កម្ពុជា កំពុងរៀបចំសេចក្តីព្រាងច្បាប់ស្តីពីការគ្រប់គ្រង និងផលិតប្រេងកាត

2018-04-20 09:21:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងរ៉ែ និងថាមពល រួមជាមួយក្រសួងបរិស្ថាន បាននឹងកំពុងរៀបចំសេចក្តីព្រាងច្បាប់ស្តីពី «ការគ្រប់គ្រងប្រេងកាត និងផលិតប្រេងកាត» ក្នុងពេលដែលកម្ពុជា ត្រូវបានរំពឹងថា នឹងទទួលបានដំណក់ប្រេងកាតជាលើកដំបូងនៅចុងឆ្នាំ២០១៩។

ទីតាំងបូមប្រេង១កន្លែង របស់ក្រុមហ៊ុនសិង្ហបុរី KrisEnergy ដែលក្រុមហ៊ុននេះ បានចុះកិច្ចព្រមព្រៀងជាមួយរាជរដ្ឋាភិបាល ក្នុងការអភិវឌ្ឍប្រេងកាតនៅកម្ពុជា។ រូបថត៖ វិបសាយ Maritimeherald

កាលពីថ្ងៃទី១៩ ខែមេសា ឆ្នាំ២០១៨ ក្រសួងទាំង២នេះ បានបើកកិច្ចប្រជុំរួមគ្នា១ ដើម្បីពិនិត្យ និងពិភាក្សាលើសេចក្តីព្រាងច្បាប់នេះ ដោយមានការចូលរួមពីលោក ស៊ុយ សែម រដ្ឋមន្រ្តីក្រសួងរ៉ែ និងថាមពល និងលោក អ៊ាង សុផល្លែត អនុរដ្ឋលេខាធិការក្រសួងបរិស្ថាន។

ក្រសួងបរិស្ថាន បានឲ្យដឹងថា សេចក្តីព្រាងច្បាប់នេះចែកចេញជា៩ជំពូក និង ៧៣មាត្រា មានគោលបំណងជំរុញអភិវឌ្ឍវិស័យប្រេងកាតប្រកបដោយនិរន្តរភាព និងប្រសិទ្ធភាពដើម្បីរួមចំណែកអភិវឌ្ឍសេដ្ឋកិច្ច សង្គម និងផលប្រយោជន៍យូរអង្វែងរបស់ប្រទេសជាតិ។

គួររម្លឹកថា កាលពីថ្ងៃទី២៣ ខែសីហា ឆ្នាំ២០១៧ រាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែ បានចុះកិច្ចព្រមព្រៀងជាមួយក្រុមហ៊ុន KrisEnergy ក្នុងការអភិវឌ្ឍប្រេងកាតនៅប្លុកA។ កិច្ចព្រមព្រៀងនេះ នឹងអនុញ្ញាតឲ្យក្រុមហ៊ុនធ្វើផលិតកម្មលើកទី១របស់ខ្លួន គឺជំហាន 1A និង 1B នៃដំណាក់កាលទី១ របស់ប្លុក A ដែលមានផ្ទៃក្រឡា ១៩៨គីឡូម៉ែត្រក្រឡា។ យោងតាមផែនការអភិវឌ្ឍន៍របស់ក្រុមហ៊ុន តំណក់ប្រេងដំបូងនៅជំហាន 1A នឹងផលិតប្រេងដំបូង នៅចុងឆ្នាំ ២០១៩ ឬដើមឆ្នាំ២០២០៕

អត្ថបទពាក់ព័ន្ធ៖

អត្ថបទ៖ សំភី