EU ចាប់ផ្តើមយកពន្ធនាំចូលអង្ករពីកម្ពុជា ជាង២០០ដុល្លារ ក្នុង១តោន ចាប់ពីថ្ងៃ១៨មករា
- 2019-01-17 08:23:34
- ចំនួនមតិ 0 | ចំនួនចែករំលែក 0
EU ចាប់ផ្តើមយកពន្ធនាំចូលអង្ករពីកម្ពុជា ជាង២០០ដុល្លារ ក្នុង១តោន ចាប់ពីថ្ងៃ១៨មករា
ចន្លោះមិនឃើញ
សហគមន៍អឺរ៉ុប (EU) នឹងចាប់ផ្តើមគិតពន្ធលើអង្កររបស់កម្ពុជា និងមីយ៉ាន់ម៉ា ដែលនាំចូលទៅកាន់ប្រទេសដែលជាសមាជិក EU ២៨ប្រទេស សម្រាប់រយៈពេល៣ឆ្នាំ ចាប់ពីឆ្នាំ២០១៩ ដល់ ឆ្នាំ២០២១។ នេះបើតាមសេចក្តីប្រកាសព័ត៌មានរបស់គណៈកម្មការអឺរ៉ុប កាលពីថ្ងៃ១៦ ខែមករា ឆ្នាំ២០១៩។
ចំពោះការគិតពន្ធនាំចូលអង្កររបស់ប្រទេសទាំង២ គឺនឹងត្រូវចាប់ផ្តើមអនុវត្តពីថ្ងៃទី១៨ ខែមករា ឆ្នាំ២០១៩តទៅ ដោយឆ្នាំដំបូងតម្លៃពន្ធនាំចូលចំនួន ១៧៥អឺរ៉ូ ឬ២០០,៧៣ដុល្លារអាមេរិក/១តោន, ឆ្នាំទី២ តម្លៃ១៥០អឺរ៉ូ/១តោន និងឆ្នាំទី៣ តម្លៃ១២៥អឺរ៉ូ/១តោន។
ក្នុងសេចក្តីប្រកាសព័ត៌មាននេះបញ្ជាក់ថា ការសម្រេចកំណត់ពន្ធដូច្នេះ ដោយសារតែការកើនឡើងនូវការនាំចូលអង្ករពីកម្ពុជា និងមីយ៉ាន់ម៉ា បានធ្វើឱ្យប៉ះពាល់ដល់សេដ្ឋកិច្ចប្រទេសអឺរ៉ុបមួយចំនួនដែលជាអ្នកផលិតអង្ករដែរនោះ។
គណៈកម្មការអឺរ៉ុប បានរកឃើញថា អង្ករដែលនាំចូលពីកម្ពុជា និងមីយ៉ាន់ម៉ា ចូលទីផ្សារ EU បានកើនឡើងដល់ ៨៩% ក្នុងរយៈពេល៥ឆ្នាំចុងក្រោយនេះ ដោយមានតម្លៃទាបជាងអង្កររបស់ប្រទេសអឺរ៉ុប។ ហេតុនេះវាបានធ្វើឱ្យប្រទេសអឺរ៉ុបដែលផលិតអង្ករ ពិបាកពង្រីកក្នុងទីផ្សារ EU ពោលគឺបានធ្លាក់ចំណែកទីផ្សារពី ៦១% មកនៅត្រឹម ២៩% តែប៉ុណ្ណោះ។
គួរជម្រាបដែរថា សំណើឱ្យមានការកំណត់ពន្ធនេះ ធ្វើឡើងដោយរដ្ឋាភិបាលអ៊ីតាលី កាលពីខែកុម្ភៈ ឆ្នាំ២០១៨ ដោយមានការគាំទ្រពីប្រទេសអឺរ៉ុបដែលផលិតអង្ករចំនួន៧ផ្សេងទៀតរួមមាន អេស្ប៉ាញ បារាំង ព័រទុយហ្គាល់ ក្រិច ហុងគ្រី រ៉ូម៉ានី និងប៊ុលហ្គារី។
ជុំវិញរឿងនេះ លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានប្រាប់ឲ្យដឹងថា កម្ពុជាពុំមានអ្វីទើសទាល់ទេ ចំពោះការយកពន្ធនាំចូលអង្ករពីកម្ពុជា ទៅក្នុងសហភាពអឺរ៉ុប។ លោកថា កម្ពុជាក៏អាចមានលទ្ធភាពក្នុងការចាត់ចែងបង់ពន្ធបាន ម្យ៉ាងកម្ពុជាក៏មិនចង់នៅតែជាប្រទេសមួយដែលត្រូវបានគេចិញ្ចឹមរហូតនោះទេ៕