ស្ពានដែលបន្សល់ពីសម័យអង្គរមួយកន្លែង ត្រូវបន្តជួសជុលដោយក្រសួងវប្បធម៌

2018-05-09 04:47:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាយកដ្ឋានគាំពារនិងអភិរក្សសំណង់បុរាណ នៃក្រសួងវប្បធម៌ និងវិចិត្រសិល្ប: សហការជាមួយមន្ត្រី មន្ទីរវប្បធម៌ខេត្តឧត្តរមានជ័យ កាលពីព្រឹកថ្ងៃទី៨ ខែឧសភា ២០១៨ នេះ បានចាប់ផ្តើមជួសជុល ស្ពានបុរាណមួយកន្លែង នៅដំណាក់កាលទី៤បន្ត ស្ថិតនៅភូមិជើងទៀន ឃុំជើងទៀន ស្រុកចុងកាល់ ខេត្តឧត្តរមានជ័យ។

ស្ពានទ័ព នៅភូមិជើងទៀន ឃុំជើងទៀន ស្រុកចុងកាល់ ខេត្តឧត្តរមានជ័យ ត្រូវបានជួសជុលដំណាក់កាលទី៤ (រូបថត៖ រស្មីកម្ពុជា)

លោក ហុង យឿន ប្រធានមន្ទីរវប្បធម៌ និងវិចិត្រសិល្ប: ខេត្តឧត្តរមានជ័យ បានឲ្យដឹងថា ស្ពានបុរាណដែលត្រូវជួសជុលនោះមានឈ្មោះថា ស្ពានទ័ព ឬអ្នកស្រុកខ្លះ ហៅថា ស្ពានអូរជីក។ ស្ពាននេះ បានកសាងឡើង នៅក្នុងចន្លោះចុងសតវត្សរ៍ទី១២ ដើមសតវត្សរ៍ទី១៣ នាសម័យអង្គរ។ ស្ពាននេះ មានបណ្តោយប្រវែង ១៥១ ម៉ែត្រ ទទឹងប្រវែង ១៦,៨០ ម៉ែត្រ និងមានកម្ពស់ គិតពីបាតក្រោម ប្រវែង ១០ ម៉ែត្រ។

ខាងលើស្ពានទ័ព ដែលកំពុងត្រូវបានជួសជុល (រូបថត៖ រស្មីកម្ពុជា)

លោកស្រី ជាម ផល្លី មន្ត្រីបច្ចេកទេស នៃនាយកដ្ឋានគាំពារ និងអភិរក្សសំណង់បុរាណ នៃក្រសួងវប្បធម៌ និងវិចិត្រសិល្ប: និងជាប្រធានការដ្ឋាន ជួសជុលស្ពានបុរាណនោះ បានឲ្យដឹងដែរថា ការជួលជុលស្ពាននេះ គឺត្រូវចំណាយ រយ:ពេល ៦ ខែ។

លោកស្រីបន្តថា ស្ពានទ័ពនេះ ក្រសួងវប្បធម៌ និងវិចិត្តសិល្បៈ បានចាប់ផ្តើមអភិរក្ស និងជួសជុល ៣ ដំណាក់កាលមកហើយ ដោយដំណាក់កាលទី១ នៅឆ្នាំ២០១៥ បានជួសជុលតួស្ពាននៅផ្នែកខាងលិច ដំណាក់កាលទីពី និងទីបី នៅក្នុងឆ្នាំ២០១៦ ជួសជុលនៅផ្នែកខាងកើត រួមសសរស្ពាន និងរៀបចំតួខ្លួននាគ ដាក់តាំងលើស្ពានផងដែរ។ ហើយនៅដំណាក់កាលទី៤ នេះ លោកស្រី បញ្ជាក់ថា នឹងធ្វើការជួសជុល កន្លែងទ្រុឌទ្រោមដទៃទៀតនៃស្ពាននេះ ហើយការជួសជុលបន្តនេះ គឺត្រូវប្រើប្រាស់កញ្ចប់ថវិការបស់ជាតិ។

ខាងក្រោមស្ពានទ័ព (រូបថត៖ រស្មីកម្ពុជា)

លោក ហុង យឿន ក៍បានឲ្យដឹងផងដែរថា ខេត្តឧត្តរមានជ័យ មានស្ថានីយបុរាណ សរុបចំនួន ២៦៧ កន្លែង ។ ស្ថានីយបុរាណទាំងនោះ មានដូចជា ទួលប្រាសាទ, ទួលបុរាណ, គោក ឬភូមិបុរាណ, ស្ថានីយយកថ្ម ព្រមទាំងស្រះបុរាណ។ គិតមកដល់ឆ្នាំ២០១៨នេះ សំណង់បុរាណទាំងនោះ ត្រូវបានដាក់បញ្ចូលជាសម្បត្តិបេតិកភណ្ឌជាតិ នៅក្រសួងវប្បធម៌ និងវិចិត្រសិល្ប: រួចរាល់អស់ហើយ៕

ប្រភព៖ រស្មីកម្ពុជា ប្រែសម្រួល៖ លាភ.