មេប៉ូលិសខេត្តរតនគិរីថ្មី ប្ដេជ្ញាបម្រើការពារផលប្រយោជន៍ប្រជាពលរដ្ឋ

2019-02-12 06:24:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកឧត្ដមសេនីយ៍ទោ យិន ចំណាន ស្នងការនគរបាលខេត្តរតនគិរី ដែលទើបតែតែងតាំងថ្មី បានប្តេជ្ញាអនុវត្តឲ្យបានម៉ឺងម៉ាត់បំផុត រាល់ការដាក់ចេញនូវបទបញ្ជារបស់ថ្នាក់លើ ជាពិសេស ធ្វើឲ្យផ្ទៃក្នុងអង្គភាពកាន់តែមានភាពរឹងមាំ សំដៅដល់ការបម្រើ ការពារផលប្រយោជន៍ប្រជាពលរដ្ឋ ប្រកបដោយប្រសិទ្ធភាព និងតម្លាភាព។

លោកឧត្ដមសេនីយ៍ទោ យិន ចំណាន (រូប៖ Facebook)

ការប្ដេជ្ញារបស់ស្នងការនគរបាលខេត្តរតនគិរីថ្មីនេះ ត្រូវបានធ្វើឡើងក្នុងពិធីប្រកាសផ្ទេរភារកិច្ច និងតែងតាំងមុខតំណែងស្នងការនៃស្នងការនគរបាលខេត្តរតនគិរី ក្រោមអធិបតីភាពលោកនាយឧត្តមសេនីយ ខេង សុមេធ អគ្គស្នងការរងនគរបាលជាតិ និងលោក ថង សាវុន អភិបាលខេត្តរតនគិរី នាព្រឹកថ្ងៃទី១២ ខែកុម្ភៈ ឆ្នាំ២០១៩នេះ។

លោកឧត្ដមសេនីយ៍ទោ យិន ចំណាន ត្រូវបានតែងតាំងជាស្នងការនគរបាលខេត្តរតនគិរី ជំនួសលោកឧត្តមសេនីយ៍ទោ ងួន គឿន ដែលត្រូវបានចូលនិវត្តន៍។

មានប្រសាសន៍ក្នុងពិធីប្រកាសផ្ទេរនិងតែងតាំងមុខតំណែង មន្រ្តីនគរបាលជាន់ខ្ពស់ខាងលើ លោកនាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ បានធ្វើការព្រមានដល់មន្រ្តីក្រោមឱវាទ មិនត្រូវយកតួនាទីរបស់ខ្លួនធ្វើជាមុខរបរឡើយ ដើម្បីចៀសវាងការចោទប្រកាន់ពីមហាជនទូទៅ ដែលនាំឲ្យប៉ះពាល់ដល់តម្លៃ និងសេចក្តីថ្លៃថ្នូ វិន័យរបស់មន្រ្តីនគរបាល ប្រសិនបើរកឃើញថា មន្រ្តីរូបណាប្រព្រឹត្តទង្វើបែបនេះ ត្រូវទទួលទោសទៀតផង។

ជាមួយគ្នានេះដែរ លោក ថង សាវុន អភិបាលខេត្តរតនគិរី ក៏បានជំរុញឲ្យមន្រ្តីនគរបាលគ្រប់មូលដ្ឋានទាំងអស់ ត្រូវបង្កើនការសហការគ្នាជាមួយអាជ្ញាធរពាក់ព័ន្ធគ្រប់លំដាប់ថ្នាក់ទាំងអស់ ត្រូវធ្វើយ៉ាងណាបន្តរួមគ្នា បំពេញភារកិច្ចដែលរាជរដ្ឋាភិបាលប្រគល់ជូន ដើម្បីរក្សាបាននូវសន្តិសុខ សណ្តាប់ធ្នាប់ និងសុវត្ថិភាពការរស់នៅរបស់ប្រជាពលរដ្ឋទូទាំងខេត្តរតនគិរី ឲ្យមានភាពកក់ក្តៅ ជាពិសេសនោះត្រូវបន្តស្រាវជ្រាវបង្ក្រាបឲ្យបានរាល់បទល្មើសផ្សេងៗដែលកើតមានក្នុងមូលដ្ឋាន ឲ្យមានប្រសិទ្ធភាពបំផុត៕

អត្ថបទ៖ លាភ.