បុគ្គល៣រូប ដែលជាប់ពាក់ព័ន្ធក្នុង «យុទ្ធនាការម្រាមដៃស្អាត» យល់ព្រមបង់ប្រាក់ពិន័យទៅ គ.ជ.ប ហើយ

2019-01-18 09:51:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អតីតមន្រ្តីនៃអតីតគណបក្សសង្គ្រោះជាតិខេត្តបាត់ដំបង ចំនួន ៣រូប ដែលជាប់ពាក់ព័ន្ធនឹងការរារាំងប្រជាពលរដ្ឋមិនឱ្យទៅបោះឆ្នោត ឬយុទ្ធនាការម្រាមដៃស្អាត បានយល់ព្រមបង់ប្រាក់ពិន័យនៅគណៈកម្មាធិការជាតិរៀបចំការបោះឆ្នោត (គ.ជ.ប) រួចរាល់ហើយ។ នេះបើតាមការបញ្ជាក់របស់លោក សោម សូរីដា អគ្គលេខាធិការរង គ.ជ.ប នៅថ្ងៃទី១៨ ខែមករា ឆ្នាំ២០១៩នេះ។

លោក សោម សូរីដា ថ្លែងទៅកាន់អ្នកកាសែតនាពេលកន្លងមក

បុគ្គលទាំង០៣នាក់ រួមមានៈ ១. លោក ជា ជីវ មានទីលំនៅឃុំអន្លង់វិល ស្រុកសង្កែ ខេត្តបាត់ដំបង ដោយពិន័យជាប្រាក់ ១០លានរៀល។ ២. លោក ថោង សារឿន មានទីលំនៅភូមិ-ឃុំ គាស់ក្រឡ ស្រុកគាស់ក្រឡ ខេត្តបាត់ដំបង ដោយពិន័យជាប្រាក់ ៥លានរៀល និង៣. លោក គ្រុយ គឹមសាំង មានទីលំនៅស្រុកកំរៀង ខេត្តបាត់ដំបង ដោយពិន័យជាប្រាក់ ៥លានរៀល។

ការបង់ប្រាក់ពិន័យនេះ ធ្វើឡើងតាមរយៈអ្នកតំណាងម្នាក់ឈ្មោះ សួន ចំរើន មានទីលំនៅក្នុងសង្កាត់ចំការសំរោង ក្រុងបាត់ដំបង ខេត្តបាត់ដំបង។ ការយល់ព្រមបង់ប្រាក់នេះ ក៏ធ្វើឡើងក្រោយការព្រមានរបស់ គ.ជ.ប ផងដែរ។

សូមរំលឹកថា កាលពីថ្ងៃទី០៨ ខែសីហា ឆ្នាំ២០១៨ គ.ជ.ប បានបើកសវនការជំនុំជម្រះលើសំណុំរឿងលេខ០០១ ដែលពាក់ព័ន្ធនឹងយុទ្ធនាការម្រាមដៃស្អាត នៅខេត្តបាត់ដំបង ហើយបានសម្រេចឲ្យឈ្មោះ ថោង សារឿន និងឈ្មោះ គ្រុយ គឹមសាំង ត្រូវបានពិន័យក្នុងម្នាក់ៗ ៥លានរៀល ដោយពុំទាន់គិតពីទោសព្រហ្មទណ្ឌ។ ចំណែកឈ្មោះ ជា ជីវ ដែលជាមេដឹកនាំ ពិន័យ១០លានរៀល។

បុគ្គលទាំងបីនាក់នេះ មិនសុខចិត្តចំពោះការសម្រេចរបស់ គ.ជ.ប ក៏បានប្តឹងបន្តទៅក្រុមប្រឹក្សាធម្មនុញ្ញ។ ហើយនៅថ្ងៃទី១៥ ខែសីហា ឆ្នាំ២០១៨ ក្រុមប្រឹក្សាជំនុំជម្រះ នៃក្រុមប្រឹក្សាធម្មនុញ្ញ បានចេញសេចក្តីសម្រេចបិទផ្លូវតវ៉ា ដោយតម្កល់ការសម្រេចរបស់ គ.ជ.ប ទុកជាបានការដដែល។

សូមជម្រាបថា នៅក្នុងរយៈកាលនៃយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៦ ក្រុមបុគ្គលខាងលើនេះ បានធ្វើការបង្ហោះរូបភាព និងសារមួយចំនួន ដោយលើកម្រាមដៃ ក្នុងន័យបំផុសបំផុលមិនឲ្យប្រជាពលរដ្ឋទៅចូលរួមបោះឆ្នោត នាថ្ងៃទី២៩ ខែកក្កដា ឆ្នាំ២០១៨ ដោយគេប្រើពាក្យមួយឃ្លាថា “យុទ្ធនាការម្រាមដៃស្អាត” មានន័យថា មិនចូលរួមបោះឆ្នោត។

ក្រោយពីមានយុទ្ធនាការម្រាមដៃស្អាត ក្នុងគោលបំណងរារាំងមិនឲ្យប្រជាពលរដ្ឋបានបំពេញកាតព្វកិច្ចជាពលរដ្ឋខ្មែរបែបនេះ ទើបក្រុមការងារនៃគណបក្សប្រជាជនកម្ពុជា បានដាក់ពាក្យប្តឹង ទៅគណៈកម្មការរៀបចំការបោះឆ្នោតខេត្តបាត់ដំបង កាលពីថ្ងៃទី១៩ ខែកក្កដា ឆ្នាំ២០១៨ ដើម្បីចាត់វិធានការតាមផ្លូវច្បាប់៕

អត្ថបទ៖ សោភា