កើតម្ដងៗស្លាប់មិនតិចសិបលាននាក់ទេ ព្រោះតែជំងឺរាតត្បាតដ៏អាក្រក់ទាំង១០នេះ

2020-02-07 01:26:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បើយោងតាមវិបសាយ History Hit បានឲ្យដឹងថា កន្លងមកពិភពលោកធ្លាប់ពើបប្រទះនឹងរោគរាតត្បាតធំៗចំនួន ១០ ដែលឆក់យកជីវិតមនុស្សអស់រាប់លាននាក់នៅពាសពេញពិភពលោក។ ព្រឹត្តិការណ៍អាក្រក់ៗទាំងនោះមានដូចជា៖

១. ជំងឺឆ្លងនៅទីក្រុង Athens (ឆ្នាំ៤៣០-៤២៧ មុនគ.ស)៖ វាជាជំងឺគ្រុនពោះវៀន ដែលមានដើមកំណើតចេញពីអនុតំបន់សាហារ៉ាអាហ្វ្រិក។ ជំងឺនេះបានផ្ទុះឡើងនៅក្នុងទីក្រុង Athens ប្រទេសក្រិក ហើយឆ្លងដល់បណ្ដាប្រទេសនៅមេឌីទែរ៉ាណេខាងកើត។ ក្រុមអ្នកប្រវត្តិវិទូជឿថា មនុស្ស២ភាគ៣នៃប្រជាជន Athens បានបាត់បង់ជីវិតដោយសារតែជំងឺនេះ។

២. ជំងឺឆ្លងនៅរ៉ូមជំនាន់ស្ដេច Antonine (ឆ្នាំ១៦៥-១៨០)៖ វាត្រូវគេសង្ស័យថាជាជំងឺអុតធំ ឬជំងឺកញ្ជ្រឹល។ ក្នុង១ថ្ងៃ វាសម្លាប់មនុស្សជិត ២ពាន់នាក់។ ចំនួនអ្នកស្លាប់សរុបមានប្រមាណជា ៥លាននាក់។ ដំបូងឡើយវាកើតនៅរ៉ូម រួចធ្លាយឆ្លងទៅដល់មេឌីទែរ៉ាណេ អាណាតូលី អេហ្ស៊ីប ក្រិក និងអ៊ីតាលី។

៣. ជំងឺឆ្លងជំនាន់ស្ដេចរ៉ូម៉ាំង Justinian I (ឆ្នាំ៥៤១-៥៤២)៖ សោកនាដកម្មនេះបានសម្លាប់មនុស្សអស់ ២៥លាននាក់ ដែលស្មើនឹង ១៣ ទៅ ២៦% នៃប្រជាជនលើពិភពលោកទាំងអស់កាលពីសម័យនោះ។ ជំងឺឆ្លងនេះគឺតាមរយៈសត្វកណ្ដុរខ្មៅ ហើយរោគសញ្ញានោះគឺការដំបៅរលួយដៃជើង។

៤. រោគឃ្លង់ (សតវត្សទី១១)៖ ជំងឺឃ្លង់កើតមានជាយូរណាស់មកហើយ គ្រាន់តែពេលដែលវាឆ្លងខ្លាំងបំផុតគឺនៅក្នុងអឺរ៉ុប។ ជំងឺនេះបណ្ដាលឲ្យមនុស្សកើតដំបៅពេញខ្លួន ហើយឈានដល់ការបំផ្លាញអវៈយវៈទាំងអស់ បូករួមទាំងស្បែក ហើយនិងភ្នែក។ មនុស្សមួយចំនួនមានជំនឿថា វាជាការដាក់ពិន័យរបស់ព្រះជាម្ចាស់ទៅលើពិភពលោកចំពោះបាបកម្មដែលគេបានសាង។ មនុស្សឆ្លងជំងឺនេះមានប្រមាណរាប់សិបម៉ឺននាក់ក្នុង១ឆ្នាំៗ ហើយវាអាចបណ្ដាលឲ្យស្លាប់បាន បើមិនព្យាបាលបានដិតដល់។

៥. ជំងឺប៉េស្តនៅអឺរ៉ុប និងអាស៊ី (ឆ្នាំ១៣៤៧- ១៣៥១)៖ មនុស្សចន្លោះពី ៧៥ ដល់ ២០០លាននាក់ បានស្លាប់ដោយសារតែជំងឺនេះ ដែលចម្លងចេញពីចៃនៅលើសត្វកណ្ដុរខ្មៅ។ ចៃទាំងនោះបានរស់នៅលើកប៉ាល់ជំនួញធ្វើដំណើរចុះឡើងរវាងអាស៊ី និងអឺរ៉ុប។ ក្រោយឆ្លងជំងឺប៉េស្តបាន ៦ ទៅ ១០ថ្ងៃ អ្នកជំងឺចំនួន៨០% នឹងត្រូវស្លាប់។

៦. ជំងឺឆ្លង Cocoliztli នៅម៉ិកស៊ីកូ (ឆ្នាំ១៥៤៥- ១៥៤៨)៖ វាមានលក្ខណៈស្រដៀងទៅជំងឺអេបូឡា ដោយរោគសញ្ញាមានដូចជា វិលមុខ គ្រុនក្ដៅ ឈឺក្បាល ឈាមចេញពីច្រមុះនិងភ្នែក ជាដើម។ មនុស្សចំនួន ១៥លាននាក់បានស្លាប់ដោយសារជំងឺនេះ។

៧. ជំងឺឆ្លងនៅទីក្រុងឡុងដ៍ ប្រទេសអង់គ្លេស (ឆ្នាំ១៦៦៥ - ១៦៦៦)៖ មនុស្សស្លាប់មានចំនួនប្រហែល ១០ម៉ឺននាក់ក្នុងរយៈពេល ១៨ខែ ហើយសត្វឆ្កែឆ្មារាប់សិបម៉ឺនក្បាលត្រូវគេសម្លាប់ដើម្បីការពារជំងឺឆ្លងនេះ។

៨. ជំងឺផ្ដាសាយ H1N1 (ឆ្នាំ១៩១៨)៖ មនុស្ស៥០០លាននាក់នៅលើពិភពលោកបានឆ្លងជំងឺ ដោយក្នុងនោះចំនួនអ្នកស្លាប់មានចន្លោះពី ៥០លាន ដល់ ១០០លាននាក់។

៩. ជំងឺផ្ដាសាយ H2N2 (ឆ្នាំ១៩៥៧)៖ វាកើតចេញពីខេត្ត Guizhou ប្រទេសចិន រួចឆ្លងដល់សិង្ហបុរី ហុងកុង និងសហរដ្ឋអាមេរិក បន្ទាប់មកគឺពិភពលោកទាំងមូល។ មនុស្សស្លាប់មានប្រមាណពី ១ ទៅ ២លាននាក់។

១០. ជំងឺអេដស៍ (ទសវត្សទី៨០ ដល់បច្ចុប្បន្ន)៖ ជំងឺអេដស៍ត្រូវបានរកឃើញដំបូងនៅក្នុងសាធារណរដ្ឋកុងហ្គោ នាឆ្នាំ១៩៥៩។ ប៉ុន្តែការឆ្លងរាតត្បាតខ្លាំងទើបកើតឡើងដើមទសវត្សទី៨០។ ចាប់តាំងពីនោះមក មនុស្សឆ្លងមេរោគអេដស៍មានប្រមាណ ៧០លាននាក់ ហើយអ្នកស្លាប់មាន ៣៥លាននាក់៕