អូស្រ្ដាលី គ្រោងសាងសង់មូលដ្ឋានកងទ័ពនៅប៉ាពូញូហ្គីណេ ដើម្បីទប់ទល់នឹងចិន

2018-09-20 07:11:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសអូស្រ្ដាលីកំពុងរៀបចំសាងសង់មូលដ្ឋានកងទ័ពជើងទឹកនៅក្នុងប្រទេសប៉ាពូញូហ្គីណេ ដើម្បីទប់ទល់នឹងឥទ្ធិពលរបស់ចិននៅក្នុងតំបន់ប៉ាស៊ីហ្វិក។ នេះបើតាមកាសែត The Australian ចេញផ្សាយនៅថ្ងៃទី១៩ ខែកញ្ញា ២០១៨។

លោក Scott Morrison នាយករដ្ឋមន្រ្តីអូស្រ្ដាលី/ រូបភាព៖ AFP

កាសែតដដែលនេះបញ្ជាក់ថា រដ្ឋាភិបាលកង់បេរ៉ាកំពុងបញ្ចប់កិច្ចព្រមព្រៀងមួយស្តីពីមូលដ្ឋានរួមគ្នា ដែលត្រូវសាងសង់នៅលើកោះ Manus។ កាសែតនេះបន្ថែមថា មន្រ្តីយោធាអូស្រ្ដាលីជាច្រើនបានទៅធ្វើទស្សនកិច្ចនៅមូលដ្ឋានកងទ័ពជើងទឹក Lombrum លើកោះ Manus ដើម្បីពិនិត្យពីសក្ដានុពលការអភិវឌ្ឍឡើងវិញ។

"ប៉ាស៊ីហ្វិក គឺជាតំបន់អាទិភាពខ្ពស់មួយនៃផលប្រយោជន៍យុទ្ធសាស្រ្តសន្ដិសុខជាតិសម្រាប់អូស្រ្ដាលី"។ នេះជាការលើកឡើងរបស់លោក Scott Morrison នាយករដ្ឋមន្រ្តីអូស្រ្ដាលី កាលពីថ្ងៃទី១៩ ខែកញ្ញា ២០១៨។ ប៉ុន្ដែលោកនាយករដ្ឋមន្រ្តីពុំបានធ្វើការអត្ថាធិប្បាយណាមួយស្ដីពីបញ្ហាសន្ដិសុខជាតិនោះទេ ដោយលោកថាវាមិនសាកសម។

សូមបញ្ជាក់ថា ក្រុងប៉េកាំងបានចាក់បញ្ចូលលុយរាប់ពាន់លានដុល្លារក្នុងកម្ចីហេដ្ឋារចនាសម្ព័ន ទៅកាន់ប្រទេសដែលជាកោះតូចៗទូទាំងមហាសមុទ្រប៉ាស៊ីហ្វិក ដែលជាតំបន់មួយត្រូវបានចាត់ទុកថា មានសារៈសំខាន់ផ្នែកយុទ្ធសាស្រ្ត ជាច្រកនាវាចរណ៍ទៅកាន់អាស៊ី។

ចំណែកអូស្រ្ដាលីបានព្រមាននយោបាយស្រទន់របស់ចិន នៅក្នុងតំបន់ប៉ាស៊ីហ្វិក ហើយនៅឆ្នាំ២០១៨នេះ បានប្រកាសចរចាកិច្ចព្រមព្រៀងសន្ដិសុខជាមួយប្រទេស Vanuatu និងសាងសង់ខ្សែទំនាក់ទំនងក្រោមសមុទ្រទៅកាន់កោះ Solomon និងប៉ាពូញូហ្គីណេ៕

ប្រភព៖ Channelnewsasia ប្រែសម្រួល៖ វាសនា