កូរ៉េ ផ្ដល់ឲ្យកម្ពុជា ជាង៦០លានដុល្លារ សម្រាប់គម្រោង១នៅតាខ្មៅ

2018-04-03 07:42:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋាភិបាលកូរ៉េ តាមរយៈធនាគារនីហរ័ណ-អាហរ័ណកូរ៉េ បានផ្ដល់ឥណទានសម្បទានឲ្យប្រទេសកម្ពុជា ក្នុងទឹកប្រាក់ចំនួនជាង ៦០លានដុល្លារអាមេរិក សម្រាប់គម្រោងអភិវឌ្ឍន៍ប្រព័ន្ធចម្រោះទឹកកខ្វក់ ក្នុងក្រុងតាខ្មៅ ខេត្តកណ្ដាល។

ក្រុងតាខ្មៅ (រូបភាព៖ Takhmao Town ទីក្រុង តាខ្មៅ)

ការផ្ដល់ឥណទានសម្បទានេះ ត្រូវបានប្រកាសក្នុងពិធីចុះកិច្ចព្រមព្រៀងឥណទានសម្បទានសម្រាប់គម្រោងអភិវឌ្ឍន៍ ប្រព័ន្ធចម្រោះទឹកកខ្វក់ ក្នុងក្រុងតាខ្មៅ ក្រោមអធិបតីភាពលោក វង្សី វិស្សុត រដ្ឋលេខាធិការក្រសួងសេដ្ឋកិច្ច ជាមួយលោក CHANG Youn Soo ប្រធានស្ថានតំណាងមូលនិធិ សម្រាប់កិច្ចសហប្រតិបត្តិការ អភិវឌ្ឍន៍សេដ្ឋកិច្ច (EDCF) ប្រចាំនៅកម្ពុជា នៅថ្ងៃទី៣ ខែមេសា ឆ្នាំ២០១៨ នេះ។

គម្រោងនេះ មានទិសដៅសាងសង់រោងចក្រចម្រោះទឹកកខ្វក់មួយកន្លែង ដែលមានសមត្ថភាពចម្រោះបាន ៧៦០០ ម៉ែត្រគូប/ថ្ងៃ រួមមានអាងចម្រោះទឹកកខ្វក់មួយចំនួន ដោយភ្ជាប់ទៅស្ថានីយបូមទឹកកខ្វក់ចំនួន ១០ កន្លែង, ឡធំស្ទាក់កាកសំណល់ដែលភ្ជាប់ដោយបំពង់បង្ហូរកាកសំណល់មានប្រវែងសរុប ៥៥,៣៣ គ.ម (បំពង់បង្ហូរចែកចេញជាពីរប្រភេទៈ ប្រភេទទី ១ ប្រវែងសរុប ៤៩,៣៣ គ.ម មានមុខកាត់ពី ៣០០ ម.ម ទៅ ១២០០ ម.ម និងបំពង់បង្ហូរប្រភេទទី ២ ប្រវែងសរុប ៦ គ.ម មានមុខកាត់ពី ១០០ ម.ម ទៅ ៤០០ ម.ម)។ ទន្ទឹមនេះ ក៏មានការងារស្តារព្រែក ប្រវែងសរុប ១៦,២ គ.ម ដែលក្នុងនោះ មានការងារស្តារឡើងវិញនូវស្ថានីយ៍បូមទឹកចាស់ និងសាងសង់ទ្វារទឹកថ្មីមួយកន្លែង ទំហំ ៥ ម x ៣ ម ផងដែរ ។

ពិធីចុះកិច្ចព្រមព្រៀងឥណទានសម្បទានសម្រាប់គម្រោងអភិវឌ្ឍន៍ ប្រព័ន្ធចម្រោះទឹកកខ្វក់ ក្នុងក្រុងតាខ្មៅ

សូមបញ្ជាក់ថា កិច្ចព្រមព្រៀងនេះ ជាការផ្ដល់ឥណទាន លើកទី២១ ពីរដ្ឋាភិបាលកូរ៉េ ហើយគិតមកដល់ឆ្នាំ២០១៨នេះ កូរ៉េបានផ្ដល់ទឹកប្រាក់សរុបចំនួន ៧៧៣ លានដុល្លារអាមេរិកហើយ៕

អត្ថបទ៖ លាភ.