រកឃើញរូបសំណាកបុរាណមួយ នៅខេត្តតាកែវ សង្ស័យមានអាយុកាលច្រើនសតវត្ស

2018-09-01 07:07:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាលពីរសៀលថ្ងៃទី៣១ ខែសីហា ឆ្នាំ២០១៨ គ្រួសារមួយនៅក្នុងស្រុកទ្រាំង ខេត្តតាកែវ បានប្រទះឃើញរូបសំណាកបុរាណមួយនៅពេលឈូសឆាយដីក្រោយផ្ទះរបស់ខ្លួនសម្រាប់ដាំដំណាំ។ រូបសំណាងនេះ ត្រូវបានសង្ស័យថា មានអាយុកាលមិនក្រោម ១០០០ឆ្នាំនោះទេ។

សមត្ថកិច្ច យករូបសំណាក ដែលអ្នកភូមិរកឃើញ មករក្សាទុក (រូបថតពីទូរសព្ទ)

ម្ចាស់ដីលោក ង៉ែត អូន និង អ្នកស្រី ចែម សាវេត ដែលរស់នៅក្នុងភូមិអូពោធិ ឃុំសំបួរ ស្រុកទ្រាំងប្រាប់ថា ពួកគាត់មានដីមួយកន្លែងនៅក្រោយផ្ទះដែលកាលពីមុនជាទីទួល ដែលអ្នកខ្លះថាជាទួលបុរាណ និងធ្លាប់មានជនមួយចំនួនមកជីករកវត្ថុបុរាណផង។ អ្នកស្រី ចែម សាវេត បន្ថែមថា ដីនេះអ្នកស្រីឈូសឆាយកាប់គាស់ក្នុងបំណងដាំដំណាំ ដោយមិនបានដឹងទេថា មានរូបសំណាកបុរាណនៅក្នុងដីនោះ បើទោះបីជាធ្លាប់មានអ្នកខ្លះមកជីករកកាលយូរឆ្នាំមកហើយក៏ដោយ។

អ្នកស្រី និងស្វាមីថា ពួកគាត់មិនដឹងថារូបសំណាកនេះមានអាយុកាលប៉ុន្មាន ឬនៅសម័យកាលណានោះទេ តែអ្នកភូមិខ្លះប្រាប់អ្នកស្រីថា ជារូបសំណាកព្រះនាង លីវយី នៅសតវត្សទី១។

អ្នកស្រី ចែម សាវេត បន្ថែមថា គាត់បានប្រគល់រូបសំណាកនេះ ទៅឲ្យអាជ្ញាធរមូលដ្ឋានដើម្បីរក្សាទុកហើយ។

រូបសំណាក ដែលគេសង្ស័យថា មានអាយុកាលរាប់ពាន់ឆ្នាំ (រូបថតពីទូរសព្ទ)

ចំណែកលោក នង ប៊ុនរី មេភូមិអូពោធិ មានប្រសាសន៍ថា ដើម្បីរក្សាសុវត្ថិភាពដល់ម្ចាស់ផ្ទះ ខាងប៉ូលិសរដ្ឋបាលឃុំបានយករូបសំណាកមករក្សាទុកសិន ទម្រាំដល់ពេលបញ្ជូនទៅសារមន្ទីរខេត្ត។ ទោះជាយ៉ាងណាក្ដី លោកថា រូបសំណាកនេះមិនទាន់មានការអះអាងពីមន្ត្រីជំនាញថា ជារូបអ្វីនៅឡើយទេ គ្រាន់តែជាការអះអាងតៗគ្នាប៉ុណ្ណោះថា រូបព្រះនាង លីវយី៕

ប្រភព៖ Sabay News អត្ថបទ៖ ជិន វេន