែង (នៅរាជធានីភ្នំពេញចំនួន ៤កន្លែង និងនៅខេត្តសៀមរាប ចំនួន២កន្លែង)។ ហើយខាងក្រសួងទេសចរណ៍ធ្វើតាមគោលការណ៍ណែនាំជារួមរបស់សកល។ លោកបានបញ្ជាក់ថា “អាជីវកម្មទាំង៦ របស់កូរ៉េខាងជើង យើងបានបិទអាជីវកម្មហើយកាលពីខែធ្នូ ឆ្នាំ២០១៩ កន្លងទៅ”។ យោងតាមរបាយការណ៍បានបង្ហាញថា ភោជនីយដ្ឋានចំនួន៦ របស់កូរ៉េខាងជើងដែលត្រូវបានបិទមានដូចជា៖
១. ភោជនីយដ្ឋានព្យុងយ៉ាង អារីរាំង ដែលមានអាសយដ្ឋានស្ថិតនៅផ្ទះលេខ៣២ ផ្លូវលេខ២១៥ សង្កាត់ ផ្សារដេប៉ូ៣ ខណ្ឌទួលគោក រាជធានីភ្នំពេញ។ ២. ភោជនីយដ្ឋាន មូរ៉ាន់បូង ដែលមានអាសយដ្ឋានស្ថិតនៅផ្ទះលេខ៩២ ផ្លូវលេខ២១៥ កែងផ្លូវលេខ២០០ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។ ៣. ភោជនីយដ្ឋាន ព្យុងយ៉ាង អ៊ុនហាស៊ូ ដែលមានអាសយដ្ឋានស្ថិតនៅអាគារលេខ១០A ផ្លូវលេខ៣១៥ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ។ ៤. ភោជនីយដ្ឋាន ព្យុងយ៉ាង ដែលមានអាសយដ្ឋានស្ថិតនៅផ្ទះលេខ៤០០ ផ្លូវព្រះមុនីវង្ស សង្កាត់បឹង កេងកងទី១ ខណ្ឌចំការមនរាជធានីភ្នំពេញ។ ៥. ភោជនីយដ្ឋាន ព្យុងយ៉ាង ហ្វានស៊ីប ដែលមានអាសយដ្ឋានស្ថិតនៅភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប។ ៦. ភោជនីយដ្ឋាន ព្យុងយ៉ាង ត្រេឌីសិនណល នូឌល ដែលមានអាសយដ្ឋានស្ថិតនៅផ្លូវជាតិលេខ៦ ភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប។
រីឯនាយឧត្តមសេនីយ៍ កែវ វណ្ណថន អគ្គនាយករង នៃអគ្គនាយកដ្ឋានអន្តោប្រវេសន៍ បានបញ្ជាក់ប្រាប់ខ្លីៗថា “បច្ចុប្បន្នស្ថិតិពលករកូរ៉េខាងជើងមានចំនួន ១៨២នាក់ នៅក្នុងព្រះរាជាណាចក្រកម្ពុជា គិតត្រឹមថ្ងៃទី២២ ខែធ្នូ ឆ្នាំ២០១៩។ បានចាកចេញពីកម្ពុជាចំនួន១៧៩នាក់ ប៉ុន្តែក្នុងនោះបានត្រឡប់ចូលមកវិញបានទិដ្ឋាការទេសចរណ៍ចំនួន ៦២នាក់ មិនទាន់ចាកចេញពីកម្ពុជាចំនួន ៩នាក់”។
សូមជម្រាបថា ក្រុមប្រឹក្សាសន្តិសុខអង្គការសហប្រជាជាតិ បានដាក់ចេញនូវសេចក្តីសម្រេចមួយកាលពីខែកញ្ញា ឆ្នាំ២០១៩ បានទណ្ឌកម្មទៅកូរ៉េខាងជើង ដែលបានសាកសល្បងអាវុធនុយក្លេអ៊ែរ លើអាជីវកម្មក្រៅប្រទេសរបស់ជនជាតិកូរ៉េខាងជើង និងទាមទារឲ្យមានការបញ្ជូនជនជាតិកូរ៉េខាងជើងដែលធ្វើការនៅក្រៅប្រទេសត្រឡប់ទៅប្រទេសកូរ៉េខាងជើងវិញ៕