រាជរដ្ឋាភិបាលយល់ព្រមលើគម្រោងរោងចក្រអគ្គិសនីដុតធ្យូងថ្ម នៅខេត្តពោធិ៍សាត់ និងកោះកុង
- 2020-02-07 07:06:05
- ចំនួនមតិ 0 | ចំនួនចែករំលែក 0
រាជរដ្ឋាភិបាលយល់ព្រមលើគម្រោងរោងចក្រអគ្គិសនីដុតធ្យូងថ្ម នៅខេត្តពោធិ៍សាត់ និងកោះកុង
ចន្លោះមិនឃើញ
កិច្ចប្រជុំគណៈរដ្ឋមន្រ្តីក្រោមអធិបតីភាពសម្តេច ហ៊ុន សែន នាព្រឹកថ្ងៃទី៧ ខែកុម្ភៈ ឆ្នាំ២០២០ បានសម្រេចអនុម័តទាំងស្រុងលើ «គម្រោងអភិវឌ្ឍរោងចក្រអគ្គិសនីដុតធ្យូងថ្ម ២៦៥មេហ្គាវ៉ាត់ នៅស្រុកត្រពាំងប្រាសាទ ខេត្តឧត្តរមានជ័យ គម្រោងអភិវឌ្ឍបណ្ដាញបញ្ជូន២៣០គីឡូវ៉ុល ពីរោងចក្រអគ្គិសនីធ្យូងថ្មខេត្តឧត្តរមានជ័យ មកអនុស្ថានីយសៀមរាប និងគម្រោងអភិវឌ្ឍរោងចក្រអគ្គិសនីដុតធ្យូងថ្ម៧០០មេហ្គាវ៉ាត់ នៅស្រុកបទុមសាគរ ខេត្តកោះកុង»។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានឱ្យដឹងថា៖
១. គម្រោងអភិវឌ្ឍរោងចក្រអគ្គិសនីដុតធ្យូងថ្ម ២៦៥មេហ្គាវ៉ាត់ នៅស្រុកត្រពាំងប្រាសាទ ខេត្តឧត្តរមានជ័យ ជារបស់ក្រុមហ៊ុន HSCMC
-រោងចក្រអគ្គិសនីដុតធ្យូងថ្ម ដែលរ៉ែធ្យូងថ្មជីកបាននៅតំបន់នោះ មានទីតាំងស្ថិតនៅស្រុកត្រពាំងប្រាសាទ ដែលមានអនុភាពដំឡើងសរុប ២៦៥ មេហ្គាវ៉ាត់ និងអានុភាពធានាផ្តល់ឲ្យបណ្តាញជាតិ ២៣០ មេហ្គាវ៉ាត់ ក្នុងនោះអគ្គិសនីកម្ពុជា ត្រូវធានាទិញថាមពល ៨៥% ស្មើនឹង ១៧១២,៥៨ លានគីឡូវ៉ាត់ម៉ោងក្នុងមួយឆ្នាំ។
-ទំហំវិនិយោគសរុប ២៩៤,៣០ លានដុល្លារអាមេរិក ក្នុងនោះទុនផ្ទាល់ ៣០%និងខ្ចីពីធនាគារ ៧០% តាមអត្រាការប្រាក់ ៦,៥%។
២. គម្រោងអភិវឌ្ឍខ្សែបណ្តាញបញ្ជូន ២៣០ គីឡូវ៉ុល ភ្ជាប់ពីរោងចក្រអគ្គិសនីធ្យូងថ្ម ខេត្តឧត្តរមានជ័យ មកអនុស្ថានីយខាងកើតសៀមរាប
-ខ្សែបណ្តាញដែលក្រុមហ៊ុន HSCMC ត្រូវអភិវឌ្ឍគឺបណ្តាញបញ្ជូន ២៣០ គីឡូវ៉ុល ភ្ជាប់រោងចក្រអគ្គិសនីធ្យូងថ្មរបស់ក្រុមហ៊ុនមកអនុស្ថានីយសៀមរាបខាងកើតរបស់អគ្គិសនីកម្ពុជា។ រូបភាពវិនិយោគគឺសាងសង់-ផេ្ទរ (Build-Transfer) ។ ពេលសាងសង់រួច ត្រូវផ្ទេរហេដ្ឋារចនាសម្ព័ន្ធឲ្យអគ្គិសនីកម្ពុជាគ្រប់គ្រង។
-ទំហំវិនិយោគសរុប ៦១,៤៥ លានដុល្លារអាមេរិក ក្នុងនោះទុនផ្ទាល់ ៣០ %និងខ្ចីពីធនាគារ ៧០ % តាមអត្រាការប្រាក់ ៦,៥ %។
៣.គម្រោងអភិវឌ្ឍរោងចក្រអគ្គិសនីដុតធ្យុងថ្ម ៧០០មេហ្កាវ៉ាត់ នៅស្រុកបុទុមសាគរ ខេត្តកោះកុង
-រោងចក្រអគ្គិសនីដែលក្រុមហ៊ុន ROYAL GROUP ត្រូវអភិវឌ្ឍ គឺរោងចក្រអគ្គិសនីដុតធ្យុងថ្មនាំចូលមានទីតាំងឋិតនៅស្រុកបុទុមសាគរ ខេត្តកោះកុង ដែលមានអានុភាពដំឡើងសរុប ៧០០ មេហ្គាវ៉ាត់ និងអានុភាពធានាផ្តល់ឲ្យបណ្តាញជាតិ ៦៨០ មេហ្គាវ៉ាត់ ក្នុងនោះអគ្គិសនីកម្ពុជាត្រូវធានាទិញថាមពល ៨០% នៃអានុភាពធានាផ្តល់ឲ្យបណ្តាញជាតិ ស្មើនឹង ៤៧៦៥,៤៤ លានគីឡូវ៉ាត់ម៉ោងក្នុង ១ឆ្នាំ។ រូបភាពវិនិយោគ គឺសាងសង់-ធ្វើម្ចាស់-អាជីវកម្ម(Build-Own-Operate=BOO)។
-ទំហំវិនិយោគសរុប ១៣៤៤,២០ លានដុល្លារអាមេរិក ក្នុងនោះទុនផ្ទាល់ ៣០% និងខ្ចីពីធនាគារ ៧០% តាមអត្រាការប្រាក់ ៦,៥%៕