ថ្ងៃនេះ អ្នកជំងឺកូវីដ១៩ ម្នាក់នៅភ្នំពេញ បានជាសះស្បើយហើយ
- 2020-04-02 02:34:32
- ចំនួនមតិ 0 | ចំនួនចែករំលែក 0
ថ្ងៃនេះ អ្នកជំងឺកូវីដ១៩ ម្នាក់នៅភ្នំពេញ បានជាសះស្បើយហើយ
ចន្លោះមិនឃើញ
ក្រសួងសុខាភិបាល បានចេញសេចក្តីប្រកាសព័ត៌មានឱ្យដឹងនៅថ្ងៃទី២ ខែមេសា ឆ្នាំ២០២០នេះថា អ្នកជំងឺកូវីដ១៩ ចំនួន៩នាក់បានជាសះស្បើយក្នុងនោះមានម្នាក់នៅរាជធានីភ្នំពេញ។ សូមមើលខាងក្រោម៖
-បុរសជនជាតិខ្មែរអាយុ ៤០ឆ្នាំ មានទីលំនៅនៅខេត្តសៀមរាប ដែលបានវិលត្រឡប់មកពីចូលរួមពិធីសាសនានៅប្រទេសម៉ាឡេស៊ី បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន២លើក ត្រូវបានអនុញ្ញាតឱ្យចេញពីមន្ទីរពេទ្យខេត្តសៀមរាប។
-បុរសអាយុ ៣៣ឆ្នាំ ជនជាតិបែលហ្សិក នៅរាជធានីភ្នំពេញ ព្យាបាលបានជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន ២លើក ត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។
-បុរសជនជាតិបារាំង អាយុ ៥២ឆ្នាំ និង ៦៦ឆ្នាំ ព្រមទាំងស្រ្តីជនជាតិបារាំង អាយុ ៥៩ឆ្នាំ ៦១ឆ្នាំ ៦២ឆ្នាំ ៦៣ឆ្នាំ និង ៦៩ឆ្នាំ ជាអ្នកទេសចរនៅខេត្តព្រះសីហនុ ត្រូវបានព្យាបាលជាសះស្បើយដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន ២លើក និងត្រូវបានអនុញ្ញាតឱ្យចេញពីកន្លែងព្យាបាលក្នុងសណ្ឋាគារមួយក្នុងក្រុងព្រះសីហនុ ដើម្បីរងចាំការវិលត្រឡប់ទៅប្រទេសបារាំងវិញ។ ជាបណ្តោះអាសន្ន ពួកគាត់ត្រូវបំបែកចេញពីជាន់ព្យាបាលមួយនៃសណ្ឋាគារមួយដែលដាក់អ្នកមានវីរុសកូវីដ១៩ នៅតាមបន្ទប់ដាច់ដោយឡែកៗពីគ្នា ឱ្យមកស្នាក់នៅជាន់មួយទៀត តាមបន្ទប់ដាច់ដោយឡែកពីគ្នាដែរ ដែលជាជាន់សម្រាប់អ្នកព្យាបាលជាសះស្បើយ។
ដូច្នេះ គិតមកដល់ព្រឹកនេះ អ្នកជាសះស្បើយសរុបមានចំនួនកើនដល់ ៣៤នាក់ ក្នុងចំណោមអ្នកឆ្លងជំងឺកូវីដ១៩ សរុប ១១០នាក់។ ក្នុងនោះមានជនជាតិចិន ១នាក់, អង់គ្លេស ៣នាក់, បែលហ្សិក ១នាក់, បារាំង ៨នាក់ និងខ្មែរ ២១នាក់៕